لقيت بنوته عسوله صغيره عماله بتمد ورايا , وانا بامد علشان متأخرة , ولقيتها بتقولى :
ميسسسسسسسسسسسسس سماح
بصتلها وقولتلها :
نعم ياحبيبتى
قالتلى : اتفضلى
ولقيت فى ايديها ورده حمره رائعه , وماسكاها ومحافظه عليها اوى
المهم اخدتها وقولت للبنت :
ايه الجمال دا ؟
دى جميله خالص
بس انتى تعرفينى من فين؟
ضحكتلى ولا كأنى سألتها فى حاجة
ولأنى كنت متأخرة
رحت سيبتها وكملت مد ,
وحطيت الورده ف جيب الشنطه ,
بس فعلا شعور عسول اما ابدأ يومى بورده جميله كدة
__________________
انهارده راقبت ف لجنه بتاعت عيال ف تانيه ابتدائى
فعلا عيال يشلوا القرد
العيال مش مستوعبين اهميه الامتحان
اكتر واحد فيهم كان حريص على حل الامتحان ماقعدش خمس دقايق على بعض
وطبعا البهوات خلصوا وعايزين ينطلقوا داخل لجنة الامتحان
والمشكله انى مش عايزة ازعقلهم لأ نى انا شخصيا زهأت ومليت من اول خمس دقايق
غير انى ازعق لو حد بيغش , لكن دول اصلا مش بيفكروا يحلوا
طبعا ف الاول كنت صامده شويه وقعدت اقول :
بس يابابا
بس ياحبيبى
ماتلعبش بالقلم يابابا
اقفل المقلمه دى ياحبيبى
كفايه تحريك ف الدسك يابابا
كفايه لعب ف الكوتشى ياحبيبى
ماتبصش وراك يابابا
بص اودامك ياحبيبى
بسسسسسسسسسسسسسسسسسسسس
زهقت
المستر بقى اللى كان واقف معايا كمل بعدى :
بس ياولا
بس يابابا
نام على الدسك يالا
مافيش حمام يابابا
خرج الشنطه دى يالا
هات القلم دا يابابا
بسسسسسسسسسسسسسس
واول ما فات النص ساعه , اللجنه بقت مراجيح
لأنى قررت انى اسيبهم يعيشوا حياتهم ف اللجنه
وغالبا دا برده كان رأى المستر
لأننا زهقنا فعلا منهم
طبعا عيل واقف
وعيل قاعد
وواحد يروح يفتح الشنطه بدون ادنى استئذان
ويجيب منها بسكوت
وياكل ويعزم على صحابه
وواحد تانى ماسك المقلمه وشابك فيها الاقلام
بقوله هوه ايه دا
قالى طياره ودول كأنهم الركاب
قولتله اه بس دول غالبا هيقعوا
راح هزلى دماغه كأنه بيسكتنى علشان عطلتله اللعبه وطلعت عبيطه باين
وواد تانى غبى قفل السوسته بتاعت الجاكت
لغاية زوره ومش عارف يفتحها واتضايق منها وبدأ يعيط
طبعا توجهت عليه
واجيبها شمال اجيبها يمين
مش راضيه تتفتح
قالى خلاص بقى اقطعيها
ماعرفتش حتى اقطعها
طبعا ف الاخر سلطته على المستر اللى معايا , واللى كان مشغول ومنهمك جدا ف الموبايل
قولتله يلا على عمو ياحبيبى يعملهالك
الواد يقوله ياعمو
والتانى مشغول ف الموبايل وبيشاورلوا بأيده علشان يستنى
لكن على مين؟ دا انت وقعت ف عيال مابتسكتش
المهم الواد راح مقرب منه اوى وهاتك ياعياط
راح قافل الموبايل
وقعد يعمله ف السوسته
لغاية ما اتقفلت والحمد لله
وراح باصص للواد وقاله مايجيبها إلا رجالها
الواد طبعا باصصله وهوه مش فاهم حاجة
وفى ظل كل هذه الفوضويه
بابص ناحيه الكورنر بعيد لقيت ولد نايم
, اقسم بالله رايح ف النوم جداااااااااااااا
رحت علشان اصحيه صعب عليا
بريىىىىىء جدا
ولقيت ورقته محلوله كلها , قولت بس يبقى هوه انجز عمله ونام
مالوش لزمه اقلقه
المهم ان كل واحد كاتب اجابه غير التانيه
انا ماقرأتش الاسئله اصلا
بس الاجابات غير بعض تماما
عالم اطفال اطفال يعنى
