Sunday, July 29, 2007

عارفين الولد دا يبقى مين؟

انا فى البوست اللى فات عرضت تقريبا كل اللى حسيته وكل المواقف اللى حصلتلى فى الفرح , بس فى موقف اثر فيا اوى لسة ماحكتوش , جايز علشان هوه عايز بوست لوحده , وجايز علشان المشاعر اللى فى البوست اللى فات كانت كلها مفرحة وفيها تفاؤل فالموقف دا كان هيدخل يبوظ الدنيا ، والاحتمال الاكبر بقى انى حاسة انى مش هاعرف اوصفه بالقدر الكافى اللى هوه يستحقه , بس المشكلة انى بجد متألمة طول مانا ساكتة

ندخل فى الموضوع : ف





فى عز ماكلنا فرحانين اوى لسماح وعمالين دى تصورها ودى ترقص معاها ودى تضحكلها , لقيت فى ولد صوغير ماتمش 8 سنين , لا هوه قريب العريس ولا هوه قريب العروسة , اصغر من اختى الصغيرة بمراحل , الناس عمالة تدوسه وتتحرك فوقه وتزوقه وهوه يروح قايم تانى بدون ما يستنجد بأى حد ولا حتى مستغرب من الناس زى اى طفل , مش هاقولكم حكايته غير لما ندخل على باقى الاطفال اللى كانوا فى الفرحواللى كانوا نفس سنه تقريبا , بنت صوغيرة تقريبا لابسة فستان ابيض وحاطة ميكب كتير واقفة فوق الترابيزة اللى باباها قاعد عندها ,وولد تانى عنده بتاع 10 سنين ماسك فى ايده ازازة بيبسى وعمال يروجها على اساس انها هتفرقع يعنى , وولد تانى مامته واخداه هوه واخته ومودياهم عند العروسة وبتنادى لمصور الفيديو يصورهم , واربع ولاد واقفين بيهبلوا وفاكرين إن دا رقص يعنى , دا نموذج صوغير من الاطفال اللى كانوا على مستوى نظرى وسنهم مايقلش عن 8 سنين ومايزيدش عن 10

نرجع تانى بقى للولد انا قعدت مستغربة هوه الولد دا ليه مش لابس لبس حلو زيهم , جايز يكون الاستايل بتاعه كدة , طب هوه ليه عنده لا مبالاه مافيش ماما يناديلها ويعيطلها من الناس اللى بتزقه ؟؟؟؟ , يمكن مامته ماجاتش معاه , طب هوه ليه مش بيشرب بيبسى زينا , طب وليه واقف مبحلق وتايهه كدة , قعدت سرحت شوية فى الولد , وفجأة لقيت الراجل المصور جايب السلك بتاع كاميرا الفيديو وراح لفه جامد عند رقبته وقاله بصوت عالى اوى , كان اعلى من صوت الاغانى : وانا مش جايبك تشتغل عندى علشان انا اللى ادور عليك , الولد ياعينى راح لافف السلك حوالين دراعه وقعد يلمه كل لما حد فينا يدوس عليه , والناس برده شغالة تدوس على الولد ياعينى ,جايز يكون الولد دا اثر فيا جامد بس الولد المحروق التانى اثر فيا اكتر هاحكيلكم عليه


صحيت من النوم على صوت عربية المطافى , بس عادى يعنى كعادتى نفضت ودخلت المطبخ كلت وعملت كل حاجة عادى جدا , جيت بالليل نازلة لقيت واحدة جارتنا بتقولى ماتمشيش من الشارع دا علشان فى ولد صوغير محروق وميت وهتلاقى زحمة اصلا هناك , ليه ياطنط هوه اللى حصل ومات اذاى دا ياعينى قالتلى : ابدا يابنتى دا هوه ولد عنده عشر سنين وبيشتغل فى الورشة بتاعت العربيات اللى ورا هناك , والورشة فجأة ولعت والولد فيها والراجل الميكانيكى كان قافل عليه الدكان ال يعنى نوع من العقاب , وفى اقاويل تانى بتقول ان الدكان كان مفتوح عادى والولد كان بيشتغل لما النار جت فى الدكان وماعرفش يجرى, ............. , .............. ، ايا كان السبب انا واثقة إن دا قدره , طبعا وانا رايحة كانت الزحمة رهيبة على الولد , لكن لما رجعت لقيت مافيش بنى ادم هناك خالص , والولد محطوط وفوقه جراااااااايد وتلت مراوح وباباه واقف على الرصيف التانى مابيتكلمش , ماخلاص الشكل اصبح بالنسبة للناس معتاد والناس بقت بتعدى من الشارع وبتبص للولد الميت زى بالظبط اى ورقة واقعة فى اللارض , مش دا موضوعنا موضوعنا دلوقتى مين المجرم هنا ؟؟؟؟؟؟؟؟؟؟

