Friday, December 12, 2014

my little family





بعد الالم واوجاع صعبة طوال الليل قررت انا وحازم نتصل بالدكتورة ونسألها اذا دى الالام الولادة ولا مغص ولا ا


وبعد التأكد منها ان الاستاذ مازن قرر يشرف الدنيا روحنا عالمستشفى


فالطريق انا شوفت الالام عمرى ماحسيت ربعها قبل كده واقتنعت فعلا ان الولادة دى اصعب حاجة فالدنيا

مش قادرة انسى لحظه اما الدكتورة رفعتلى مازن اول مانزل وهوه لسه فى كيس البطن وقالتلى بصى عليه بسرعة قبل مفعول المخدر وكانت لقطة سريعه اوى زى ماكون كنت باصور صورة 

بعدها حسيت راحة غريبة والحمد لله

خلينى بقا احكيلكم عن النعمة اللى ربنا بعتهالى دى (مازن) وخصوصا انه معايا بقاله شهرين

ى فتر مش هنكر انى لغاية من يومين كنت باعيط منه ومن التعب اللى باشوفه معاه وخصوصا انى من يوم مااتجوزت وانا حساانى مستقلة كده وهادية 

فبصعوبه اوى انى اخد على هذا الكائن الغوغائى اللى بيعبر عن كل حاجة بالزن والعياط واللى مصر تكون اوقات نومه مغايره للناس كلها 

الفترة الاولى كنت مش مستوعباه وتعبت اوى بس دا لانى كنت عايزه أأقلمه عليا مش اتأقلم عليه ودا صعب اوى دلوقتى فكنت باشد اعصابى واتعب نفسيتى 

ويمكن كمان اللى بيشدنى خوفى من المسئوليه والتقصير معاه .. دا غير انه ضعيف ولغاية النهاردة روحت بيه للدكاترة تسع مرات 

جنب دا كله مش ممكن انسى النعمة التانية اللى ربنا رزقنى بيها (حازم )وقف جنبى استحملنى ..ساعدنى ,,غير من شخصيته حاجات علشان خاطر ابنه  زى مانا غملت 

فى الفترة دى انا حسيت انى ماكبرتش وبقيت ام  لا والله العكس تمام .. انا بقيت طفلة محتاجة اللى يحتويها.. اما ماما بتيجى تسلم عليا وتحضنى باحس انى عايزة استخبي من المسئوليه جوه حضنها وماخرجشوحازم حاسس دا وبيحتوينى

وكل دا كوم وهدية عيد جوازنا اللى جبهالى كوم (طمطم ).. واللى بقت غلاوتها عندى من غلاوة ميزو :D

ربنا يخليلى اسرتى الصغيرة دى ويحفظهم من اى سوء

Thursday, September 25, 2014

10...9...8...7...6...5....




Waiting for the best gift from Allah ..............................................



Samah Adel

Tuesday, September 9, 2014

يارب





اجعلها من نصيبه 


samah Adel

Tuesday, September 2, 2014

وهوه فيه بعد الام ؟؟؟!!!!



حسيت اوى الايام دى بقيمتك ياامي

لما لاحظت انك عماله تدى من صحتك ومجهودك علشان بس تشوفينا مبسوطين

لما لاقيتك بترضى بقليللك رغم انك بتدى كتييييييييير 

لما عملت حاجات من غير قصد تزعل اى حد مكانك وانتى اصلا مافكرتييش تزعلى 

واما شوفت قلقك وخوفك عليا 

واما لقيتك بتيجى على نفسك اوى علشانا 

واما شوفت دموعك يوم فرحى ودموعك يوم مرضي 

واما اكتشفت انك اما بتكونى  تعبانه مش بتبقي مبينه لحد فينا .. دا الواحد اما بيصدق يتعب علشان يحس اهتمام اللى بيحبوه بيه 


عارفه ياماما لوالزمن رجع بيا ليوم فرحي انا هاقعدك انتى جنبى فالكوشه ... انا اسفه انى فاليوم دا التوتر والخوف خلانى غفلت عن 
اني اهتم بيكى ....علشان انتى اكتر حد فالدنيا يستاهل الاهتمام والحب

انا حاسه انى صغيره اوى على عطاءك دا كله 

,,, شكرا يارب على نعمة امى 


اللهم احفظها واشفيها واسعد قلبها 

وارزقها زيارة بيتك 


samah adel

Friday, August 15, 2014

Love & Hate





I love this feeling :


When he sits with me and talks about his work .

