القطة عايزة تصاحبنى

زى كل يوم صحيت متأخرة , وانا مخنووووووووووووقة اوى من الروتين اليومى اللى ريحاله , افتح الدولاب وعين مفتوحة والتانية مقفولة زى ماتكون رافضة الوضع اللى اتحطيت فيه , طلعت التونيكات اللى حيلتى كولها , والكام سويت شيرت , وابتديت ارجع بالذاكرة لأودام علشان افتكر انا كنت لابسة ايه امبارح , لحسن يحصل لبس وألبس نفس الطقم بتاع امبارح والناس تقول ماعنديش لبس ولا حاجة لاسمح الله





ظبطت نفسى واخدت سندويتشاتى وموبيلاتى وسلطاتى وبابا غنوجاتى وتوكلت على الحى الذى لا يموت , فتحت باب الشقة وقولتلهم سلامو عليكم , اه مانا رايحة اطبق الروتين









بس فعلا سبحان الله اليوم دا كان غريب غير كل يوم , اول ماخرجت شميت ريحة
النسيم جميلــــــة جدا زى مايكون بقالى زمان مااتنفستش , ويااه بقى لما قولت دعاء الخروج حسيت راحة غريبة رغم انه بيتقال كل يوم , بقلب فى الشنطة علشان ادور على الساعة علشان ألبسها واظبط نفسى على تلت دقايق علشان ابقى اودام باب المدرسة , لقيت نعناعاية ( هولز) , كلتها وياااااااااه على متعة الانتعاش , انا فى وادى والخلق المتأخرين على اشغالهم ومدارسهم دول كلهم فى وادى تانى خالص , عبده الرايق رايح الحديقة ( دا اللى هوه انا ساعتها ) ههه


دا كله كوووووووووووم والقطة الغريبة اللى طلعتلى كوم تانى خالص , وانا ماشية ومستمتعة اوى بالنعناعاية الاقى قطة بيضة فى رمادى فاتح , وصوغيرة خالص عدت ادامى ببطأ يستفز القرد السرحان , مش هاكدب واقول انى شجيع السيما وما بخافش من القطط , لأ اطلاقا انا اودام القطط باتحول لفار بعون الله , بس القط دا كان حاجة تانية بجد



المهم القطة بقت تيجى من ناحية اليمين لناحية الشمال ادام رجلى بالظبط وتلاعب ديلها وكأنها مستمتعة اوى باللعب ادامى , وتستنى اما امشى كمان وتروح جاية من الشمال على اليمين برده ادامى , قعدت تعاكسنى كدة على طول الشارع والشارع بصراحة كان طويل جدا , بسببها ماحسيتش بطوله خالص , بس مرة واحدة رحت اتزعرت وخفت لتكون شوشو

ش (شيطان يعنى ) , قعدت امد اوى رحت خبطها فى رجلى , طبعا القطة اخدت منى موقف وماشفتش ديلها اللى كان بيتمرجح ادامى دا تانى





طبعا لا ربع يوم يشغل تفكيرى ولا بتاع , كل اللى كان شاغلنى القطة دى , وطلعت على الاوضة وانا فرحانة اوى وبدأت حديثى بجملة ( انا حصلى انهاردة حدث غريب اوى ) على امل انى الاقى ودان مفتوحة وعيون مبرأة , لأ إطلاقا استهونوا بكلامى وخصوصا بعد لما سمعوا حكاية القطة , وف الغالب قالوا فى سرهم دى عبيطة دى ولا ايه


اليوم اللى بعده خرجت تانى جرى على المدرسة ونفس القطة وف نفس المكان قعدت تلعب معايا برده رغم انى كنت لابسة غير اليوم اللى قبله تماما , لا نفس اللون ولا نفس الاستايل ولا اى حاجة , جاتنى برده وقربت اول لما شافننى وقعدت تتمرجح طول منا ماشية من اليمين للشمال ومن الشمال لليمين


شعور جميل لما يكون ليك صديق(قط), وخصوصا لما يكون هوه اللى بدأ بالصداقة , صحيح هوه حيوان بس سعيدة اوى بصداقته, عارفة انكم هتقولوا عليا غريبة وهوائية وخيالية ومش منطقية , بس انا فعلا حسيت الشعور دا وحسيت إنى لازم احفره فى صفحات مدونتى طالما كان فى يوم احساس ضمن احاسيسى .

______________________________________________________

التحديث
وانا ماشية اول امبارح ماشفتش القط خالص , واتضايقت جداااااا , حسيت ان فى حاجة منى ضاعت , بس امبارح بس عرفت انه مات لما شفته واقع فى الارض ومليان دم , مش هاقولكم انى فقدت صديق لأن مافيش صداقة بتحصل بسرعة كدة , بس انا حساه كان امل او ابتسامة تفاؤل وجاتلى لغاية عندى وبعدين ضاعت منى تانى

ابكى على ...........................ب

تاج اكتر من رائع

قبل ما نندمج مع التاج الجامد دا , حبيت بس اقولكم عملت ايه فى اليومين دول , علشان كتير دخل يسألنى ويسخر منى , بس فعلا والله عملت كل اللى عايززززززززززاه بغباء خروج وخرجت زيارات وجت , وفرح وحضرت , نوم وصلاة وعملت , كل اللى قولته ماعدا قليل جدا اللى ما اتعملش , بس المشكلة انى لما نزلت بقى تانى يوم بعد الاجازة الجامدة دى , حسيت انى زى مايكون حد حدف ظلطة كبيرة على دماغى , كنت بحلم وفوقت , مااستسلمتش للواقع بسهولة رفضته شوية بإنى صحيت متأخرة , وللأسف جه على دماغى انا , وبدل ما اتخصملى ربع يوم اتخصم نص يوم , بس فعلا كانوا يومين سكرررررررررررر , يكفى انى كلمت ريرى مرتين , اللى مابعرفش اعثر عليها ابدااااااااا , اسبكم بقى مع احسن تاج قابلته فى حياتى البلوجيه


تاج امير الهدوء , ربنا يبارك له


التاج دا مش اجبارى , بس حقيقى لما عملته وتخيلت الاسئلة حسيت احساس تانى , اللى عايزه يتفضله


لو سألك غير المسلم عن نبي الإسلام بماذا ستجيبه في سطور؟

حبيبى , كان الرسول عليه الصلاة والسلام أكرم الناس وارحمهم واصدقهم واكثرهم امانه( الصادق الامين) , كان عادل , متواضع , شجاع ,
صبورررر
كان عظيما كزوج , ورحيما كأب , ومطيعا كعبد , وجميل كشخص







لو أتيحيت الفرصه لرؤية النبي صلى الله عليه وسلم في أي مكان تريد أن تقابله؟

اى مكان هقابله فيه هيبقى روضة







مالذي ستخبره به ؟

هأقوله انى كنت سلبية اوى اوى , ,وإنى كان نفسى ابقى موجودة فى عصره , علشان ابقى بعيدة عن كل الفساد دا









وماذا ستطلب منه ؟

مااعتقدش انى هابقى عايزة حاجة بعد رؤية الرسول عليه الصلاة والسلام غير رؤية ربنا







أذكر مقوله قالها النبي صلى الله عليه وسلم لصحابي تمنيت لو كان قالها لك ؟


مش متذكرة والله اى موقف , بس فى موقف تقريبا كان الرسول عليه الصلاة والسلام بيكلم فيه واحد من الصحابة فى حرب وكان مصاب وبيحتضر وتقريبا بشره بالجنة بس مش فكراه بصراحة مين , فانا طبعا كنت اتمنى انى اكون انا المبشرة بالجنة






أذكر أحب حديث لرسول الله صلى الله عليه وسلم لقلبك ؟


قال رسول الله صلى الله عليه وسلم: "لا يتمنين أحدكم الموت لضر أصابه، فإن كان لابد فاعلا فليقل: اللهم أحيني ما كانت الحياة خيراً لي، وتوفني إذا كانت الوفاة خيراً لي"




قال رسول الله صلى الله عليه وسلم: "ما منكم من أحد إلا سيكلمه ربه ليس بينه وبينه ترجمان فينظر أيمن منه فلا يرى إلا ما قدم، وينظر أشأم منه فلا يرى إلا ما قدم، وينظر بين يديه فلا يرى إلا النار تلقاء وجهه، فاتقوا النار ولو بشق تمرة".


صدق الرسول الكريم

* أذكر صفه تدل على عظيم خلقه صلى الله عليه وسلم والاستدلال عليها بموقف ما ؟


الحــــــــــــــــــــــــــــــــــــــــــــــــــــــــــــــــــــــب ( الرومانسية ) فعلا :
قرأت قبل كدة كتير عن الرسول كزوج , بس من ما قرأت : انه كان من شدة حبه للسيدة عائشة كان بيحرص على الشرب من نفس الجهه اللى كانت بتشرب منها
, وكان ايام حرب ما , بس مش فاكرة اسمها _, تأخر عن باقى الصحابة والفرسان بالفرس مع عائشة ليتسابقا ( يعملوا سباق يعنى مع بعضهم , بيحاول يخليها تستمتع )
, ولما توفى على صدرها
يااااااااااااااااااااااااه اى رومانسية دى بس , وبنقول على اللى على ايامنا دى رومانسية ؟؟؟؟ طب اذاى ؟؟؟

الصبر : الصبر على الجوع ( لما كان بيربط حجر على بطنه من الجوع ) , ( ولما كان مابيرضاش ياكل من التمر اللى ادامه خوفا من انه يكون تمر الصدقة )

الصبر على الشدائد : لما كان فى الاول بيقوم بالرسالة وماكانش فى حد بيسلم , كان ممكن ييأس , دا الواحد لما بيجيى يعمل مشروع ولا يفتح دكان ويقعد سنة مش شغل بيقله , الرسول صبر كتير .

