Friday, July 13, 2012

قلبى اتوجعلك



ربنا يريح قلبك 

Thursday, July 5, 2012

1 / 6 / 2012


وصف تفصيلى لكل لحظة يوم خطوبتنا ..علشان لما اقعد انا وحازم بعد عشر سنين اودام المدونة ونقرا الكلام دا نقعد نفتكر احلى يوم فى حياتنا . بحلوه ومره :)

اه احلى يوم فى حياتى علشان ربطنى بحازم دبلة .. خلتنا لينا مصير واحد وتفكير واحد وخلاص طريقنا اصبح واحد

ال ايه عملت حسابى انزل بدرى واخلص عند الكوافير بدرى علشان ما ألطعهوش ويفضل مستنينى ف الشارع كتير ,,, واللى ماعملتش حسابه حصل ... العروسه هيه اللى اتلطعت وهوه جالى متأخرررررررر :(

طبعا اتصلت بيه سبعتلاف مرة وكل اللى حواليا يقولى هوه فين عريسك دا .. ودماغى قعدت تجيب وتودى وبدأت افكر فى انى اروح بتنا اغير هدومى واغسل وشى واتابع مسلسل فاطمة .. جايز الحلقة تكون حلوة وانسىىىىى

واجى اتصل بيه الاقيه بيهزر .. ال ايه له نفس يهزززززززر :وش هيطق لجنابه:

شوية وشرف حازم بالبدلة السودة ... كان شكله عريس عريس يعنى ... عريس بغباءءءءء ... كنت عايزة اقوله كلمتين حلوين بس على مييييييين بقى ماخلاص قفلنى منه قافله سودا ... خلانى نسيت انى عروسه وانه عريس وبقيت حاسه اننا رايحين مشوار عادى

ركبت معاه العربية وفالطريق فكيت الحمد لله... وتوهنا فالطريق وسمعنا احلى اغانى وطنية .. حازم تقريبا كان فاكر نفسه رايح ماتش

D:كورة...وكنت بأرضى باى اغنية غريبة تشتغل علشان خايفة من اخوه لحسن اقوله غير الاغنية يقوم يبرألى :

اول ماالعربية وصلت وحازم وقف يسلم عالناس قومت طلعت على فوق ولقيته طالع ورايا وقام مبرألى وقالى فى عروسه تطلع لوحدها كده!!!!! .... بس اعمل ايه بقى كنت مكسوفه وهوه كان بيسلم وانا مش عارفة اعمل ايه

 ... ومن هنا بدأ احلى يوم فى حياتى فعلا ... كنت مبسوطة اوى .. مش علشان اى حاجة غير علشان اليوم دا قعدت معاه كتير .. والعيلتين بقوا مع بعض كأنهم عيلة واحدة وحسيت اننا قربنا اوى من بعض واعلننا اودام الناس كلها خلاص اننا عايزين بعض واننا ان شاء الله مش هنسيب بعض ابدا

طبعا وقت تلبيس الدبل لقيته ناسى اهم حاجة فالليلة ... ال ايه ناسى الدبلة ... حازم فعلا كان رايح ماتش كورة  :وش افتكر واتعصب:

طبعا انا وهوه رقصنا رقص مايترقصششش : وش بيتريق:  بس الحق يتقال احنا بجد كنا بنسقف حلو اوى ... كنت مكسوفه بشكل غريب .. احساس العروسه دا احساس ريخم

قضينا يوم حلو وروحنا مع بعض ودى كانت اول مرة برده حازم يوصلنى لغاية باب البيت

احلى يوم واحلى عريس 

ربنا يخليه ليا ...