When he calls me many times within his work just to appear the interest .

When he appears his admiration about the food which I make even if  It tastes bad . 
 .
When he feels my pains and tries to make me forget it . 

When i feel that he appreciates every member in my family .

When he comes from his work and opens the door with a big smile .



 But I hate :

When he hears only himself , do what he finds good   and ignore my feelings  even if I am right  and my opinion is better .

When he escapes from his problems .

When he puts the future behind his back and refuses to think about it .

When he hides his troubles and worries inside himself without sharing me on them .






Samah Adel 

Friday, August 1, 2014

اول رمضان وعيد




رمضان معاك مختلف .. اهه كنت مفتقداك شويه بسبب شغلك 


بس انت عوضتنى باليوم اللى اتسحرناه بره مع بعض واليومين اللى فطرناهم بره 

يارب المره الجايه يكون رمضان احلى ويكون ربنا رزقك بشغل مستقر اكتر او تكبر وتعلا في شغلك :)


اما 

عن احساسي بأول عيد ليا فى بيتى مع جوزى 

وهوه دماغه رايقه وقاعد فالبيت اجازه 

ومش وراه حاجة غيري ولا ورايا حاجة غيره

وخروجات تقريبا من يوم الوقفه 

وكمان احساس الدفأ والامان 

كان بيحاول يرضينى على اد مايقدر حتي الفسيخ خلانى اكل منه :)

بعيدا عن اى شىء انا بجد استمتعت اوى وانا معاك ياحبيبى 

ربنا مايحرمنى منك ابدا

العيد دا جدد جوايا حاجات حلوة كتير 

كفايه انك كنت جنبى فيه 


بحبك يازومييييي بقا 
وباحب العيد معاك 









samah Adel

Thursday, April 24, 2014

الحمد لله




انا مش عايزة ابقى باعترض او بأنقم على حياتى 

بس فعلا انا حاسه انى هكتئب قريب اوى علشان اسباب كتيرة اوى واهمها الفراغ والوحدة  اللى مخلينى افكر فى الاسباب د ى


بس برده لا يسعنى سوا ان اقول (( الحمد لله على كل شئ))ه

Wednesday, March 19, 2014

lonely


 
Bad feeling
 

Thursday, March 13, 2014

من تواضع لله رفعه

 
 
فغلا البني آدم المتواضع دا ربنا بيحبه علشان كده زرع جواه الصفة دى

البنى ادم المتكبر دا عنده قدره كبيره اوى انه يخلى الناس اللى فى تايتل اقل منه يكرهوا الدنيا والشغل واى انجاز يقدروا يعملوه
رغم انه اكيد بقى كده و كبر فى شغله بسبب حد التايتل بتاعه اكبر منه وساعده بكل تواضع انه يكبر
 
دى تجربه جربتها لما كنت باشتغل ... كان الديركت مانجر بتاعى حد مش ملتزم نهائى بمواعيده ولا بشغله تقريبا .. هوه بس بيدى اوردرز وبكل كبر بيتعامل معايا ... فعلا وصلنى لدرجة كرهت فيها الشغل .. رغم ان قبله كان ماسك شغلى واحد تانى حببنى جدا فالتايتل الجديد اللى طلعتله .
 