الصبر على البلاء : يوم موت ابنه لما قالعليه الصلاة والسلام فيما معناه : ( إن العين لتدمع وإن القلب ليخشع , وإنا على فراقك لماحزنون وما نقول إلا إن لله وإنا إليه راجعون )

البساطة ( مش بيعقد الامور ) : زى الموقف بتاع الرجل اللى كان عايز يزنى والرسول عليه الصلاة والسلام رد عليه بكلام فيما معناه : لو ترضاه على اختك فانا موافق


هل هناك تأثير لرسول الله صلى الله عليه وسلم على شخصيتك أو حياتك او بيتك إذا كانت الإجابه نعم فأذكر مثالا واحدا لكل منهم ؟

البساطة والصبر , صفاته باحاول اطبقها , بس اكيد مش هاوصل لنفس الدرجة بتاعت سيد الخلق

يومين يادى الهنا

يووووووووووووووووومين اجازة ياخلق , مش عارفة اعمل ايه ولا ايه , حاسة انى لو قعدت ارتب اللى عايزة اعمله فى اليومين دول , عوقبال لما اوصل لأخر سطر هيكون جه يوم الاحد وانزل المدرسة تانى .

المهم انا عايزة اصلى كتيرررررررر , وعايزة انام برده كتير , وعايزة ابات عند تاتا , وخليت ماما عزمت ولاد خالتو , طب مانا كدة مش هاعرف اروح لتاتا .


وعايزة اقعد على الياهو كتير , واتفرج على البلوجات , وعايزة اقعد اعمل دستتين بوستات واحطهم فى الدرافت علشان اما انشغل تانى بالدراسة , يادوب ادخل اعمل بابليش , بوست لمدة يومين بس , ويارب اعرف استمتع بغباء

أكل وفرجة ولا السنيما

مش حرماكوا اهوه من حاجة

بصوا مبدأيا قبل ما البوست يبدأ كدة , ممنوع التدخين , وممنوع الحزن , عايزة ابتسامة من الخد دا للخد دا , البوست مليان صووووور ,

ومليان كلام برده , اللى مصدع ومش طايق يقرأ ما انصحوش بصراحة , وادينى جايبلكم تورت وجاتوهات ,

والمناسبة : علشان افتح نفسكم قبل ما تقروا البوست , كلوا الاول وبعدين ابدأوا قراية :

نبدأ بسم الله :

ورن الموبايل ياااااه دى الساعة بقت ستة , جريت علشان اتوضأ وصليت ولبست بسرعة , جريت على المدرسة , , تأخير ربع يوم ياميس كالعادة , ماشى ياستى احنا مابيهمناش اصلا , احنا واخدين الشغل دا اصلا تضييع وقت , أطلع جرى الاقى العيال قاعدين بينقلوا فى المجموعة اللى انا كتباها من اليوم اللى قبله , والنور مضلم ( مش لأنهم عندهم كآبة وبيحبوا الظلام من دلوقتى , ولا لأنهم رومانسيين , كل الحكاية انهم ما بيعرفوش يطولوا السويتش بتاع النور) , افتح لهم النور , واقولهم يلا بسرعة حلوا اللى على البورد , اقعد اسرح شوية فى الكون والزمن والعمر والبتنجان , وبعدين اتفاجىء بصوت مسح حبل افكارى باستيكة ناشفة , صوت معاذ بيه وهوه بيقولى ( ياميس حضرتك ماكتبتيش التاريخ ) , اقوم اتمختر وامسح التاريخ القديم , واقولهم هوا انهاردة كام ياولاد , ويهز ودنى الوسطى صوتهم وهما بيقولولى انهاردة 6 _ 3 _ 2008

ياااااااااااااااااااااااه معقولة 6 _ 3 _ 2008

انا كنت عارفة انه قرب , بس مش اوى كدة

خلاص يعنى باقى يومين واتم اتين وعشرين سنة ؟؟؟؟ , مش هاقول الزمن جرى

, لأ بس لف واتغير , سبحان الله الواحد كان راسم السنة اللى فاتت لنفسه طريق , ومشى فى طريق تانى غيره خالص , ممكن اكون كنت باتمنى مشوار تانى خالص وحواوات مختلفة تماما , بس لما لقيت نفسى فى الطريق الجديد اكتشفت انه فعلا فيه خير ليا اكتر من اللى كنت عايزاه .كتير اوى من المدونات اللى دخلتها يوم عيد ميلادها كانوا بيكتبوا بالبونت العريض سؤال كدة واتكرر كتير :هوه احنا ليه بنحتفل بمرور عام من عمرنا وبنفرح اوى ؟؟؟؟؟؟؟؟؟؟؟؟؟؟؟؟

اليوم يومى بقى دلوقتى واقدر ارد , بنحتفل باليوم دا علشان ننهى السنة اللى فاتت بكل مافيها بحلوها ومرها , باحياءها واموتاها , علشان هنبدأ صفحة جديدة فى حياتنا , انا باشحن البطرية فى اليوم دا , بأبدأ بطموح جديد بحب جديد , مشاعر جديدة , كله حاجة جديدة.علشان كدة انا فرحانة إن الصفحة الجديدة دى هتتفتح بعد يومين , وبأمل انها تكون احسن , وبالنسبة لطموحى فى السنة الجديدة فهاحتفظ بيها بقى فى الدرافت او ممكن احتفظ بيها فى قلبى وخلاص , ولو حيانى ربنا للسنة الجاية هابقى اقولهالكم , ونشوف حصلت ولا لأ

اما بالنسبة للأحتفال باليوم دا , فمتهيألى إنى لازم هاحتفل بيه مع عالمى الجديد , اللى هما عيالى يعنى, ومضطرة اعرفكم عليهم :

بس قبل ما اعرفكم بيهم هاقولكم جملة عمتو سماح لما قولنالها على بنتها وحشة , قالت بنتى فى عينى احلى واحدة فى الدنيا , لو بضب ومعفنة , وطختوخة , ومناخيرها طويلة , هتبقى ديما فى عينى سيندريلا , مهما شافوها الناس وحشة , علشان كدة اعرفوا انكم مهما شفتوا عيالى دول وحشين فهما فى نظرى : سندريلات و علاءييين الدين:

عالمى الصغير

نبدأ بالجيرلز :

كان فى اليوم دا فى غياب كتير فاكيد مش هما دول بس الجيرلز , وإن كان دول اكتر عيال باموت فيهم .

البويز بقى ( على فكرة انا بحب البويز اللى عندى فى الكلاس اكتر من الجيرلز وباحس إن الجيرلز بيغيروا من الموضوع , بس هاعمل ايه الولاد اشطر ودمهم سكرررررررررررر) هههه

هاعرفكم بقى على اقربهم إلى قلبى , وإن كان اكيد مافيش تفرقة , بس انا باعز اوى الشطار واللى دمهم خفيف













:




:




:




:

اللى على اليمين دا حبيبى حبيبى حبيبى ((( معـــــــــــــــــــاذ ))) , حتة سكرة , باموت فيه , اشطر عندى , عمرى ما فكرت اضربه , يحب اوى اسئلة الذكاء , وفلوسى مخلصاها عليه من كتر ما بيبهرنى باجاباته , بجد ماشاء الله عليه ربنا يباركله , ويارب ديما كدة متفوق , اول لما تبدأ الفسحة , الاقيه نازلى فى مكان اشرافى , وياه لما ميس كدة عندنا قالت ادامه المس بتاعتكم دى وحشة , بكل قوته قالها لأ حلوة , كنت حاسه انه عايز يطلع المطوه ويضربها بيها , لو قعدت اوصف باحبه اد ايه مش هاخلص

اللى على الشمال : دا مارتن نفس مستوى معاذ تقريبا , بس هاااااااااادى اوى وبرده ما باضربوش غير عند الشديد الاوووووووووووى , شخصيته هادية حبيتين مع بعض الانطوائية , فبيخاف يهز معايا باين , بس باموت فى ضحكته البريئة .