زى مانا متأكدة إن دا قدره انا متأكدة برده إن والده هوه اللى قتله , مش قتله لما اتحرق , لأ دا مقتول من قبلها , قتله يوم ماقتل البراءة اللى فيه , يوم ماقتل طفولته , يوم ماخلى واحد مالوش لزمة يعاقب ابنه ويحبسه , يوم ما التانى خلى واحد برده مالوش لزمة يخنق ابنه بالسلك , وفى النهاية انا مش عارفة اوصف الحزن اللى جوايا بس اتمنى يكون وصلكوا جزء منه

Saturday, July 21, 2007

هييييييييييييييييييييييييييييه دونيا



بس بجد كانت سماح جميلة اوى برغم الكسوف والقلق وخصوصا لأنها بقالها شهر تقريبا عمالة تكون فى الشقة والاثاث,, ومانمتش , شوية وجيه وقت السلو , بجد احسن رقصة سلو شفتها فى حياتى واهى مش مترتبلها , كانوا محتاجين اوووووووووى يبصوا فى عيون بعض , كانت محتاجاه يكون جنبها وهوه كان عايزها تبقى بتاعته ، فعلا رقصة السلو حكت عن سنين حب طويلة بين اتنين ، لمجرد إن واحدة من اللى واقفين حطت الطرحة عليهم كأنها بالظبط عزلتهم عن العالم الخارجى اشتغلت اغنيتين سلو ومافيش اى حد من اللى واقفين حس من كتر الاحساس والقلوب الحمرة اللى كانت بتطلع منهم , كل حد فيهم بيبص على السحاب اللى جوة عين التانى زى مايكون بالظبط فى ورقة ادامهم وفيها خط صغير اوى وبيحاولوا يقروه , ومش عايزين يرمشوا خالص علشان مايضيعوش اللحظة الجامدة دى

وف النهاية راحت سماح وبجد فعلا كنت عايزة اعيط لأنى هافتقدها جامد , كانت عمالة بتبصلى
اووووووووووى كنت حساها فعلا نفسها تحضنى ، لما اتلفت عنها لقيت ناس كتير بينادولى لأنها عايزانى رحت روحتلها حسيت فى عينيها دموع مش راضية تنزل , حاسة انى بافكرها بايام ماكانت مش شاية مسئولية اى حاجة , ايام ماكنا مابنقعدش ثانية فى الكلية من غير ضحك ، ايام ماكانت الحياة وردى , حسيتها عايزة تقولى ياترى الدنيا شيلالنا ايه ؟؟؟ , وطبعا حضنتنى اوى , وبرده سالتنى الميك اب مظبوط ولا لأ ؟ ونادت لأخوها وقالتله سماح معاك , وكانت دى اخر كلمة سمعتها منها وعلى طول العربية جريتتتتتتتت

عارفة انها مش اخر كلمة هاسمعها منها فى حياتها إن شاء الله , بس على الاقل اخر كلمة سمعتها منها وهيه زيى مش ام ومش زوجة ومش ربة منزل , بجد اى ميس هير

Friday, July 13, 2007

تاج واتحدف عليا


حدف عليا التاج دا , وبما انى استاذة فى الاجابات الدبلوماسية البحتة وباعرف اهرب اووى من الاسئلة الجامدة فقررت انى افحمه بإجاباتى العظيمة :-




السؤال الأول : أنت مين؟؟؟
سماح , خريجة كلية ألسن اى اس ايه ، بحب اللون الروز واللبنى جدا ,حتى لون الحيطة فى اوضتى روز والوان مفارش السرير كلها لبنى