المهم ان كان فيه واحد بيقعد معانا فى نفس المكتب  اسمه ((اشرف عفيفيى )) اللى انا اصلا عاملة البوست دا علشانه .. هوه اصلا كان اصلا تبع بروجكت تانى خالص ... وكنت اعرف انه تايتل كبير .. بس ايه التواضع اللى هوه فيه دا ؟؟؟!!! كان بيتعامل معايا كأنى اخته الصغيرة .. ورغم انى ماقعدتش معاه غير تقريبا اربع مرات .. إلا ان كل مرة فيهم كان بيعمل معايا مواقف تدل على انه متواضع جدا ومحترم جدا جدا جدا لدرجة انى نسيت انه اصلا تايتل .
 
وانا بألعب فى الفيس بوك لقيت الاكونت بتاعه دخلت اصلا اتخضيت من شكل التايتل بتاعه ومن الشهادات بتاعته ومن البيزنس اللى هوه عامله ... ودعيتله ربنا يرفع قدره كمان وكمان علشان دا يستاهل ولقيت التانى اللى كرهنى فالشغل رادد عنده ...والله ماقدرت افتح الاكونت بتاعه من كتر ماانا مش طايقاه .. ولقتنى تلقائى بأدعى عليه رغم ان دى مش طبيعتى ابدا .
 
وعايزة بس اقوله انك بتكبرك بقيت تخلينى اشوفك ولا حاجة .. وان التانى بتواضعه خلانى اشوفه ملاك :)
 
فعلا التواضع دا نعمة

Wednesday, February 12, 2014

الحمد لله


ياحازم اصلا وجودك فى حياتى نعمة كبيرة اوى من عند ربنا :)

(( ربنا ))
 بيعملى حاجات كتيرة اوى حلوة ... وانا حاسةانى  مقصرة اوى فى حقه ... وانه اصلا مدينى اكتر من حقى بمراحل 




الحمد لله 



Friday, December 20, 2013

7/12/2013




لسه مش مستوعبه انى مدام حازم

 ولا انى كنت عروسة بالفستان الابيض من كام يوم

Wednesday, December 4, 2013

كواليس ماقبل الفرح

انهاردة5/12/2013

يعنى باقى يومين على فرحى 


ماما :
هاين عليها تجيبلى الدنيا ومافيها علشان تشوفنى مبسوطة ... عمالة بتدعبس وتسأل الناس احطلها ايه فالتلاجه .. اجيبلها فاكهة ايه .. نفسك فى ايه ؟؟ خطيبك بيحب ايه؟؟؟ 
ومش بتقولى عايزة فلوس تانى ليه ولا خلصتى الاولانى فى ايه؟

بابا :: 
فرحان وطاير .. بس كالعادة الكبر واخده ومش مبين 
بينشف دماغه فى حاجات مش وقتها
بس من جواه قلبه بيرقص م الفرحة وبيدعى تتم على خير 

اميرة ::
رغم انها بروطة إلا انها فجأة نط فيها النشاط وبقت بتخدمنى بعنيها .. كل ماتشوف حاجة اودامها عقلها يصورلها انها هتنفعنى وتجيبهالى 
وايام كتير كانت بتروح معايا بتاع 3 مشاوير فى النص بين الشغلين بتوعها .

سارة ::
مش فالحة غير فى انها تحسبلى باقيلى كام يوم وسريري يبقى فاضى والشقة تبقى مافيهاش سماح :D
وهتلبس ايه فالحنة وهتلبس ايه فالفرح
هيكون فيه اغانى ايه علشان ترقص هيه وصحابها 
هتخرج معانا ولا لأ 
دا غير انها هتموت وتعيش معايا اول اسبوعين علشان تاكل الاكل بتاعى كله 
:D

صحابى :
معايا خطوة بخطوة بيطمنوا اذا ناقصلى حاجة وهيموتوا ويخدمونى 
دا غير ان فيه ناس كتير مش قريبين ليا بيعرضوا عليا مساعدتهم ومش عزومة 