اللى تحتهم : الاستاذ حسسسسسسسسسسسسن , ممتاز زيهم تمام , اصل دول اشطر تلاتة عندى تقريبا , بس الباشا حسن بقى شقى اوى اليومين دول وشكله عايز يتظبط , بقاله كام يوم كل لما يشوفنى مش عليه غير جملة :

May I go to the bathroom

لما كرهنى فى نفسى , بس برده باموت فيه

_____________________________

دا بقى محمد خالد , اسماعيل ياسين بتاع الفصل , ولو انى مش بحب اسماعيل ياسين , بس هوه الواد دا عليه حركات وكلام يفطططش من الضحك , لأ وماشاء الله عليه رجولة فظيعة , عمرى ماشفت دموعه بصراحة غير مرة واحدة , والغريبة انى ساعتها ما ضربتوش , انا بس قولتله انا زعلانة منك يامحمد ياخالد , ومنها بحر دموع , باضربه بالخمس عصيان ,وبيعمل نفسه بيضحك مع انى بابقى عارفه انه بيتقطع , عثل ياولا ياحمادة والله

دى باقى الصور :

وبما إن الموضوع دا مليان صور فبالمرة هاحطلكم صورة نور بنت عمتو , اللى كنا بنقولها عليها وحشة :

:

:

:

الصور دى فى مراحل مختلفة من عمرها ههههههه

ماتنسوش الهدف الرئيسى من البوست , انكم تقولولى كل سنة وانتى طيبة

ذكريات

بقالى زمن مابقلبش فى المواضيع القديمة بس جيت بالحظ كدة بابحث فى جوجل عن اكلة معينة , وباقلب فى الصفحات لقيت لينك كدة انا عارفاه دخلت عليه وفطست من الضحك , جايز ما تضحكوش زيى علشان انتوا مش فى الموقف , بس عارفين لما يكون حد عمال بيسرد عليك الذكرييات مش بتفاصيلها لأ بفتافيتها فتفوتة فتفوتة , قعدت اضحك اوى لما قريت البوست دا , مقارنة باللى انا فيه دلوقتى ,

ملحوظة: البوست دا كان فى اجازة اخر السنة اللى فاتت ,وبالتحديد من سبع شهور فاتوا , بس فعلا كل حاجة اتغيرت , دا حتى اخويا ابو رجل مبجلة سافر , فعلا ممكن نقول حياتى اتغيرت 360 درجة بعد الشغل :

دوسوا عليه وماتخافوش :

اضغط

ماى هوبيز

دا مش تاج دا عصررررررررر , اللى هيقرااااه هيعمله عنده

, ايوة شمعنة انتوا تعرفوا كل حاجة عنى ,

تاج ماى هوبيز (اللى حساها بتعملى محضر)ه






اسمك؟
سماح
و تقدر تقول ميس سماح



اسم الدلع المشهورة بيه وسط أصحابك؟
يعنى فيه بيقولولى موحة كتير , وفى بيقولولى ياصغيرة ( لأن شكلى بابى فيس حبيتين) بس تقريبا





كنت طالب شاطر في المدرسة؟

فى الابتدائى : مش اوى
فى الاعدادى : اااااااااااااااه ممتازة ابتديت اعتمد على نفسى بعيدا عن مامتى المدرسة
فى الثانوى : اه كنت شاطرة بغباء , وكنت معروفة اوى للمدرسين , كنت فى ادبى ,انا واتنين تانيين بس اللى كنا جايبين فوق التسعين ايامها وكنا حاجة غريبة جدا بالنسبة للفصل
الكلية : إطلاقا ماكنتش اعرف معنى الشطارة , يعنى كباقى الطلاب المكبرة جيد واقلب




مجال دراستك.؟

ليسانس الألسن جامعة عين شمس قسم ألمانى ولغة تانية انجلش





ايه كانت أحب مادة ليك في المدرسة و الكلية؟

فى المدرسة حبيت علم النفس والالمانى جدا
فى الكلية : كنت باحب المادة على حسب دكتورها




كنت عايز تطلع ايه و انت صغير؟

حاجات كتير دا انا عملالها بوست خاص , بس اللى كان غالب يعنى صحفية





اسم مدونتك؟

(((((((((((زى الهوااااا ))))))))))))))))





لماذا اخترته؟

برده عاملة بوست كامل عن اسم المدونة ,اول بوست خالص فى البلوج , باختصار لأن اللى بحبه زى الهوا

و ما هي نيتك من اختياره؟

زى ما اى واحدة بتحب دايما يبقى اسم حبيبها اودامها , انا بحب اسمه يبقى ادامى علشان افتكره باستمرار





صورتك في المدونة ... رمزيتها؟

صورة بنت رقيقة وسكر , اما باشوفها بافتكر عيالى فى المدرسة, ساعات بافتح البلوج بس علشان ابص عليها





هل فكرت في اغلاق مدونتك؟

اه , كتيرررررررررررررررر





والسبب؟
لما نفسيتى بتبقى تعبانة اوى , وماباحسش انى عارفة اعبر بالكتابة , بابقى متضايقة جدا من المدونة , ومش بس عايزة اقفلها لأ كمان اولع فيها , لأنى ساعتها باحس انها مش بتقوم بوظيفتها , بس هيه ساعات بتساعدنى جامد فى انى اخرج من مودى لو متضايقة





لماذا دخلت عالم التدوين من الأساس؟
ههههههههههههههه كنت باشوف مدونة مشمش وباحسده عليها جدا , ولقيت ريرى هتعمل مدونة جديدة ليها , حتى ساعتها باين كنت باسألها هيه بتعملها اذاى وقعدت تتريق عليا وقالتلى ابعتى جواب لنقابة المدونين واعملى طلب بعمل مودنة والغريب انى صدقتها , فلاحين بلدنا بقى , بس لما عملتها ساعتها عملت البوست بتاع زى الهوا وكنت فاكرة إن ماحدش يقدر يشوفه غير انا بس واى حد هاسمحله , بس فوجئت بناس كتير كدة معلقة كنت هاعيط , واقعدت اقول دى خصوصياتى , بس بعد كدة فهمت انه مكان جميل للتعبير اللى بالداخل مع مشاركة الاخرين لك احساسك

أحلى جملة قيلت لك في وصف مدونتك؟

اخر بوست فى ناس كتير قالوا جمل عجبتنى , بس احلى تعليقات اللى مش بس بتعجبنى لأ كمان بتبهرنى هيه تعليقات ماى هوبيز بتخلينى اقف ادامها كدة شوية , وفى برده تعليق زمان كان من واحدة مش معروفة ومش عاملة بلوج , قالتلى انا مش عاملة بلوج بس فعلا متابعة بلوجك وكل بوست فيه وقعدت تتكلم عن البوستات برده عجبنتنى , وفى بقى تعليق قشعرنى جدا بس هوه ماكنش فى وصف بلوجى كان تعليق على بوست اهوه :

رئيس جمهوريه نفسى said...
واللهى لو فى يوم كان الى درسى انجليزى اتعامل معانا زى ما انتى بتتعاملى مع الاطفال كنت دخلت كليه السن صوت الضمير وانك بتزعلى لما تحسى انك قصرتى مع الاطفال ده دليل على ان معدنك نضيف ربنا يكرمك ان شاء الله الاطفال بقى دول احباب الله ونقطع ضعفى الذيذه

التعليقات بالنسبة لك .. أهميتها؟

اما التعليقات اللى عندى فبترفع معنوياتى لأنها بتحسسنى إن فى حد بيشاركنى احاسيسى , وبعدين بتفرق معايا كمان لأنى من النوع اللى يحب يستفيد من الاخرين جدا , ومهما كان الرأى الاخر صغير باحاول استفاد منه

حد قل أدبه في التعليق .. عملت ايه؟

اه

هوه : بوست هايف جدا جدا جدا كالعادة
انا :ههههههههههههههههههه بس الحقيقة انا مطلبتش رأيى حضرتك للأسف , وطالما مش عاجب حضرتك متابع بوستاتى ليه باستمرار دليل على كدة كلمة كالعادة , ربنا يهدى يافندم



إيه اللي هيحصل لايميلك لما تموت؟
انا فكرت كتير فى الموضوع دا , حتى كنت بافكر احط اغنية زى الهوا , بس قولت ولو موتت ؟؟ فرفضت مبدأ انى احط اغانى فيها , وفكرت انى اكتب موضوع فى الدرافت عبارة عن ادعية وكلام كدة تفتكرونى بيه لما اموت وادى الباص ورد لريرى , وفعلا اديتهولها بس ماعملتش لسة الموضوع , ودخلت قبل كدة مدونة حد لقيته عامل حركة رائعة , كاتب فى حالة انى موتت دوس هنا , وعامل موضوع روعة , مش عارفة يارب اكون قررت هاعمل ايه , قبل ما اموت





اديت الباسورد لحد قبل كدة؟ايه كانت علاقتك بيه؟
اه ريرى بس

شخصيتك... نوعها ايه؟
غامضة, وديما خايفة من اللى جاى

مودك ايه؟
عادى



الأكلة المفضلة؟
محشى ( بكل انواعه )
بيتزا
كشك ابيض

السفر بالنسبة لك؟
السفر كمواصلة اكيد باكرهه , بس كهواية باموت فى السفر وتغيير مكان الاقامة





صفات أخدتها من بابا؟
مممممممم ممكن حتة انى مااتكلمش مع اللى اودامى كتير فى اول مرة لغاية لما اعرفه كويس وابتدى اعيش حياتى عادى, بمعنى اصح مش اول لما اتعرف على حد اظهر بطبيعتى .