السؤال التاني : مين أكتر 6 أشخاص بتحبهم ؟
السؤال دا رخم اوى , اكيد يعنى افراد اسرتى الخمسة وريرى وايمان ومنى صحابى _ معلش نمشيهم تمانية ومعلش ضيف عليهم اى حد اثر فيا اكيد هاكون بحبه

السؤال الثالث : أنت سعيد ؟
بوجه عام (جينرال يعنى) اه سعيدة جدا وراضية اوى عن نفسى , لكن لو بنتكلم عنى حاليا فلأ , يعنى بمر حاليا بحالة انحدار نفسى بس على امل انها هتنتهى قريب اوى إن شاء الله

السؤال الرابع : لو أجتمعت أنت و حسني مبارك في أوضه واحده
هتعمل ايه؟؟

هلبس كلاسيك وهحط وردة فى جيبى اليمين , بس وردة بيضة فاحمر فاسود وجواها نسر


السؤال الخامس : لومعاك نص مليون جنيه هتعمل بيهم إيه ؟
هاعمل مشروع خيول انا اموله واختى اللى هترعاه


السؤال السادس : بتحب مصر ؟
بحب اللى ليا فيها , يعنى لو اخدت كل اللى ليا ورحت اى مكان تانى مش هتفرق (اللى ليا يعنى اللى بحبهم )


السؤال السابع : بتحب البنات ؟ { هذا السؤال يتحول إلى الثامن : بتحبي الولاد في حاله لو أن المجيب أنثى
عادى يعنى الولاد زى البنات بالنسبالى , فيهم الحلو وفيهم الوحش فيهم اللى يتحب وفيهم اللى يتكرهه


السؤال التاسع : مسلم ؟
ج : الحمد لله على نعمة الإسلام وكفى بها نعمة
ليه ؟؟؟؟
اتولدت لقيتنى مسلمة ولما فهمت لقيتنى ماكانش ينفع غير انى اكون مسلمة


السؤال العاشر : مين أكتر شخصيه ما تقدرش تستغنى عنها في حياتك ؟ و ليه ؟
مين :: متهيألى اميرة اختى , وناس كتيرة تانى بس المطلوب شخصية واحدة
ليه :: علشان اميرة قالتلى انها هتشوفنى فى مرتبها الجاى ( وش محول ) , لون هتكلم بجد بقى ليه اميرة ؟ يبقى علشان هيه اميرة .
وطبعا بالاضافة للشخصيات اللى فوق التمانية اللى قولتهم قبل كدة , وشوية مدونين كدة


السؤال الحادي عشر : إيه أكتر موقف محرج تعرضت له في حياتك ؟ و أتصرفت إزاي ؟
هههههههههههههههههههههههههههه , انا اكتر واحدة اتحرج فى الدنيا ، عموما فى حياتى اكتر موقف محرج : كنت فى مرة ماشية انا وصحبتى فى اولى ثانوى ، وكان فى حفر فى الارض علشان بيرصفوا الشوارع , رحت انا واقعة فى واحدة عميقة جدا ، ويارتنى وقعت واقفة ، لأ وقعت جوة الحفرة كمان , وصحبتى مش عليها غير انها تضحك على منظرى ومش قادرة تتحكم فى اعصابها علشان تقومنى , وانا برستيجى اتفرتك خالص , واتصرفت بان صحبتى دى قومتنى بعد لما بصتلها بصة واحدة متنرفزة وهاطق



لسة بقى حاصلى امبارح كام موقف محرج كدة حلوين : بسأل واحد هوه مينى باص كام بيروح عين شمس راح ماسمعنيش وكمل مشى طبعا بصيت على العصافير فوق علشان مااعيطش من الكسفة
, وبرده كنت بامد اوى وشوية عيال لا يقال عليهم سوى ( زبالة ) بيعاكسوا ,رحت قعدت امد اكتر رحت واقعة على وشى راحوا قعدوا يضحكوا اوووووى , اتصرفت اذاى : انى قومت ونفضت هدومى وفعلا دمى اتحرق , و عيطت لما روحت ,
وموقف تالت حصل برده امبارح انى ركبت المينى باص وكنت حاطة الموبايل فى جيب البنطلون وبابا كان بيطلبنى (وصوت الموبايل عالى ) وانا قاعدة عليه عاملة نفسى مش واخدة بالى , اصلى مش هينفع اقوم واروح جيباه من جيبى والناس كلها بتبص عليا , راح واحد قايل ياجماعة لو سمحتم بلاش الصداع دا على الصبح , وانا ولا هنا , ال يعنى مش بتاعى ، جيت وانا نازلة راح رن تانى بقىىىى منظرى وحش وحش وحش يعنى


