خرجت انا وتلاته صحابى انهارده خروجه مفاجأة وبدون مقدمات
بعد ماخلصنا المدرسه فجأه
ماتيلا نخرج اه يلا
واللى منهم بيدى دروس راح متصل بالعيال ومأجل دروسه
ركبنا التاكسى
وكنا بنضحك بهيستريا
رغم ان الطريق كان واقف بشكل غريب واول مره يكون واقف كده
كنت حاسه إن كل حد فينا شايل بلاوى جواه بيخرجها ف الضحك
طبعا طول ماحنا ف التاكسى قاعدين بنضحك بدون سبب زى المجانين
والغريبه ان عمو السواق كمان كان كل ما الطريق يقف يقعد يضحك
نزلنا اكلنا وقعدنا نضحك
بس انا حساهم اوى
وحاسه إن كل حد فيهم بجد مخنوق
وانا اولهم
المهم تظاهرت كل منا انها اتبسطت جدا
وروحنا بيوتنا
اول ما وصلت البيت لقيت بابا متنرفز على حاجه عاديه جدا , ولقتنى اتعصبت جدااااا
ودخلت نمت زعلانه زى ما اكون كنت مخنوقه واما صدقت
ثانيه ولقيت تلت رسايل من صحابى اللى كانوا معايا
كل رساله فيهم
بتعبر عن خنقه شنيعه
واحدة عايزة تقعد تتكلم معايا تانى يوم علشان مخنوقه
وواحده رسالتها من كلمتين ( مخنوقه وهاعيط ) ه
والتانيه محفظتها وقعت منها ف التاكسى ومخنوقه جدااا
طبعا ماحدش منهم يعرف ان التانى بعتلى ولا ان التانى مخنوق
كلهم عاملين مبسوطين
بس هوه احنا ليه كده ؟
واما احنا مخنوقين كنا بنضحك ليه ؟
بنخدع نفسنا ؟
ولا بنمثل ادوار على بعض ؟