معارفى ::
اكتشفت ان فيه كام حد كده مكانته فى حياتى ماكنتش كبيرة بيعمل علشانى حاجات وخدمات مش متوقعه .. ولو اتنططت مش هاعمل ربعها .. وبدون مقابل 
وبيقولولى على طول جملة (( دا اقل حاجة ))) انتى جمايلك مغرقانه 


حازم ::
رغم الضغط اللى عليه .. زاللى هوه 5 اضعاف الضغط اللى عليا إلا انه بيحاول يكون معايا بيضحك ومبسوط ومش بيقفش ...
 رغم انه 
شوية بيتحول .. وتحول مخوفنى منه بس اهم حاجة انه حاسس بيا وحاسس اد ايه انا قلقانه م الخطوة دي
 بس اللى فهمته انه مش بيحاول يفكر فاللى جاى وسايبه على ربنا ... مش قلوق زيى  




انا ::
بقيت عصبية .. باكل ضوافرى .. شكلى وحش ... عينى دخلت لجوه .. السواد اللى تحت عينى بقى اسود غامق فاقع ... وكل يوم ورايا 5000 مشوار 
وتعبتتتتتتتتتتتتتتتتتتتتتتتتتتتتتتتتتت
لمجرد اما بافكر احط راسى عالمخدة بتبدأ الافكار تلعب بدماغى الكورة .. وافكر هاقدر اتحمل مسئولية بيت ؟؟ طيب وهاعرف ارضى ديما جوزى واحسسه ان الحياة احسن بعد الجواز ,,, والاكل اللى مابعرفش اعمله هيجيلى يوم وابقى باعرف كده مع نفسى .. ولما ربنا ان شاء الله يكرمنا بالذرية .. هاقدر اطلعهم عيال جامدين كده وصالحين ؟؟
واصلا اصلا اذاى هابات بره بيتى وهتتحول حياتى بالشكل دا 


شغلى ::
انا كان نفسي اكمل فى الشغل دا بعد الجواز ومايغذلنيش ... بس النصيب انى اسيبه ... وفعلا اكتر حاجة استفدتها من شغلى هيه الناس .. عرفت ناس كتير جدا  ومن كل فرد فيهم اتعلمت حاجة جديدة .. دا غير انى كسبت صحبه جديدة ..ربنا يديم بينى وبين الناس دى المحبة :)

Wednesday, November 20, 2013

tired



Need to sleep calmly without thinking :)

Wednesday, November 6, 2013

My man




بيقولوا ان الرجولة مواقف 

وانت مواقفك معايا كلها بتقول انك 

ارجل راجل 

<3 i="">

Saturday, October 26, 2013

باقى من الزمن


40 يوم و 15 ساعه و 36 دقيقه وتبقى بتاعتى :)





هاتبقى احلى عروسه على فكره

Re-Real happiness




ربنا يحققلك حلمك ويكمل فرحتك

Real happiness




فرحتى بجد هتكمل
 لما إن شاء الله ربنا يكرم اختى بالزوج الصالح 
واخويا بالذرية الصالحة واشوف الفرحة فى عين ماما وبابا 

:) يارب ماتحرمنيش الفرحة دى  

Saturday, October 12, 2013

بعض الفشل


ربنا يحميك ويخليك ليا يابابا 

____________________________________

بقيت باخاف افرح وخصوص لأنى 


بدأت اقتنع بإن الدنيا مش بتفرحنى غير علشان مجهزالى صدمة كبيرة 

__________________________________


رغم انى مش باحس مع حد فالدنيا بالامان اد مابحسه معاه إلا انى خفت وقتها وهيه الورقة بتتكتبوحسيت ان مجرى حياتى كلها هيتغير 

__________________________________

مش عارفة افرح ولا اخاف ... بس غالبا انا فرحانة بنوع من القلق 

__________________________________

هوه ممكن احساس الفشل اللى بيلاحقنى دا يموتنى ؟؟!!!!

__________________________________

  احبطت جدا من رد الفعل ... وخصوصا اما تلاقى اللى المفروض يبقى معاك وسندك وبتاعك بقى عليك وضدك بدال مايكون معاك 
فى اقل حق ليك .. 

