حقهم متاكل ياعينى

رمضان بالنسبالى كان عبارة عن فانوس

نحط الفوانيس كلها فى النص ونقعد نلف حواليها

كنت باتبهدل علشان كنت صغيورة

كل العيال الشريرين كانوا بيدوسوا على رجلى

بس كنت بابقى فى قمة السعادة

ونقعد نلف ونلف ويدوسوا ويدوسوا ونغنى ونغنى ونسقف ونسقف

ونعد واحد اتنين تلاته وكل الفوانيس تتفتح فى وقت واحد

لغاية ما ام احمد تتخنق مننا وتقوم جايبه جردل المية وحدفاه علينا

ياعينى على اطفال اليومين دول

غلابه .. حتى فوانيسهم هيه اللى بتغنى كأنهم عندهم شلل فى لسانهم مثلا او مش هيعرفوا يغنوا

والفوانيس مابقتش فوانيس .. دا فانوس على شكل توكتوك وفانوس كرومبوا وفانوس مش عارف ايه

حتى العليقة اللى كنا بنمسك منها الفانوس بقوا ينسوا يحطوها

واهاليهم خايفين عليهم ينزلوا علشان الدنيا مابقتش بخير

ايييييييييييييييييييييه فين ايام زمان
:)

Try to be in the same direction

كل واحد فى طريق

دا رايح شمال ودا رايح يمين

وكل واحد رافض يروح فى نفس الاتجاه بتاع التانى

رغم انه محتاج يروح

بس بيقاوح

(هيه دى الحياة وهما دول البشر )ه

GREAT FEELING

باحس إن

قلبى بيتغسل فى رمضان

بلاااااااااااش

ممكن يادنيا اطلب منك طلب
:
:
:
بلااااااااااااااااااااااااااااااااااااااااااش
:
:
:
بلاش تخلينى اطلللللللللع لفوق وتوقعينى تانى

ماتدوقنيش طعم النجاح طالما هافشل تانى

ماتفرحنيش طالما الحزن مستنينى

بلاش اوصل لهدفى واشوفه بعينى طالما هدفى هيسيبنى ويمشى

وماتخلنيش انسى الوحدة والظلمة وترجعى تقعدينى فى اوضه ضلمة لوحدى

بلاش يادنيااااااااااا

لأنى متأكدة انى هارجع تانى لنفس النتيجة ونفس النهاية

بس الفرق انك يادنيا ماكنتيش بتعشمينى

فرضتى عليا الوحش واتأقلمت عليه

ماتخلنيش بقى اشوف الحلو واعشم نفسى تانى بيه

طالما النتيجة واحدة ومعروفه يادنيا

:)

منقوش جوايا

اهه مش عايزة تدريس تانى

مليت منه ومابقتش حباه

بس لما قعدت فكرت مع نفسى وكالعادة رجعت بالزمن لورا

افتكرت انى كنت باصحى الساعه سته الصبح

الصحيان بدرى كان بالنسبالى مشكلة ... بس كان شعور تانى لما استعيد قوايا والبس وانزل استنشق اول حبة هوا فى اليوم قبل مايتلوثوا

واقول اذكار الصبااااااااح ... كان شعور تحففففففه

وكلمة مس برده اللى كنت باسمعها من العيال وحشانى

واحشنى اوى الطابور بتاع الصبح لما كنت اقف باصه على كل ولادى يقوموا يظبطوا طابورهم ويتعدلوا ويقفوا زى المسطرة

كانوا بيصعبوا عليا لما تمارين الصبح تزيد عليهم وخصوصا فى اوقات الحر والشمس

فاكرة التمارين بتاعتهم تمرين تمرين

فعلا الولاد دول سابوا اثار وعلامات جوه منى

وحشنى برده لما كنت اقعد برة الفصل احضر الدرس

وياه بقى لما كنت بابتكر طرق لشرحه .. طريقه تكون لعباقرة وطريقه للفصل التانى اللى تقريبا نسيوا عقلهم فالبيت وجايين باجسادهم بس

كنت بابقى فى منتهى السعادة لما اسألهم فى الدرس القديم قبل ماابدأ ويسمعوه حلو اوى ,, واسألهم فالجديد بعد مااشرحوا والاقيهم بيشرحوا بطريقتى

مش نسياهم لما كذا مرة حصة الالعاب اتلغت من عليهم وقولتلهم لو اتظبطتوا الحصة دى هنلعب فى الفصل فى حصة الالعاب بتاعتكم ومش هناخدها شرح

ساعتها كان عندهم حماسسسسس ماتوقعتش انه يطلع من اولاد فى سنهم

ولما جينا نلعب وقولتلهم يقلدوا المدرسين ... كانوا بيقلدونى كما انا بالظبط .. حافظين اللزمه بتاعتى وطريقة شرحى بالانجلش وحتى نطقى كانوا بينطقوه زى بالظبط ... ودا اسعدنى والحمد لله

بافرح اوى اما باعرف انهم سالوا عليا بعد مامشيت

ولما بيقابلونى بالصدفة فى الشارع ويجوا يسلموا عليا .. مابيخبوش وشهم زى ماانا ياما عملت فى مدرسينى زمان

اهه التدريس متعب وشاق ومليان ناس مابتقدرش

بس انا بجد باحمد ربنا على تلت سنين من اجمل سنين حياتى

وباشكر الفرصة اللى خلتنى اضيف لذكريات حاجة جميلة تعلم فى شخصيتى كده

:)

:(

اللهم لا اعتراض