السؤال الثاني عشر : إيه الأمنيه إللي بتدعي ربنا ديماعلشان يحققها؟؟
ذى اى بنت اتجوز واحد بيموت فى دباديبى واجيب اولاد سكر زيى تمام ونعيش فى شقة ربنا راضى عن
كل اللى تحت سقفها
انا هحدف التاج دا على :

Tuesday, July 3, 2007

كل يوم رز كل يوم رز ___ دى مكرونة ياحبيبى __ كل يوم مكرونة كل يوم مكرونة

هانجيب اليوم من اوله


الساعة 12 وخمس دقايق بالليل
انا قاعدة على الجهاز وصوت بابا جاى من الاوضة اللى جنبى

بابا :: ياااااااااااااااااااااااااااموحة ، يلا اقفلى الجهاز دا بدل مااجى اخلى اكبر حتة فيه اد الفسفوسة اللى طلعالك فى وشك

انا :: حاضر يابابا انا قايمة اهوووووووووووووووووووووووووووووووووووووووووووووووووووووووووووه


اقوم طبعا بس طول الليل مابيجليش نوم لغاية الفجر ، وبعد الفجر اقوم رايحة فى النوم بغباء , وتيجيى ماما نازلة المدرسة الساعة سابعة تقعد تنادى عليا
ماما :: ياموووووووووحة ياموووووووووووحة ، انتى يابنى ادمه
انا :: نعم نعمممممممم
ماما :: اول لما شريف يصحى ابعتيه يجيب عيش ، ماتنسيش تخدى العلاج اللى على الريق , وافطرى ,وماتكليش لنشون دا بتاع اختك ، انتى لو كلتى هتعيي تانى , كلى جبنة رومى , ولو ولاء طلبتنى خدى منها معاد علشان هنزل معاها ، ولو...... ولو........... ولو
انا : حاااااااااااااااااااااااااااااااااااااااااااااااااااااااااااااااااااضر
ماما : سلامو عليكوا
انا : يعنى هوه انتى لازمى تقولى حاجة يبقى ليها رد ياساتر, عايزة انام بقىىىىىىىىى ,عليكم السلام ورحمة الله وبركاته


الساعة بقت 12الصبح
الموبايل بيرن , هيه صورته ، اه هوه بابا بعينه


بابا :: ايوة ياموحة انتى لسة ماصحتيش ؟؟؟ طب يلا فوقى بقى وقولى لسارة توديلى القميص والبنطلون للمكوجى
انا :: طب بابا انت وعدتنى هتجبلى جمبرى
بابا :: اقفلى وعايزة حاجة كلمينى من رصيدك انتى


الساعة بقت 12 ونص
المفروض انى هتجول فى الشقة علشان اشوف هابدأ بانهى أوضة
وطبعا الباشا شريف قاعد فى البلكونة ومشغل الجهاز وعايش


انا :: شريف أرفع رجلك المبجلة علشان امسح تحتها
شريف :: خلاص يعنى مش هينفع البلكونة تبقى اتنضفت من غير رجلى
انا :: ماهو ينفع لو كان مقاس رجلك 30 أو 38 لكن دى باين خمسين ياشريف , بص واخدة مساحة اد ايه؟؟

وتدور خناقة طويلة عريضة طخينة بينى انا وشريف وف الاخر
تنتهى بانه مش هيشيل رجله دى لأ وكمان هينزل الرجل التانية اللى كان تانيها فوق الكرسى

وطبعا انا باخلص الشقة كلها كنس ومسح وتنفيض من 12 ونص لغاية 3 ونص

وفى النص كل شوية كدة اخدلى خمس او عشر دقايق نت وبعدين ألاقى اميرة داخلة

عليا وبتجرى علشان عايزة تلحق تنام نص ساعة بعد لما رجعت من التدريب

علشان تنزل الصيدلية بليل

اميرة :: ازيك ياماحة , امسحى ياأروبة
انا :: تعالى اعمليلك حاجة معايا كدة ربنا يباركلك
اميرة :: مانا هنزل الصيدلية ومافيش وقت
انا :: ماطبعا البلية بتلعب معاكى , والساعة بخمسة جنية والحسابة بتحسب