صفات أخدتها من ماما؟
انى اى حاجة على اعصابى , وممكن من كتر الزعل يجيلى مرض






اكتر 6 حاجات بتكرهها؟
خصم الربع يوم اللى باخده كل يوم بسبب التأخير

انى انزل لغاية الكانتين وماالاقيش اللى انا عايزاه

صفة البخل

الطيبة لدرجة الهبل

إنى اتظلم والاقى حد بيطلعنى غلطانة كمان

إنى اشترى لبسسسسس



أكتر 6 حاجات بتحبها؟
ضحكة الرضا لما باشوفها فى وش بابا وماما

فرحة ولى الامر لما ابنه جاب الفول مارك

فرحة اتنين حبوا بعض واتجوزوا بعض او مخطوبين حتى

يوم اجازة من الشغل

الاستيكة اللى بريحة الفراكه سواء البمبى او البيضة



الشغل بالنسبة لك؟
حاجة جميلة بس متعبة , ومسئولية لو مش قدها لازم تسيبها



ايه الكمبيوتر و النت بالنسبة لك؟
مجرد سد للفراغ , ورررررررراحة من التعب , وبالتالى اى حاجة فيها راحة لازم تبقى ممتعة






ما أحلى بوست كتبته؟ ضع اللينك ثم اذكر لماذا؟
زى الهوا ياحبيبى

لأنه اول بوست اكتب فيه احاسيسى علنى اودام الناس

مش بياعة ومش مترجمة

لأنى كنت عملاه وانا مترددة لكن ردود الناس خلتنى اثبت على رأى واحد

عارفين الواد دا يبقى مين؟؟

لأنى كنت حزينة اوى وانا باكتبه ومن ردود الناس حسيت انى فعلا قدرت اوصلهم الحزن اللى جوايا


أحلى مدونة قرأتها؟
لأ والله ماهاعرف احدد , دا سؤال صعب جدا , بس انا طالما زورت مدونة اكتر من مرة يبقى هيه عجبتنى

جربت تنام فى مواصلة

كنت خارجة انا والاسرة العسل بتاعتى ورجعنا على الساعة 10 كدة فى المينى باص , , المهم كان فى بنت شيك جدا وامورة بغبااااااااااااااااااااء واقفة مش قاعدة , بس شكلها كان مرهق جدا لدرجة تصعب على اللى ادامها والله كنت بافكر اقوم واقعدها لأن رجلى ماكنتش وجعانى , بس المشكلة إن ماما كانت معانا , وماما مبدأها انى مااركبش اى مواصلة فى الدنيا هاقف فيها , ماعدا المترو حبيبى طبعا , غير طبعا إنى خفت اختىتبرقلى , اصلها بيطرية وديما حريصة على انها تفرجنى على الحيوانات وهيه بتتشرح , علشان يعنى تعملى رعب واحترمها زيادة عن اللزوم , فخفت تبرقلى ولا بتاع .




المهم لما مشى المينى بص شوية البنت ابتدت تنام وهيه واقفة رغم كل شياكتها دى التعب فعلا كان مموتها , ومن هنا يبدأ موضوعنا , انا طول عمرى استغرب جدا الناس اللى بتنام فى المواصلات دى , واستنكر تصرفهم دا اوى , عايز او عايزة تنام طب خلاص يبقى تنام فى بيتها وبلاش تنزل , او تصبر لغاية لما تروح البيت , البرسيتيج بيبوظ اوى للناس اما باشوفهم نايمين , بوق مفتوح وعين محولة , دا غير طبعا اللى بيقعدوا يندغوا حاجة وهما نايمين رغم إن بقهم بيبقى فاضى تماما , قرف يعنى






دا كان مبدأى من صغرى , لكن السنادى جربته بصراحة

, فى اول السنة كنت باخرج من الشغل على البيت اقعد ساعتين لغاية لما النوم يجيى بغباء اروح نايمة لغاية الصبح , لأن فعلا الشغل مع العيال متعب متعب متعب , فى يوم جت عمتو طلبتنى وقالتلى اخرجى من المدرسة على عندى يابت ياموحة عايزاكى ضرورى طلبت ابوكى وقولتله , خرجت عليها , ويادوب اول لما وصلت جه معاد نومى , خلصت قعدتى معاها بصعوبة وانا بنام على نفسى ركبت المينى بص , اقسم بالله مابقيتش قادرة افتح عينى ولو خرم حتى ابص بيه انا فين , وكان واقف ادامى شباب يعنى المفروض ابقى خجلانة ولا بتاع , بس التعب كان قاتلنى , بقيت عمالة انام واصحى الاقى بوقى مفتوح , اقول الله مانا طول عمرى بانام ماحدش قالى إن بوقى بيتفتح , واروح فى النوم خالص واصحى فجأة الاقى الولاد دول باصين عليا وبوقى مفتوح , اقول يانهار دا زمانهم شافوا زورى

بجد التعب خلانى نسيت اى برستيج واى حاجة غير انى فعلا ميتة نوم , موقف تانى برده

, كنت فى فترة كدة بيجيلى ارق السنادى بردك , وماكنتش باعرف انام بالليل لمدة يومين , جيت اليوم التالت رحت المدرسة وحل النوم بقى فى اللحظة دى , نمت على الترابيزة السيراميك اللى فى مكتبة المدرسة علشان سقعة شوية وتفوقنى , بس رغم كدة مافيش فايدة , رحت ظابطة الموبايل على معاد الحصة بتاعتى علشان لو لا قدر الله رحت فى النوم , وفعلا لقيتنى باصحى على صوته , رحت قايمة جرى على الحصة , وكل اللى شايفنى , ايه ياسموحة انتى كنتى نايمة يابنت ولا ايه , (((حد ذكى يفتكر إن عينى كان مقفولة وانا ماشية ولا بتاع , اقوله لأ , اصل البلوفر لما كنت نايمة عليه علم على وشى علامات النوم)) ههههه

المهم جريت على الفصل , ودخلت لقيت العيال صاحين اوى قعدت اسأل فيهم قلت جايز يفوقونى , وجبت نسكافيه رغم انى مابحبش اشرب اى حاجة فى الكلاس , مافيش فايدة , لقيت نفسى باقول للعيال الجملة وانا نايمة , اول مرة فى حياتى اجرب النوم وانا واقفة , واقولهم يقولوها عشرين 20مرة لعلى استطيع انى افوق نفسى , مافقتش نهائى فى الحصة دى , ومااشتغلناش غير هي الجملة بتاعت العشرين مرة دى , بس العيال صموها , ومافوقتش غير وانا خارجة من عتبة الباب , بس لولا رحمة ربنا لقيت مدرسة الكمبيوتر تعبانة , اخدت منها حصتها وظبطت العيال ضرب وتهزيق

والمفاجأة الفظيعة إن الجملة اللى اديتهالهم اللى صموها دى هيه اللى جت فى الامتحان والاغرب إن فى منهم عيال غلطوا فيها ( وش بيشد شعره )

سؤال إجبارى ليكوا بقى : نمتوا قبل كدة من كتر التعب فى مواصلة ولا بتاع ؟؟؟؟؟؟؟؟؟؟؟؟

كيرشة

مش عارفة ليه انا باميل لأنى افتكر الماضى , وطبعا مغلباكم معايا بحكياتى عن الماضى وكل شوية اقول الكلية وايام الكلية وارجع يازمان والكلام اللى يتعب النفسية دى , بس بصراحة انا لما لقيت فى كتير من المدونات الفترة اللى فاتت ناس بتتكلم عن ايام المدرسة فقولت لزما يابنت ياموحة تفتكرى الايام دى مااكيد كانت حلوة برده , وبالفعل شربت كوب من الشاى المغلى ابو لبنه , وقمت بنزع القشطة لأنها بتنرفزنى وبتعصبنى جدا , ومكرهانى فى الشاى ابو لبن اوووووى مش عايزة احكى عنها كتير واقول هيه شبه انهى حشرة علشان لو فيه حد بيقرف ولا بتاع



ايام المدرسة انا كنت امورة برده زى دلوقتى (وش مكسوف ) , وكنت شقية , كنت كل الرحلات بتاعت المدرسة اطلعها , علشان مامتى ميس فكانت بتطلعنى سفلأة , وللأسف كانت كل رحلاتهم الحديقة الدولية والفسطاط , كانت فيها زوحليقة كبيرررررررررة اوى كدة ومقفولة اسمها الخرطوم باين , انا بقى اموت فى الحاجات دى , اروح واخدة نفسي عميق واقعد اصارع جوة , لغاية ما اوصل لبر الامان , أصل ماما كانت تقعد تقولى اوعى تتأخرى جوة ياموحة لحسن تتخنقى وتنزلى متزحلقة ميتة ( ماما نفسها قصير ) , والله بقى لو لقيت طفل متخلف مزنوق جوة بطن الزحليقة من جوة , اقعد ازقه بعزم قوتى وبانتقام شديد لحسن اتخنق انا وهوه , وساعات كتير كنت انزل العيال متعورين رغبة منى فى الخروج من اللعبة المنيلة دى وعندى نقطة نفس



كانت اكتر حاجة مكرهانى فى المدرسة دى انى بنت مدرسة , كانوا جيرانا يقولولى اخر السنة جبتى كام ياموحة اقولهم درجاتى يقولولى ماطبعا مش بنت مدرسة , كان الموضوع دا مأثر فى نفسيتى موت , .