وبعدها فعلا اقتنعت ان ماحدش هيحبنى ويحترم رغباتى اد ابويا ... ربنا يقدرنى واقدر افرح قلبه
___________________________________

اذاى كونى ابقى مستقلة بحاجاتى اصبح حاجة مش من حقى 

____________________________________

كل ماابقى فرحانه ومتعايشة .. يجيى هاجس فى دماغى يفكرنى ان بعدى كان سهل ومش بيوجع وابدأ اضغط على قلبى علشان يشد ومايبقاش عبيطا
____________________________________

المصيف دا جاى فى وقته .. انا فعلا محتاجة انضف من اى حاجة مديقانى او مزترانى وخصوصاا الفترة الجاية 

Friday, September 20, 2013

Can't forget




Monday, September 9, 2013

حقيقى باحسدكم





   بالنسبة للناس اللى مابتشغلش وقاعدة فالبيت

سؤال بسيط :

انتوا ازاى مستحملين حياتكم كده ؟؟؟؟؟

بجد انتوا عندكم قدرة مش عند ملايين غيركم 


ازاى بتبقوا طايقين الاربع حيطان الثابتين دول ..



وعصبية كل حد راجع من شغله اللى بيطلعها فيكوا 


والسكوت والصمت وفترة السرحان اللى بتيجى بسبب ان مافيش اى مجهود عقلى كبير بيتم ولفترة كبيرة

انتوا ازاى جامدين كده ؟!!!!!!!!!!!!!!؟؟


Thursday, September 5, 2013

همسات




عارفة انك بتحبنى ياربى ... واكبر دليل على كدة انى كل مااجى اغرق الاقيك بتطلعنى تانى



بس للاسف انا اللى مابحبش الدنيا 


__________________________________


المشكلة اللى كانت عندنا ان كل حد اتوجع بالحاجة اللى دايقته وانشغل عن انه يحس بوجع التانى 


___________________________________


انا حساه هيجيبه الارض وخايفه عليه من الندم :(

___________________________________

مش عارفة احسينى للمرة التانية ولا ابقى ابدا زى اول مرة ((حماسة الشباب ضاعت خلاص)) هع

___________________________________

ماهى دى طبيعة بشرية فينا ... هارجع واقول تانى :: ماحدش فالدنيا يلاقى دلع ولا يدلعش
واكسر للبنت ضلع يطلعلها 24 :)
___________________________________

No answer from my side for such as these cases :s

Wednesday, August 28, 2013

Any subject




I'll keep my comments in my mouth & won't advice anyone .

Every one will be responsible for his actions and behaviors as my advise is always considered as a distaste .They feel as if I'm their enemy and I only aim to my personal benefit.

Stop putting me in this circle . Now  I am trying to build my new own life .

I try to be patient , keep the good feelings  as I refuse to lose you .

I won't protest because may be the work's stress makes him like that and also because he suffered alot from me.

Keeping silent in a quiet place is the best decision .

something new can break my bad routine.

feel that I became one of his last priority . 

Partially died . 


Thursday, August 22, 2013

عودة للكتابة



كنت مقررة انى ابطل اكتب هنا بقى .... بس باينله بقى ادمان وبقى هوه مصدر الفضفضة الوحيدة 


بالنسبة للاحلام اللى بنصحى منها على احقر واصعب حقيقة دى .. كانت بتبدأ ليه من الاول ماكانوا يسيبونى عايشة فالحلم


واضح ان الواحد بعد كده لازم ياخد باله من كلامه ايا كان قرب اللى بيتكلم معاه علشان جايز يكزن قربه دا مجرد تعود وهوه عبيط ومايعرفش او جايز كمان يكون تسلية ومش بعيد يكون وهم وهوه مش حاسس ماهو كل حاجة ممكنه 

عايزة حالا اروح البحر واكلمه زى زمان مابقاش ينفع استغنى عنه 

في شغلى ,, انا فاشلة 

هوه ليه ماحدش حاسس بالخنقة اللى جوايا .. علشان باضحك يعنى ومش قلباها نكد؟؟؟ جايز وممكن واحتمال !!

