Saturday, December 10, 2011

قمة الاستفذاذ


1 _ انى اكون خلاص يومى خلص وعنيا بتقفل منى والاقى ماما بتقولى : موحة ماتناميش غير لما تغسلى المواعين  


2_ لما اكون بأكلم العميل واقوله : يافندم وحضرتك.. ويقوم قايلى : ماهو يامدامممممم ,, مدام ايه المتخلف دا. نيله عليه وعلى شكله


3_لما الدنيا تدينى فوق دماغى . واقول والله مامعيطة وهاضحكلها وهاعمل مش زعلانه , واضحك اوى وافتح بوقى تقوم مديانى فى سنانى بالأوى


4_لما سواق الميكروبص يبقى عايز يدخل من شوارع جانبيه ويتعدى الشارع بتاعك علشان الزحمه , بس قبل ما يدخل يسأل هوه فيه حد هينزل النادى . تقومى قايله انا ... يقوم قايلك واحدة بس ؟ طيب انا هاخرم من جوه وانتى ابقى امشى الحتة الصغيرة دى ,, ولو فكرتى تتخانقى وصوتك يعلى هتسمعى احلى كلام من اعفن بنى ادم فى العالم ولو سكتتى ممكن يجيلك اكتئاب لمدة اسبوع وتحسى انك حقك مهدور والراجل دا جه عليكى

5_ لما تيجى هتركبى ويقوم راجل لطيف جاى يقوم زقك وانتى لسه هتبصى وراكى علشان تقوليله مايصحش.. تلاقيه مااداكيش فرصه وركب خلاص

6_لما تتبعت ليكى مسدج من رقم غريب بتقولك : أزيك ياسماح عاملة ايه ؟؟ . ويتقفل الموبايل بعدها لمدة سنة من غير ماتعرفى مين الشخصيه دى

7_ لما اكون ماشبه فالشارع ايام امتحانات الثانوى ومافيش حد ماشى فالشارع إلا ويسألنى الامتحان كان عامل ايه انهاردة ياحبيبتى ... (انا بقالى اربع سنين مخلصه الكليه ياعااااااااالم )

8_ لما السنة الجديدة تدخل عليك وانت ماعملتش حاجة مفيدة طول السنين اللى فاتت , وتقوم سائل نفسك . هيه ايه جابها بدرى كده ؟ دا ايه الاستفذاذ دا ؟؟

9_ لما اكون نايمة وف عز النوم والاقى اختى الصغيرة بتقولى سماح تعالى نامى جنبى انا خايفه

هه 10_ لما تلبس تقيل تقوم تلاقى نفسك مش طايق نفسك من كتر الحر ,, تنزل تانى يوم بلبس خفيف تقوم تجيلك صعقه من البرد

11_لما تصاحب ناس كتير اوى اوى اوى وبرده تحس انك لواحدك

12_ لما حد يجرحك بالكلام ويدايقك ويقعد ياديقك وهوه اصلا مش حاسس


13_ لما تكون بتشجع فريق منيل بنيله وعمال تمثل على نفسك وعلى الناس وتقول دا هندسه ومدرسة ومافيش منه وتقاوح فالناس رغم خيبته ويجى الباشا يحط على الفنله بتاعته الهلال والنجمه ومكنسه ومقشه وجروف ويبقى تريقة الخلق كله .




بقى بالذمة دا مش قمة الاستفذاذ؟؟؟!!



انا زهقت منى


مقصرة انا فى حق ناس كتير اوى 

وناس كتير اوى كانت بتسأل عليا بإلحاح 

وبتكرر اسئلتها كتيررررررر

وانا كنت كل اللى حساه انى عايزة اتقوقع واعيش مع نفسى 

ورغم ان التقصير من عندى وان الدور جه عليا انا اللى اسأل واود الا انى غريبة

غريبه اوىىىىىىىىى 

حاسه انى مش قادرة اود ولا ادادى ولا اعتذر ولا اصالح 

مش عارفه ليه بس اكيد دى فترة مؤقته 

ماانا اكيد مش هافضل كتير كده لانى شخصيا زهقت منى 

Wednesday, December 7, 2011

يااااااااااااااااااااااااااااااااه

عارف لما تجيب اخرك

انا جبت بعد اخرى بشويه كمان