المهم قعدت اعافر لغاية مادخلت الاعدادى يعنى ماكنتش ايامه حلوة اوى , لأن ماما بدأت تمنع عنى الرحلات نظرا لأنها مش هتروح معايا زى الابتدائى ولا هتعرف توصى حد عليا , بس جايز اكتر واقعتين افتكرهم اثروا فيا فى الفترة دى لما اشتركت فى مسابقة شعر , واول لما رحت المدرسة اللى فيها المسابقة نسيت كل الشعر وسكت خالص وخسرنا فى اليوم دا , وفاكرة كمان لما مدرسة الدراسات كانت كرهانى علشان مادخلتش معاها مجموعة فاختارت عيال يمثلوا شخصيات وسابتنى انا , ورحت انا نزلت للمديرة وقولتها انا والله هاعرف اقول حلو , و ادتنى شخصية انور السادات , ولما جيه وقت الحفل التحدى خلانى اكسركل القواعد ,وشخصية انور الوحيدة اللى كسبت رغم انها الشخصية الوحيدة اللى اعتمدت على الكلام بس , ساعتها كل الموجهين اللى جايين من الادارة قعدوا يبوسونى ويحضنوا فيا والتصفسق كان حاد فى الفقرة دى



سبنا من كل المراحل دى وندخل على الكينج ((((((((( الثانوية العامة ))))))))))) مرحلة رااااااااااائعة فعلا زيى مابيقولوا أخدت من عمرى رقات , استمتعت اوى فى المرحلة دى وخصوصا فى اولى ثانوى , لما كنت واقفة انا وصاحبتى فى الطابور اول يوم فى مدرسة جديدة عالم كبير كدة , وعمالين ندعى انهم ينادوا اسامينا مع بعض فى فصل واحد , لكن للأسف نادولى انا اول واحدة فى فصل اولى سابع ونادوا ورايا عيال كتير هيا مش منهم قعدت ابصلها من بعيد وهيه كمان تبصلى زى الاغنية بتاعت كاظم لما كان بيبص لحبيبته من بين الاسلاك الشائكة , وبعد مافقدنا الامل لقيت ايمان اخر اسم فى اولى سابع , وكانت دى الصدمة , كانت فعلا سنة جامدة جامدة , فى البداية كنا بنروح انا وهيه بعربية بيجو كدة , بس فى مرة اتأخرت كعادتى فاتنرفز عليا عمو , رحت قولت ماناش راكبة مع الراجل دا تانى , وهيه كذلك عملت زيى وقررنا نركب مينى بص اسمه كيرشة , لغاية دلوقتى عمرى مافكرت هوه اسمه كدة ليه , بس على ما اظن هما كانوا عايزين يسموه علبة سردين فقالوا كيرشة من سردين ماتفرقش كله ريحته حلوة , كان المينيبص يبقى مليان على الاخر مش باقى مكان غير لفردة شوز , ومكان فردة الشوز دى كنت باتشعبط انا وايمان , يومين تلاتة وتعبنا من البهدلة , قولتلها بعد كدة بكرامتنا نصحى بدرى ونخدها مشى , وفعلا بقينا نعمل كدة وياه على المواقف اللى حصلتلنا , مرة وقعت انا فى حفرة واحنا ماشيين وهيه اشتغلت ضحك وسخرية منى مش تنقذ صحبتها , ومرة كنا متأخرين اوى والطريق واقف جدا فعديت انا وهية من تحت عربية نقل , وكنا بنألف قصص ياما على العيال , اننا ولاد خال وكلام غريب جدا , ومرة اتطردنا فى حصة الألمانى , بس التاريخ كنا بنقعد نذاكره واحنا رايحين الصبح علشان بنخاف من بصة ميس التاريخ , وافتكر مرة بردك رحت انا وايمان مركز حصة مجانية كدعاية للمدرس , والمصيبة إن المدرس دا عمل سؤال ذكاء كدة وفاكر ال ايه اننا كلنا هنعجز فى حله فقال اللى هيحله هياخد 10 جنية , وقعدت افكر انا وهيه لغاية ماجبنا الاجابة وحسيت إن المستر دا مطلع الفلوس من جوة كليته , بصراحة عنده حق يعنى حصة مجانى وكمان عليها عشرة جنية , وموقف تانى بس احنا كنا فيه متخلفين جدا وفعلا انا اشهد دلوقتى اننا كنا غلطانين ساعتها , المدرس دا لما خلص الدرس كله خرج وقال اللى عايز يسأل يجيى يسألنى , فوهوه خارج نديتله انا وايمان يامستر يااااااااااااااااامستر , ماسمعناش ومشى ,وكان منظرنا فرررررى باد اودام العيال اللى خارجين كلهم واتحرجنا اوى , وادينالوه ضهرنا , لقيناه بيقول نعم يابنتى , رحت انا وايمان مشينا وعملنا نفسنا مش سمعينوه بنردهاله يعنى ,وكسفناه اودام الطلبة , بس فعلا دى كانت قلة ادب مننا , وهكذا مرت الايام فى اولى ثانوى , تانية ثانوى كانت سنة كبيسة وتالتة كانت حلوة نسبيا بس بعيدا عن ايمان لأنها دخلت علمى وانا ادبى , لغاية ما اتحدفت على الكلية , رغاية انا جدا , بس حبيت اكتب قصة حياتى قبل ما انساها مع الزمان , والكلية بقى فى مدونة شمساوى احتمال ابقى اعملها البوست الجاى

حزن حزن حزن ..... كفاياكم بقى

كان بودى اعمل نيو لوك جامد لبلوجى , بس للأسف كل لما اعمل تمبلات حلو الاقى حاجة تانى اتبهدلت فمعرفتش للأسف يلا خيرها فى غيرها وخلاص .

الفترة اللى فاتت دى كانت جامدة جدا وعمالة تعيدلى تاريخ الذكريات الطفولية الوردى ,اصل عيالى كانوا بيمتحنوا , وفكرونى بالخوف والرعب بتاع الامتحانات , وكنت شايفة فيهم نفسى اوى وخصوصا يوم لما كان بيتنادى على اللجان , وهما ياعينى عمالين يقولولى ياميس احنا خايفين وبطننا بتوجعنا موووووووت , والواد معاذ بنبوناية الفصل ماسك ايدى وبيقولى ماتراقبى علينا ياميس بقىىىىىىى , وانا اقوله اسكت يااااااه ( اه اصلى مابقتش رقيقة زى زمان وكلمة ياولد اتشطبت من قاموسى , ياإما اقول ياه او ياض ) , بس والحمد لله دخلوا اللجنة وبدعوا , وحتى التركات ماشاء الله عليهم اجتازوها , على حد كلامهم , اصل لسة ماعلمناش الورق بتاعهم , يلا ربنا يوفق الكل .


ندخل بقى فى موضوع البوست , الموضوع كبير اوووووووووى على فكرة بالنسبالى , وهوه موضوع الحزززززززززن , اللى شيفاه فى كل المدونين اليومين دول , اللى هما متهيألى اكبرهم ماعداش حاجة وتلاتين , اومال إن شاء الله لما توصلوا للأربعين هتعملوا ايه , اللى هوه اصلا كل الدنيا بتتقفل فيه , والجسم بيضعف وبتفقد كل الامل والفرح والسعادة وحتى الصحة .

ظاهرة غريبة فعلا ظاهرة اليأس والحزن اللى شيفاها فيكم , كل لما ادخل بلوج الاقى الحزن فى الموضوعات, قليل ما الاقى موضوع فيه انبساط وفرحة , مواضيعكم حزينة والكلمات حزينة , طب ماشى البوست حزين وصاحب البلوج حزين , الكومنتس والردود بقى المفروض يبقى فبها امل , لأ بالعكس الاقى رد يقول هيه الدنيا كدة , ربنا يصبرنا ويصبرك , انا حزين اكتر منك وهكذا من الردود اللى بتخلى اللى داخل فرحان يقول شومعنة انا,,,,,,,, انا لازم اشوف ايه جانب الحزن فى حياتى واعمل عليه بوست جديد واعيش فى مود الحزن زى باقى البنى ادمين .

بابا بيقولى إن على ايامه كان قليل اوى لما يشيلوا هم حاجة , رغم انهم كانوا بيشتغلوا وهما صوغيرين وكانوا فقرا والدنيا بتيجيى عليهم كتير

حاولوا بجد تخرجوا من المود دا , والله فعلا الدنيا حلوة , وإن كان فيها شوية حاجات كدة تمغص علينا حياتنا بس ماتدوش للحاجات دى مساحة اكبر من حجمها , يلا بالتوفيق انا قلت افتح نفسكم بس عوقبال لما اعمل بوست عدل

العيد فرخة

قلت العيد فرحة فحطيت ماسك على وشى عبارة عن عسل وعليه سكر , لغاية لما العسل

ساح وبقى بيقع من وشى على ترنج الوقفة فقرفت جدا , واضطريت اغسله وحطيت

ماسك خميرة بيرة

,

برده اتقرفت , رحت نهيت الليلة بماسك جاهز بيفتح البشرة بالزبادى , المهم ظبطت

نفسى وبقى شكلى قمرررررررر

,

و على غير العادة استأذنت الفراخ انى اغدر بيهم وانام متأخرة شوية وهما يسبقونى بقى

ما العيد فرحة وبتاع

,

وبالفعل قعدت صاحية لغااااااااااااااااااااااااية الساعة اتنين بالليل , لغاية لما عينى احمرت

اووووووى خفت عليها

بصراحة يطلع فيها كيس دهنى من كتر السهر , ولقيت بابا عمال بيقولى يلا ياميس

موحة نامى بقى جتك

ارررررررررررف , قلت انام علشان الحق اصحى اصلى العيد , واخد كيس جوايز من

اللى بيبقى فيه كيس شيبسى من

ابو ربع جنية وبلونة ببريزة , وبالفعل خضعت إلى النوم الجميل

.

صحيت الصبح على رسالة من ميادة , قومى علشان الصلاة , قمت من سكات

وجوايا حماس يعدينى خط

برليف , ونزلت اصلى , ورغم إن ماكنش فى اى اكياس حلويات بتتوزع إلا إن نفس

الحماس قعد جوايا , خلصت

صلاة , وانا سعيدة انى هاعيد بعيد عن اشكال العيال المتيسة اللى باضربهم ويقولولى

كمان

.