ولسة هاقعد استريح ألاقى القمر الصغير ((ساااااااارة))جاية ناحيتى ومعاها جزء القرأن

سارة :: ياماحة يلا علشان تسمعيلى
أنا :: انا مش قولتلك سبعين مرة تقوليلى أبلة
سارة :: أبلة ماحة
أنا :: اتفضلى قوليها عشر مرات
سارة :: أبلة ماحة , ابلة ماحة , .................أبلة ماحة

اقعد اعانى مع سارة احفظها لغاية لما العصر يأذن والهانم تنزل وانا اصلى , الحمد لله هاقعد بقى على الجهاز ، الجرس بيرن ، هاروح افتح , دا بابا

بابا :: موحة , خدى البطيخة دى اغسليها وورينى تقطيعك الجامد
أنا :: وانا من امتى باعرف اقطع بطيخ يعنى؟؟؟
بابا :: لأ بتعرفى تقعدى على النت بس صح؟؟؟


اخد البطيخة وادخل اقطعها لو فى اى حد على الايميل معايا اقعد اكلمه شوية ا

الحمد لله بابا نام والبطيخة اتقطعت وهاقعد على الجهاز شوية , ويدوب هاندمج اهوه

ألاقى ماما بتزعقلى وبتقولى لما تكلى الأول , طبعا باكل,

واشيل الأكل واعمل شاى , واستنى لما بابا ينزل

ويادوب الساعة بقت 9 بالظبط

من 9 إلى 10 باقعد على الجهاز , وميادة بنت الجيران بتجيلى على الساعة عشرة وربع كدة كل يوم , وبتمشى على حيداشر ونص, ساعات باسيبها ترغى واقعد على الجهاز وساعات مابعرفش انفد منها وخصوصا لأنها بتبقى مستمتعة اوى وهيه بتحكى عن حد معين


الحمد لله ميادة مشيت ، انا لازم امسح بقى فى السريح بالشرشابة (اصلها سريعة اوى وبتساعد على الكروتة جدا ) ، مافيش على 12 إلا ربع باكون مخلصة واقعد على الجهاز لغاية 12 عوقبال لما بابا واسمع صوته جاى من برة بيقولى اقفلى الجهاز بدل مااخلى اكبر حتة فيكى ادالفسفوسة اللى فى خدك الشمال, واروح للسرير ولغاية الفجر ما يجليش نوم وبعد الفجر انام بغباء



الاهم من دا كله انا بافتح النت اليوم كله كدة على ايه ،

باكون فاتحة ادامى صفحة البلوج وصفحة منتدى وصفحة الاخبار الالمانى والياهو , ال ايه عمالة بابعت لشركات كتيررررررررر جدا باحاول اطلب تدريب مع اى حد ومستنية حد واحد بس يبعتلى يقولى تعالى اتدربى وياريته نافع , اومال لو قولت هاشتغل هيعملوا ايه


هيه دى حياتى من تانى يوم اخدت الاجازة فيه ,, مملة جدا ,, شغالة اروق وانضف واتخانق مع البيت كله وابعت ميلات اشحت تدريب , روتينننننن بايخ ومعقد وفاشل , ماما بتقولى انى ديما وانا صوغيرة كنت لما اتخنق اروح ماسكة الشقة كلها ترويق لغاية بليل خالص لما الناس تنام ، وبعدين اروح داخلة البلكونة واقفة كتيررررر مع نفسى وألبس الطرحة مع إن الدنيا ضالمة واستحالة الناس تكون صاحية واتكلفت فيها أل يعنى هيه اللى هتحمينى من الدنيا دى وهيه اللى هتسمعنى وانا باشكى همى , فعلا هيه دى حياتى دلوقتى ، بس ناوية إن شاء الله اغيرها ، انا عمرى ماكنت عايشة من غير هدف كدة ، اه ممكن اكون عمرى فى حياتى ماحددت هدف وجبته لكن على الاقل بيبقى عندى اهداف وبحاول اوصلها ,,,,,,,ومن مكانى دا وف الساعة دى باعلن عدم خضوعى واستسلامى , وهاحاول ابقى مترجمة اد الدنيا وهاعدى من باب الوزير تانى , والله المعين