هكذا تكون الحياة

تعرفى إن امتع شعور بحسه وانا معاكى هنا فى العربية ؟؟؟

بحس شعور تانى , انا اللى بحركك , عايز امشى بيكى شمال همشى عايز

اروح يمين برده هاروح , او بمعنى تانى بحس إنى انا اللى بحركك بامتلكك يعنى

وهوه فى حد فى الدنيا بيحركنى غيرك ,طلباتك بالنسبالى زى الاوامر بكون اسعد انسانة وانا بألبيها , باحس انك نفسى , متهيألى إن نفسى

مش هتخاف عليا اد مانتا بتخاف وبتحافظ عليا , بجد بحب حبك ليا

يعنى مش بتحبينى انا ياهانم , بتحبى بس حبى ليكى ؟؟؟

اذاااااى بس بتقول كدة هوه انا عمرى حبيت حد ادك ,بحبك وبحب حبك وبحب قوتك كمان

انا ؟؟؟؟؟ طب تعرفى انا عمرى فى حياتى من صغرى ماكنت باعيط , افتكر فى يوم كنت فى درس انجلش فى سنة رابعة ابتدائى والمدرس ضربنى ونزلت دمعتين , ساعتها كنت مضحكة البيت كله وما ابقاش كداب لو قولتلك انى كمان كنت مضحكة الجيران , لما ماما قعدت تقولهم شوفتوا الراجل بتاعى قعد يعيط , وخدتنى ساعتها وقالتلى انت راجل اوعاك اشوف دموعك دى تانى , من بعدها وانا ياما الدنيا راحت وجريت بيا , ,وياما كنت باحتاج انى اعيط اووووووووى , بس منعتنى رجولتى اللى امى عودتنى انها تكون اقوى من اى شىء , ولما اتجوزتك علمتينى انى لما اتجرح واحتاج انى ابكى اسيب اى حاجة باعملها وامشى من اى مكان انا فيه واجيلك ابكى فى حضنك , تعرفى إن ماحدش شاف دمعتى غيرك ____ انا بابقى ضعيف اوى ادامك , ورغم كدة بتبينينى اودام الناس كلها اقوى راجل شافته عينك

طب ما انت الوحيد اللى شوفتنى وانا حلوة ووانا وحشة وانا حاطة ميكب ووانا بطبيعتى , وانا صاحية من النوم ووانا فايقة , وانا زعلانة

ووانا فرحانة , وانا عيانة ووانا سليمة , ورغم كدة مابسمعش منك كلمات عنى غير كل خير , من يومين سمعتك وانت بتمدحنى اودام مامتك , صحيح انت مارديتش على اسائتها غير بكلمة واحدة تدافع عنى بيها بس صدقنى يوم ماسمعتك بتقولها دى ((نعمة من عند ربى)) , وكان باين عليك الرضا كنت حسانى هطير من الفرحة وقشعرت اوى من كتر السعادة والرضا عنك , متشكرة اوى ياحبيبى , انا بشكر ربنا فى كل صلاة انك جوزى

انا اللى مش متخيل نفسى من غيرك

ووصلت السيارة إلى اسفل العمارة

اليوم ودعتهم

وحشتونى جدا , يارب كلكم تكونوا تمام , على فكرة بلوجاتكم كنت متباعها بلوج بلوج بس مش عارفة الفترة اللى فاتت دى كانت عندى حالة صمت تدوينى غريب , كنت اتخنق اوى لما اكتب اليوزر نيم وماارضاش اكمل ابدا واكتب الباص ورد , زى ماتقولوا كدة كنت عندى حالة احتفاظ بالمشاعر مش عارفة والله اوصف اللى كنت حساه .

بس انهاردة بس حسيت انى عندى دفعة جامدة اوى انى اتكلم , , اصلى سلمت عليهم وودعنهم :

جايز علشان حسيت إن صفحة من حياتى طويتها او قلبتها ولازم اختم عليها واكتبها فى دفتر عمرى قبل ما يمحيها الزمن . هوه حدث عادى بس عظيم بالنسبالى , انهاردة وبعد سنة كاملة من التعب والشقاء باعلن انى اخدت الاجازة , طب وفيها ايه ماكلنا بناخد اجازات ؟؟ ( دا تعليق حد رخم بيقفل عليا وعايزنى اقفل الصفحة واقوم انام ) , بس انا بقى رخمة وهافضل قاعدة واقولكم ان الاجازة دى فعلا رااااااااااحة بعد سنة متعبة وجميلة وكل حاجة , بجد التدريس اثبت ليا مقدرة فظيعة على التحدى , تحدى الملل , تحدى الفشل , لأنى رغم انه مش مجالى إلا انى اثبت نفسى فيه والحمد لله

شعور اكتر من رائع لما كنت باسمع اولياء الامور وهما شبه بيترجونى انى ادى ولادهم السنة الجاية

, فى وليه امر قالتلى انا حساكى بجد فرصة ومش هافرط فيكى وعايزاكى تديى ابنى درس فى الاجازة , ولما رفضت بجد سمعت منها كلام جميل عنى .............جايز اكون اول مرة اعرف انه فيا ههههههههه

, وولية امر تانى قالتلى انا عايزاكى تديى لبناتى الاتنين باستثناء انك جميلة فى المادة العلمية , لأ وكمان عايزاهم يتعلموا منك الثقة بالنفس اللى عندك , عايزاهم يلبسوا زيك ويشوفوا الحياة زى مانتى شيفاها , اكيد علشان مش عارفانى كويس

ياااااااااااه على الكلام اللى يخلى الواحد واقف خجلان من الناس ومش عارف يرد , واحدة صحبتى قالتلى دول بيمشوا حالهم علشان تظبطي عيالهم , بس اعتقد إن دا كان يتقال زمان لما كانوا عيالهم معايا , دلوقتى خلاص مابقاش فى مصالح ليهم عندى علشان يقشعرونى وهما بيمدحونى كدة .