روحت لقيت رساله من حبيبتى بتقولى كل سنة وانتى احلى موحة , وبعدها

الرسايل , وانا عمالة فى

سرى اقوله شكله هيبقى عيد حلو , حطيت راسى على المخدة , صحيت على صوت بمبة

بابص لقيت العصر اذن

اتصرعت , قلت لماما ازاى ماتصحنيش , قالتلى قومى كلى الفتة , فتة ايه بقى دا ايه

العيد الميت دا , نزلت الشارع

بحجة انى اشترى حاجة , ولا فى عيد ولا نيلة

.

هما الاطفال ماتوا فى حرب اكتوبر ولا ايه

كل سنة وانتوا طيبين يااحلى مدونين

مش بياعة ومش مترجمة

اولا وحشنىىىىىى جدا جدا جدا اوووووووووووووووووووى ياعيالى , بجد مفتقدة الكتابة هنا اووووووووووى , بس انتوا عارفين بقى رمضان والصلاة والمشاغل بقى على اساس انى شخصية مهمة , بس هحكلكم بالتفصيل عن اللى حصلى الفترة دى :




عندى ميكس فى مشاعرى واحاسيسى مش عارفة فرحانة ولا زعلانة , مش قادرة اميز انا فى مكانى ولا فى المكان الغلط , فجأة كدة تغير كامل مكمل فى شخصيتى وبدون اى مقدمات , والله ماعارفة إن كان تغير حلو ولا وحش





نحكى من البداية :

انا باشتغل دلوقتى مدرسة انجلش فى مدرسة من مدارس مودرن سكول لو تعرفوها , العيال شقلبوا حياتى بشكل غريب , مش هنكر بانه احساس جميل انى أشوف الحب بيتننط من وش العيال, ولا الفرحة لما بتدخل ميس سماح الكلاس , ومش هنكر برده رغبتى الدفينة فى التحكم فى العيال واجبارهم على انهم يجيبوا كشاكيل متجلدة بالجلاد الابيض والازرق اللى بيلمع ( اصلى بحب اللونين دول اوى فى الجلاد ) , وفعلا حصل المراد والعيال جابوها , وبرده مانكرش ان كلمة ميس سماح طالعة من بوقهم ثكررررررر وخصوصا اللى بيقولوا السين ثاء ولا اللى بيقولوا السين شين





بس ايه التغير الغريب اللى حصلى دا , فجأة من شخصية خجولة جدا وصوتها مابيطلعش لصوت واصل لأخر الدور , ماطبعا علشان اسمع الفصل كله , انا عايزة اقولكم انى لو اختى جت حضرتلى حصة مش هتعرفنى وانا هتكسف اعمل اللى بعمله دا ادامها , فعلا بنتغير اوى , صدقت ميس نجلاء لما قولتلها مش هاقدر لأن صوتى واطى , قالتلى بكرة تعمليلهم اراجوز , انا حتى عندى واحدة صحبتى استايل ودماغ , الاسدال يبقى شكله مش عارف ايه ولو اسود ماتجيش عليه نقطة تراب , وكلامها مش كتير خالص , لمجرد ماتدخل الفصل تربط الاسدال فى بعضه وتشتغل , وفعلا مابتبقاش هيه خالص .





بس احساس تانى لما بادخل الحصة واقول جود مورننج الاقى العيال محضرين ليا جملة بيقولولى





We love you





واحساس اجمل لما اكون طالع عينى فى تصحيح الكشاكيل و الاقى كشكول البنت خارج منه ورقة كدة , افتحها الاقى مكتوب عليها جواب إلى ميس سماح , انا بحبك اوى ياميس علشان حضرتك جميلة جدا جدا , وشكرا سلمى





احساس حلو برده لما اجى اتكلم مع صحابى وتفوت عليا بنت امورة وتقولى ازيك ياميس , اروح انا مشاورة للميس عليها واقولها دى واحدة من عيالى , كلمة حلوة اوى عيالى دى





احساس رائع انى اديهم درس جديد واجى اسمعه تانى يوم الاقيهم حافظينه بس علشان بيموتوا فيا

احساس رائع لما اشرق من كتر مانا باشرح لهم وزورى يوجعنى والاقيهم نفسهم يساعدونى بأى شكل فيعلوا صوتهم ويكرروا الكلمة 3 , مرات لوحدهم من غير ما اقول لهم علشان مايتعبونيش

احساس اروع لما يجوا ماشيين ويتخانقواا مين اللى هيبوس ميس سماح





احساس اكتر من رائع لما الاقى بنت جيبالى باباها والاقيه عمال بيشكر فيا وبيدعيلى

احساس راااااااائع اوى اوى اوى لما احس إن شغلى دا رسالة , وانى بادى للأجيال علم ينتفعوا بيه , وانى ببدأ كل يوم باحلى نية فى الدنيا , وهيه تعليم الاجيال المسلمين , كفاية ان وقتى بيخلص كل يوم من غير ما احس لحظة بفراغ وف نفس الوقت مافيش ادنى حاجة فى شغلى بتغضب ربنا

___________________________________________





خلاص الاحاسيس الحلوة خلصت ندخل بقى على الوحش فالاوحش ثم الاوحش





احساس وحش لما يبقى ادامى منهج معين لازم اخلصه انهاردة واحاول اكدسه للعيال , وابقى شيفاهم ادامى فصلوا ومافيش بايدى غير انى اديهم اللى ادامى علشان امشى على الخطة





احساس وحش اووووووووووووى لما اقول اللى مش هيكتب الواجب بكرة هيضرب اربع عصيان ويجيلى تانى يوم واحد مش كاتبه وفعلا اضربه





احساس وحش انى اضرب واحد واشوف دموعه طول الحصة وياعينى عمال بيحفظ معايا لمجرد انه خايف انى المح بقه مابيتحركش

احساس وحش لما اكون راجعة اخر اليوم ويفضل دمى محروق ومابانمش طول الليل بسبب احساس منى بالتقصير تجاههم .

احساس وحش لما تكون عينى طالعة فى الفصل طول الاسبوع ويجيى موجه من الوزارة يتفرج على ولادى ويأخرلى منهج اليوم واضطر اكدسه على عيالى لتانى يوم , وف الاخر يقول مافيش مدرس عدل

بجد شغل متعب اووووووووووووووووى , ههههههههههه افتكرت صحبتى لما سألتها انتى تعبتى انهاردة ولا حاجة راحت قالتلى : ابدا انا بس ضوارفرى اتوسخت ( تريقة يعنى ) ه

انا حاسة انى فى مكان مش مكانى خالص , وإن كان المكان لذيذ وحلو اوى بس مش بتاعى , وفعلا هسيبه بس المشرفة طلبت منى استنى لما تعمل الخطة الجديدة , علشان عيالى مايروحوش فى داهية , وانا عيالى عندى اهم من الدنيا ومافيها

بس بجد : أى لاف زيمممممممم فرى فرى ماتش , ويارب يحفظهم ويبارك فيهم كلهم

مش عيب يعنى

هوه كان لازم الواحد يكبر يعنى ؟؟؟؟؟؟؟؟؟؟



انا باين اخر مرة كنت فيها طفلة لما وصلت لتالتة اعدادى , لما كان رمضان باقى عليه اسبوع ومستنية الفانوس وبابا منفض , قولت الفت نظره يمكن ناسى , لقيته بيقولى : انتى كبرتى ياسماح فانوس ايه بس اعقلى





انا مش عارفة اوصفلكم اصلا الفوانيس دى بتغرينى اد ايه , بجد بحبها اوى بكل الوانها واشكالها







فى نفس السنة دى برده , ابتديت اعمل لنفسى برستيج وماما تقولى روحى ارمى السلة , قولتلها لأ ياماما طبعا انا كبرت , السبب مش انى كبرت , بس فعلا والله السلة كانت طولى بالظبط , وكنت كل لما اشيلها لازم تقع معايا العشرين سلم , سلمة تلو الاخرى , وف الاخر اقوم لماها قبل ما طنط هانم اللى تحتنا تاخد بالها وتخرج ورايا بالمقشة , ايه المهانة دى مانا اعمل نفسى كبرت احسن







كبرت بردك فى السنة دى لما جيه العيد بعد رمضان على طول وجت وقت صلاة العيد وماروحتش اصلى بالبيجامة الجديدة بتاعت الوقفة اللى باستنى وقت الصلاة علشان انزل اغيظ بيها منى بنت طنط ام عمرو , ولبست لبس خروج عادى علشان كبرت ومايصحش انزل بالبيجامة







كبرت بردك السنة دى لما لقيت جيل جديد غير الجيل بتاعنا ماسك الفوانيس وحاططها فى الشارع وعمال بيلف حواليها وانا واقفة فى البلكونة باقول ايه الهبل دا انا كبرت







كبرت كمان فى السنة دى اوى لما شلت اختى الصوغيرة على دراعى وابتديت اربيها , ساعتها بس حسيت انها راااااااااااااحت عليا وانه مابقاش اوانى خالص , دا عصر بتاع ناس جديدة احنا اللى هنبقى قدوتهم











كبرت بردك لما جيه اليوم اللى عملت فيه بلوج وفيه بوستات منهم البوست دا , واللى قعدت ارغى فيه كتير علشان اوصلكم فى الاخر جملة واحدة : كل سنة وانتم طيبين ويارب رمضان دا يعدى عليكم احسن من اى رمضان عدى







البوست دا مش بس علشان اقول الجملة دى , بس كمان عايزة اقولكم انى نفسى اوى فى فانوس ونفسى ارجع صوغيرة واقول للزمان ارجع يازمان

