( انتى اصلك فاشلة واخرك تسرحى بقرطسين طعميه )
الكلام دا كان متوجه ليا وانا فى اولى اعدادى من ميس فايزة مدرسة اللغة الانجليزية , لانى ماكنتش باخد عندها درس ولا مجموعة ورغم كدة كنت شاطرة
انا فاكرة اوى لما كانت بتقرأ قطعة وعدت عليها كلمة ما , وقعدت تسأل العيال كلها عن معناها لغاية ماجه الدور عليا وجاوبتها , راحت قالتلى ماطبعا متظبطة ف الدرس وبرده هتتضربى , ماكنتش بتقومى اقرأ ابدا رغم انه على ايامى كان احوج سن للقراءة , لانى كنت واخدة الانجلش من رابعة , كانت بتتعمد ف خلق طرق لإحباطى
داااااااااااااااااااااااااااااارت السنين , وجه اليوم اللى الاقيها جايالى تقولى بنتى بقى معاكى فى سته اول وممتازة خليلى بالك منها , قولتلها طبعاااااااااا ف عنيا , بس من جوايا شايلة منها اوى , سته ابتدائى يعنى على ايامى بتساوى اولى اعدادى يعنى نفس سنى ساعة لما كنت تحت ايديها
ورغم ان سته اول فصل متفوقين وبنتها مش نفس مستواهم إلا انى حسيت انى مش هينفع اخدها بذنب مامتها ابدااااااااا
ومن مكانى دا بعلن فشلى يامس فايزة فى تسديد الدين لأنى مش كدة وعمرى ماهكون كدة ابدا