بقيت باخاف 

ايام وبنعيشها.....

في كلام كتير جوايا زعلان :(

Tuesday, July 23, 2013

something is lost





كسماح

مش مبسوطة خالص

وعايزة اعيط

Thursday, May 9, 2013

صحابى نعمة

الاصدقاء نصيب

وانا نصيبى حلو اوى بجد فيهم 

صحيح مش بنتقابل كتير 

وكل فين وفين لما بنتكلم 

بس بنحب بعض وبنشتاق لبعض من غير اى مصالح

لما واحدة منهم بتيجى في بالى بابتسم و باحمد ربنا على النعمة دى

Tuesday, May 7, 2013

can't stand



Everything is Fake

Everyone is abuser 

Need to live alone 

Wednesday, April 17, 2013

انا مأريفه




يعنى ايه مأريفه؟؟؟

 يعنى عندى إحساس بالأرف ما اعرفش سببه

وفعلا مابيبقاش فيه سبب؟

لأ طبعا فيه اسباب كتيرة بس من كتر ماهيه متكررة الواحد بدأ يحس ان مافيش سبب يخليه يزهق ويتدايق

زى الروتين اليومى 

الشغل اللى بيفرض عليك تشوف ناس مش حابب تشوفهم

الاخبار الجديدة والسعيدة اللى مش بتحب تزورك رغم انها بتزور ناس كتير اوى غيرك

الشلل الوظيفى (لما مايبقاش فيه طموح وظيفى )

الغيرة والحقد .. لما نفس الشخص اللى معاه نفس مهاراتك يكون بقى تايتل وصاحب وظيفة جامدة فى حين انك قاعد فالبيت او بتشتغل فى مجال تانى خالص .. والحقد دا مش عيب 

المحسوبية والظلم اللى حواليك

تكشيرة الناس فى وشك وعصبيتهم عليك علشان بيتعشموا فيك انك انت اللى هتستحمل غضبهم رغم ان اللى صايبهم صايبك

 رغبتك فى الاحساس بالاهتمام من الناس اللى حواليك وخصوصا اللى بتحبهم ..فى حين انهم مشغولين بحياتهم وشغلهم ومش فاضينلك اصلا

فرصة كانت اودام عينك وسيبتها بسبب غباءك ونفسك تضرب نفسك 100 قلم بسبابها

احساسك بالتقصير تجاه ناس انت بتحبهم بس بسبب الاريفة دى مش عايز تتواصل 
معاهم وانت دمك تقيل كده

اخبار سياسية تغم نفسك

احساسك بعدم الامان 

حواليك ناس ضميرهم مات من زمان وبيستخدموا طرق غير مشروعه وفعلا بيقدروا بيوصلوا ويعلوا ...وانت مش عارف تتكلم ويقولوا عليك منفسن ولا تسكت وتحس انك شيطان اخرص


وحاجات كتير مش ظاهرة اوى ... لكن بتأثر عليك بالبطيىء لغاية ماتشل تفكيرك

لغاية ماتوصل للشعور اللى انا حساها دلوقتى

شعور الأريفة



Saturday, March 23, 2013

يعنى ايه دا




بدأت اليوم بكابوس غريب خلانى ماعرفتش اكمل نوم تانى 

قومت لبست ونزلت 8.30 

رغم انى معادى هناك الساعة 11 غير اننا الجمعه  يعنى الطريق هيكون فاضى وهاوصل فى نص ساعة تقريبا

اول مانزلت لقيت الدنيا هوووووووووس والهوا لونه اصفر والتراب مالى الدنيا والجو العام يخوف

فجأة لقيت واحد طالع اودامى فى ايده سكينة مليانه دم وحاطط كيس اسود على وشه وعمال بيجرى بشكل فظيع 