وماذا بعد؟؟؟؟؟؟؟؟

اول مشهد : وانا قاعدة عمالة باضحك مع صحبتى فى الاوضة بتاعتى , فراحت قالتلى





إيمان : ايه رأيك لو تروحى معايا بكرة أسأل على كورس كدة

انا : لأ ياستى انا جدو تعبان اوى ماينفعش بكرة خالص

إيمان : ماهو عيان بقاله فترة وكل مرة تقوليلى بيغسل ورجع تعبان ومش عارفة ايه

انا : لأ المرادى شكله كدة عيان اوى وبيودع

إيمان : خلاص يبقى مبدئيا نتفق اننا هنروح ولو حصل جديد اطلبينى وقولى


إيمان مشيت من عندى على الساعة 11 , قعدت شوية على النت , وشوية وخارجة ادور على حاجة امزمزها , لقيت صمت غريب فى البيت , على غير العادى , اختى لما بترجع من الصيدلية مابكفيهاش ألف ودن , وماما هيه كمان تموت فى الرغى

دخلت اخترقت الصمت وسألت اميرة , هوه فيه هنا مشبك باقى من المصيف ؟؟؟؟ , اميرة قالتلى بشبه زعيق : جدك بيموت دلوقتى ياعينى

طبعا انا سمعت الكلمة وسألت سؤال المفاجآت المعتاد :: جـــــــــــــــــــــــدو ؟؟؟ جدو مين ؟؟؟؟؟؟؟؟؟؟؟؟؟؟؟؟؟؟؟؟

قعدت فترة كدة فاقدة القدرة على مجرد التفكير , وخرجت جرى على الاوضة التانية , وبصيت على وش ماما , لقيتها غرقانة دموووووووووع , قولتلها هوه مات خلاص ؟؟ , قالتلى روحه بتطلع دلوقتى ياسماح ادعيله

مش عارفة احكى عن الحالة اللى كنت فيها , هوه الانسان بيبان عليه اوى كدة ان روحه بتطلع ؟ بيبقى شكله ايه يعنى ؟ وشعور اللى حواليه ايه ؟؟ مابيخافوش على جلدهم وبيجروا من الاوضة اللى جاي لها عزرائيل دلوقتى ؟؟ مابيحاولوش يحفظوا ملامح اللى بيموت دا ؟؟؟ , بيشوفوا الروح وهيه خارجة من اول صوباع الرجل لغاية المناخير؟؟ بيحسوا نفس ألم اللى بيموت دا؟؟ بيسمعوه وهوه بيكلم الملايكة وملك الموت ؟؟ ملك الموت مابيعملش اى اصوات وهوه داخل او خارج ؟؟نفسهم ما بيخلصش مع اخر ألم ليه؟؟ , بصراحة مهما حكيت مش هاعرف اوصف حالتى

بعد كل التفكير دا رحت سألت ماما : هوه انتى عمرك شفتى حد وهوه بيموت ؟؟؟؟؟؟؟؟ وبيطلع فى الروح قالتلى : لأ , بس بتبقى معروفة ياسماح , خيلانك عارفينها

وبالظبط نفس هيستريا الضحك اللى ضحكتها ساعة وفاة خالتو مريم ( الله يرحمها) , بضحك وانا مصدومة او مقتولة او مجروحة مش عارفة شعور هيستيرى بيحصل وقتها بس , واقعد اتكلم فى مواضيع تانية وف اخر كل كلام اضحك , ال يعنى بادارى على نفسى , بس انا من جوايا بجد متقطعة , مش عارفة الضحك دا ايه , لا مبالاة ولا لا وعى ولا قرب من حالة جنان , ولا بديل للدموع



اه انا كل لما حد كان بيكلمنى كنت اقوله جدو عيان وبيودع , لكن عمرى ماتخيلته مات فعلا , اول لما سمعت الخبر كل اجزاء جسمى اغشى عليها , حتى المخ , بدليل انى باضحك بدل ما اعيط ومش عارفة اتخيل , اه بقالى فترة كدة مابعنلش اى كونتاكت مع جدو وخصوصا من ساعة لما راح قعد عند خالو اللى العيلة كلها متخانقة معاه ومن ضمنهم مامتى , بس قعدت افتكره زمان لما كان بيجيب جدى ( ابن الخروف) ويسميه سعد , كان بيسمى كل الجديان اللى بيجيبها سعد , وكان يربط الحبل فى ايدى وانا صوغيرة , وننزل على الجنينة ونقعد نجرى ورا سعد وسعد يجرى ورانا وجدو يقولى لأ ياموحة ماتركبهوش اوعى , ولا لما كان عامل عشة للفراخ ويقعد يقنعنى انى لازم ابقى شجاعة وامسك الفرخة , واما كنت بابات عنده بالاسبوع وكل يوم اصحى على صوته وهوه بيغنيلى ياموحة ياموحة يامممممممموحة ويقعد يحطلها كلمات صوغيرة كدة وف الاخر تطلع اغنية , ويقولى يلا اغسلى وشك علشان الفطار اتعمل , وانا كنت بادخل كل رغيف الفينو جوة الكوباية بتاعت اللبن يقوم يتنزنأ جوة يقعد يضحك عليا ويقولى طب ماتخليه رفيع ويروح قاطعه نصين بالطول ويخلينى اسقى , فكراه برده لما كان بيجيب ريحة بتاعت السعوديين ويحطهالى والقرنفل , وفكراه الفترة الاخيرة لما تعب وبقى رفييييييع اوى , وايده بتقعد ترتعش وحاجات كتيرررررررررر ماتتحكيش


المهم بعد فترة من غياب العقل ابتديت ادرك ان جدو مات , لأ قصدى بيموت , اول لما بابا دخل , راح قال : حد طلبكم ؟؟؟؟؟؟؟ , قولتله : اه خالو , قال إن خالو التانى طلبه , قولتله ها يابابا يعنى هوه خلاص كدة مات؟؟؟؟؟؟؟؟ , قالى اهوه بينازع



الشلل العقلى المؤقت جالى تانى من الكلمة دى , بجد كلمة جامدة اوى , بتوووووووووووووووووووووجع , متخيلة نفسى وانا بنازع والناس عمالة بتتفرج عليا وبتقول اهى بتنازع

انا من ساعتها وانا بامارس حياتى عادى جدا , بس بجد حسة ان فى شىء غريب اوى جوايا , زى مايكون حتة ازاز كدة عمالة تجرح فى معدتى وجسمى كله حتة حتة

بجد مش عارفة اقول ايه , هوه احنا مستنيين ايه تانى علشان نظبط اعمالنا , مااحنا ياهنموت ياهنموت , وياهنتحاسب ياهنتحاسب , هوه فى حد مش هيموت؟؟؟؟؟ , طب فى حد عارف هوه هيموت امتى ؟؟؟؟؟؟؟؟؟ , اعرف واحدة جوزها كان شاب لسة متجوزيين من شهر وكان نايم , رايحة تصحيه علشان الشغل لقيته مات , ماكنش عيان وماكنش كبير وماكنش فى الشارع علشان عربية تدوسه او تكييف يقع فوق دماغه , قدره , وماحدش عارف قدره امتى ولا اذاى , ولا عارف هيشوف امتى ملك الموت , بجد ادامنا فرص كتير اننا نتوب ونصلح من علاقتنا بربنا , نفسى مانضيعهاش .


اما جدو فربنا يرحمه ويدخله فسيح جناته , والبقاء لله واحده وكل نفس ذائقة الموت

كان ليا طلب كدة منكم , انكم تدعولى اوووى لانى تعبانة اوى اليومين دول , والتحاليل الشهر دا مش حلوة ومش مريحانى , يلا الحمد لله , ابقوا ادعولى

بياعة ....... مترجمة

زى اى طفل عبيط كانت اكبر امنية لي انى اكون بياعة فى سوبر ماركت اتكعبل فى كيس شيبسى , ولما اشرأ امشى الشرأة بكوباية عصير , واما اعطش اشرب بيبسى وألف على شعرى اللبان بدل التوك واحط الجيلى كولا بدل البنس

دى كانت اول وظيفة اتمنتها ف حياتى , بعدها لما دخلت ابتدائى برده زى اى طفل عبيط كل تصوراتى عن الميس بتاعتى انها حاجة رهيبة مالهاش مثيل , اكتر واحدة فى الدنيا تعرف معلومات عن كل شىء, لو سألتها عن اى حاجة عمرها ماهتقول ماعرفش , وخصوصا لأن بابا وماما كانوا ساعات بيقعدوا يفهمونى فى مسألة الحساب البسيطة ساعة ونص ومايعرفوش يوصلوهالى , فى حين انها كانت بتعرف توصلهالى فى حصة مابتزيدش عن ساعة إلا ربع
لما دخلت اعدادى عرفت إن المدرسة ديتها بس مادتين تربوى يفرقوها عن ماما , وهما اللى مخلينها تعرف تشرح وتوصل المعلومة , وانها انسانة عادية جدا زى اى حد , وممكن تقف ادام حاجات برده وماتعرفهاش وانها وظيفة ضمن مليون وظيفة

فقعدت افكر طب ايه الوظيفة اللى ممكن اكون جامدة فيها , لقيتنى نفسى اكون مشهورة اوى . بس طبعا مش ممثلة يعنى ولا مغنية , طب ايه ياموحة اللى ممكن تلاقي نفسك فيه وتبقى مشهورة واسمك معروف , بقيت بحلم اكون صحفية اد الدنيا
صفحة كبيرة جدا مليانة كلام مسلى ولافت لأنتباه اى حد , وف اخر الخبر ( سماح ال...... ) اسم جدو يعنى اصل انا معروفة بيه , وفعلا بقيت اتخيل واحد بيقرأ الجرنال ولسة هيقلب يقوم يلفت نظره العنوان ويقعد ربع ساعة يقرأ فى المقولة بتاعتى العظيمة وبعدين يقرأ اسمى ويروح قافل الجرنال ماخلاص بقى الجرنال كدة عمل بتمنه , ويجيى تانى يوم يجيب الجرنال ويدور على مقولة سماح يقراها ويرمى الجرنال وهكذاااااااا

طبعا عرفت بعد كدة لما دخلت الثانوى انه مش بالساهل خالص, وإن ياما ناس عواجيز وكراكيب ومش بيكتبوا غير اربع سطور بعد لما يكونوا افنوا عمرهم بحثا عن الشهرة

شوية فى شوية حلمى فى انى اكون صحفية اتزحزح , ولقيت كل اللى حواليا عمالين يقولوا احنا عصرنا دا عصر الكمبيوتر واللغات , فقلت يبقى هيه الألسن انا اركز كل طموحاتى فى الألسن , وطبعا مش هاحكى بقى على الارادة والرغبة والحاجات اللى حصلت علشان اجيب فى الاخر مجموع يدخلنى اى كلية اشاور عليها فى ادبى , ويوم ملأ الرغبات
كل اللى حواليا قعدوا يقولولى اقتصاد وعلوم سياسية وقليل اللى شجعوا ألسن , فى ظل ما مفيش حد جاب سيرة إعلام ,, دخلت ألسن وبقيت بحلم ابقى مترجمة اد الدنيا , وكعادتى ياما اتمنيت بس مافيش حاجة من اللى اتمنيته حصل
المهم اللى إن اللى تعبنى اوى من الموضوع دا ، إن عمتو سماح (عمتى يعنى ) صحفية ، وبقالها كام مرة كدة بتكتب مقولات فى جرنال الجمهورية مقولات صوغيرة كدة وملهاش لزمة اوى ههههه، وف نهاية المقولة بيتكتب ( سماح ال........ ) اصلها اسمها زى اسمى وانا اسمى زى اسمها لأن هيه بنت جدو اللى هوه انا باخد اسمه

شعور غريب اوى بحسه لما باقرأ اسمها ,باقشعر اووووووووى , بابقى عايزة اعيط إن الحلم دا ضاع وإنى ماتمسكتش بيه , بابقى زعلانة انى سمعت كلام الناس ، بجد شعور تانى لما باشوف اسمها اللى هوه نفس اسمى مكتوب بالحبر الاسود فى الورقة الرمادى بتاعت الجورنال , وخصوصا انى ياما حلمت بالاسم دا بنفس خط الكتابة دا وف نفس المكان وعلى نفس الورقة , هوه نفس الحلم فى كل حاجة إلا فى اختلاف الشخصية (عمتو وانا ) وف الفرحة اللى كانت بتنط من عينى ف الحلم ,لكن خلاص دا كان حلم وضاع من ايدى خلاص وانا اللى ضيعته , ربنا
يستر بقى وماضيعش حلم الترجمة
طولت بغباء انا عارفة , بس انا فعلا حاسة دلوقتى إن اللى يقرأ مدونتى دى حاليا تقريبا هيكون عرفنى اووووى , كل حاجة فى حياتى واحلامى واسرتى حتى جدو (..........) عرفتوه , يلا بقى انا هاعمل ايه مانا اما صدقت احكى واخرج كل اللى جوايا


انا على فكرة كنت كاتبة البوست دا من فترة وكنت حطاه فى الدرافت

Mohamed : الموقع بتاع الصور رائع , انا جيبة منه كل الصور دى , بس مش عارفة ليه الصور معروضة فيه صوغيرة مع انها عند حضرتك ماشاء الله كبيرررررررة

بوست بس مش بوست اوى

Hadota


Wahed


شاب نفسه يحقق حلمه


Mohamed


شمعة امل



nouran

بجد انا مش عارفة اشكركم اذاى على سؤالكم عليا وانا غايبة , فعلا فرحت جدا لما ريرى قالتلى انكم سألتوا , ثانكسسسسسسسس

ياجماعة انا باعتذر عن التأخير اصلى كنت باصيف , كان مصيف حلو اوى الحمد لله استمتعت لسنة ادام , وكسرت الروتين , وأكلت فريسكة يااسكندرانىىىى اوى , وطبعا يوميا كنت باكل ام الخلول ( باموت فيها ) ,والجمبرى جبنا كمية كبيرررررة وانتحرنا فيها , وطبعا كنت باتنقع فى البحر بانزل من بعد الفجر تقريبا , لغاية المغرب , يعنى بقيت سودة سودة سووووووووووودة , بس برده امورة ههههههههههههههههههه , ولعبت بينج بونج وطايرة ودخلت السينما , وفيلم مرجان ماعجبنيش خالص , بس كدة رضا حلو اوووووووى , والشبح يعنى

بصوا فى البوست دا بقى انا هاحسسكم بالظبط بجو المصيف وفعلا عاملة فيديو عن البحر وصورة للشاليه اللى كنت نازلة فيه و عيال بتلعب فى الرمل

بس قبل الصور كنت عايزة احكى عن حاجة كدة شفتها فى المصيف عجبتنى اوى , اول يوم بابا اخدنا بليل انا واخواتى والوالدة ومعانا ولاد صاحب بابا اربع بنات , دخلنا كوفى شوب اسمه صهللة , وفعلا صهللنا للصبح , ايه الجمااااااااااااااااال دا , واحد قاعد فى كورنر وماسك فى ايده عود وجنبه واحد ماسك طبلة , والاتنين شباب , والمايك عند بوقه وعمال بيغنى اغانى قديمة , بجد حببنى فى الاغانى القديمة , الكلام طالع من قلبه , وهوه بيغنى عن حبيبته تحس بالظبط إن الحبيبة دى ادامك وان المشهد كامل بيحصل وانت بتتفرج عليه , والناس بتعدى بالعربيات تسمع صوته تقوم واقفة وتسمعه من العربيات , بجد الراجل دا مابيبصش للفلوس خالص , الدليل على كدة انه كان بيموت من الفرح مع كل بنى ادم يقف يسمعه بالعربية رغم انه ماكنش بينزل الكوفي يطلب مشروب , انا بجد حسيت كلامه اوى , وطبعا البنات علشان كلهم سنهم فى الرنج بتاع سنى ماكانوش طايقين نفسهم وواحدة تجر التانية لقتنى قعدة انا وبابا وماما , وقاعدين بنسقف ولا المعلمين , , ويخلص الكوبليه ونكون احنا حفظناه نقوم نغنيه معاه المرة اللى بعدها وحطين رجل على رجل وووووووووودماغ , بجد نسيت برستيجى وكل حاجة كل اللى كنت مركزة فيه اد ايه الولد دا رائع وصوته جميل ورغم كدة مغمور , فى حين إن ناس تانى صوتها ياستاااااااااار واشتهرت على ايه ؟ مش عارفة , وبعدها قعدت ألح على بابا يخليه يغنى زى الهوووووا وكنت فعلا نفسى اسمعها من بوقه , لما حد بيطلب منه اغنية بيقعد يدندن كدة بتاع خمس او عشر دقايق ويقوم طالع بيها , فشر عبد الحليم , بس واحدة طلبت عيون القلب ولما غناها وسمعتها , مابقتش عايزة اسمع زى الهوا بقى اكتفيت فى اليوم دا كدة خلاص من كتر جمالها , انا روحت على الساعة 3 كدة وبابا وماما كملوا لغاية قبل الاخر بشويه , واخويا بيحكيلنا انه لما راح يشترى حاجة من تحت بعدها وعدى على الكوفى شوب , لقى راجل عجوز وووووواحد بس قاعد عمال يدندن مع الفنان , والفنان مبسوط وبيغنى والسعادة هتنط من

جواه , باللله عليكم دا مش فنان؟؟؟؟؟؟؟؟؟؟؟؟؟؟؟؟؟؟؟

دى صورتهم بس كانت فى الضلمة :

باقى المصيف بقى هاحتفظ بيه فى الدرافت انتوا كفاية عليكم كدة علشان ماتملوش , واسيبكوا مع الصور والفيديو بقى , وإن كانت فى الضلمة ورديئة شويات , بس كفاية انها صور للبحر :

دى صورة البحر فى الشروق :

ودى صورة الشليه بتاعى بس دى جت غلط يعنى لقيت اختى مصوراها فقلت خير وبركة , فعلشان كدة مش منورة اوى , اختى مصوراها من عند المراجيح بعيد اوى يعنى : :

ودى بنت سكر عجبت بابا فحلف لهيصورها , وفعلا قمررررررررر :

والوردة دى اختى قطفتها من الحديقة اللى ادام الشليه وكانت دى نهايتها , قعد بابا يتخانق معاها يومين , بس بصراحة وردة جامدة :

للأسف انا مش عارفة اعمل الفيديو خالص , بس حقيقى جامد هيفوتكوا نص عمركوا , فى فيديو كدة اختى بتمثله وواحد تانى بتغنى فى الفراندة بتاعت الشليه , ومصورة البحر بامواجه واصواتهم , والعيال وهما بيلعبوا فى الرمل , يلا مش مهم كفاياكوا كدة