وقفت وانا ساكته ومصدومة ومش عارفة حتى اصرخ 

لغاية مااالراجل وصل لاخر الشارع وانا بنفس سكوتى 

بعدين كملت وروحت اركب الميكروبص السواق فضل واقف بيملى فوق الربع ساعة 

واحد من الركاب اتخانق معاه علشان اتاخر على شغله قام نزله بالمطوة 

ودا يضرب فى دا ودا يضرب فى دا وانا فى حالة اذبهلال 

نزلت من الميكروبص وقررت اركب الميكروبصات ومش هاركب المترو

عديت الناحية التانية وروحت علشان اركب وبقيت عاملة زى الملبوسه

اقل صوت ممكن يخلينى اتزعر واتنفض من مكانى

روحت الشغل وانا متدايقة اوى

واللى فات كله كوم والعملا وقرف العملا فاليوم دا كان كوم تانى خالص

وفى احداث تانى دايقتنى بس اكتفى بها داخلى  

وروحت البيت بليل وانا ساكته ونمت وانا ساكته 

فعلا ربنا يرحمنا برحمته 





Sunday, March 17, 2013

really






ريلى 

انا اتدايقت

Friday, March 8, 2013

my birthday

 
8 / 3 / 2013
 
بمجرد وجودك فى حياتى

اليوم دا
 
بقى مختلف عن كل سنة
 
 

Thursday, March 7, 2013

bad attitude





باكره السلبية والجبن

Monday, March 4, 2013

مش انا



ساعات باحس ان مافيش منى اتنين

ايوه انا حاجة نادرة 

قليل اوى اما تلاقوا زيى 

دى مش شكرانية فى نفسى لاقدر الله

بس اصلى بت عسل ياناس

Saturday, March 2, 2013

Warning



يوم ماتفكرى يادنيا تكشريلى عن انيابك

انيابك دى انا هكسرهالك ياحلوة 


Saturday, February 2, 2013

فضفضة عالهامش


شكلى كدده هاضطر استحمل الوضع على ماهوه عليه لحين اصدار آخر وامرى لله


بجد ربنا بيحبنى لمجرد انه ربط مصيرى بالناس دول سواء بابا , ماما , اخواتى , زومى 
... الحمد لله

بحب اوى اما بنبقى فى وسط ناس كتير والاقى عينك عليا وملاحظنى .. وكونى وسط الناس الكتير دول مش بيخليك تنسى انى مسئولة منك .. دا انت حتى كمان بترد بدالى وعنى ساعات :)

عايزة اعيش العمر كله معاك

سجل الايام دى عندك علشان لما نبقى نحكيها لعيالنا بعدين .. ان شاء الله :)


البلد بقت محتاجة يتعملها ريستارت .. مع العلم ان فيه ملفات ( اشخاص) كتيرة هتتمسح والتحميل هيقف .. بس هوه اصلا من الاول وهوه غلط .. بلاش ننزل الغلط خلينا نزيله احسن .. حتى لو هنفقد حاجات غالية فالنص
:(

ياااااااااااااااااه لو انهاردة يبقى طوووووووووووووووويل والوقت مايجريش زى كل اوف علشان احس انى مستعدة نفسيا للشغل.. وماابقاش قرفانه وانزل زى العيل الصغير اللى بيعيط وهوه رايح المدرسة ويقعد يمسك ف كم مامته .. مع انه بيبقى متأكد ان دموعه دى 
مش هتخليها تاخده وتروحه عالبيت ..بس هوه قرف وبيطلعه فالعياط

بحب بووووووووووووووووووووووووووووووووووووووووووووووووووووووووبى ..حتة عيل عسل ياناس
...

الجو ساقعة تلج .. موحة تحت اللحاف .. والمحشى سخن نار .. وبيطلع دخاااااااااان .. موحة هتاكله اول ماينزل م الحلة .. احساس جامد 


خلى ابراهيم يخلص ياحازم بقى بقى بقى