الشعور التانى اللى دفعنى برده انى اعمل البوست دا , شعورى بعيالى اخر يوم وهما ماشيين , بجد كان نفسى اعيط اوى , مش عارفة الزمن هيجمعنى بيهم تانى ؟ , ياترى ممكن اقابلهم فى الشارع صدفة ؟؟؟ طب ولو قابلتهم هيجوا يسلموا عليا ولا هيتكسفوا زى ماكنت انا باتكسف من المدرسين زمان ؟؟؟ يارب يبقوا يجوا ,, يارب فى يوم من الايام الاقى راجل كبير واكون انا عجوزة ( إن اعطانى الله العمر إن شاء الله) ويسلم عليا ويقولى ياميس انا تلميذك فلان ,, يارب فى كلامهم بعد كدة لما يتخرجوا يبقوا يذكرونى بخير , زى ما انا دلوقتى فاكرة إن ميس نادية هيه اللى اسستنى فعلا فى العربى وانا فى خمسة ابتدائى ومستر صلاح فى رابعة , ويارب ما ابقاش بالنسبالهم زى ميس فايزة بالنسبالى دلوقتى ( دمرت الانجلش بتاعى وانا فى تانية اعدادى) , ربنا يحفظهم ,

بس للأسف قعدت احفظ جملة علشان اقولهالهم اخر يوم ونسيت اقولها


الشعور التالت بقى اللى فجرنى وخلانى اعمل البوست دا فعلا , لما كنت بامضى انهاردة علشان هابدأ الاجازة , بصراحة هما لافجؤنا ولا خدونا على غفلة ولا قالولنا فى اخر اليوم اننا هنمشى انهاردة ولا اى حاجة خالص , قرف يقرفهم

قعدنا طول اليوم انا وصحابى ولا نعرف اننا هنمشى ولا اى بتاع , ونزلنا علشان نصحح ورق رابعة , وواحنا نازلين نمضى , قال ايه انتوا هتبدأوا اجازتكم انهاردة , ياحلاوة ياولادة , طب ماكنتم قولتوا من بدرى كنا ماصححناش , وكنا نقعد مع بعض اكتر ونودع بعض كما يجب ان يكون , عالم غريبة بصراحة

طبعا انا كنت مستنية اليوم دا بفارغ الصبر , بس لما بقيت ادام المفاجأة زعلت اوى , صحيح التدريس عمره ماكان رغبتى ابدا , وصحيح

غير فيا حاجات كتير اوى وللأوحش , بس اتعلمت منه حاجات حلوة اوى , واتعرفت منه على ناس زى العسل عمرى ماهنساهم ان شاء الله , استمتعت معاهم جدا , عشت سنة رغم طولها والمجهود اللى عملته فيها , بس وجودنا مع بعض كان بينسينا اى تعب , كنا ديما بنضحك فى وش بعض , كنت ابقى متنرفزة اوى فى الفصل بس تدخل منهم واحدة عليا كنت اقعد اضحك وانسى انى كنت لسة هاولع من كتر النرفزة

, كل واحدة فينا فيها اللى مكفيها , بس بنضحك فى وش بعض , وياه لما واحدة تعيط ولا يحصلها حاجة ( دماغها تخبط فى المروحة مثلا _ الكلام ليكى ياجارة _ ايه اللى طلعك على الترابيزة اصلااااااااا)كانوا بيقفوا جنبها اوى ويقرفوها لغاية لما تكره انها فى يوم قالت انها زعلانة , صحاب صحاب يعنى

هافتقدكم بجد انتوا وعيالى

closed

مؤقتا إن شاء الله

تاج فاطمة وحدى وباربى وماى هوبيزى

عارفة إن التاج كبير ورخم علشان كدة بانصح كل شاب وكل فتاة يقرأ اول سطرين وخلاص , ويدخل على الكومنتس يقولى تاج عظيم ياميس موحة وانا هاعمل نفسى مصدقة والله

الاستاذة فاطمة ( وحدى ) ال ايه هيه وباربى جيرل هانم , حدفوا عليا تاج , انما تاج يعنى , انا كنت رافضة اجاوب عليه تماما , لأنى مش حابة اصلا حد يعرف وجهة نظرى فى العزوبية والجواز لأنى اصلا مقفولة بالعافية ومجرد ماحد هيدوس على الزرار انا هاطلع فيه , بس للأسف الاستاذتين مصرين يدوسوا على الزرار وبالتالى انا هانفتح , وهما اللى هيندموا :



ما رأيك فى الجملة التى تقول ...العزوبية تاج على رؤوس العزاب لا يراه الا المتزوجين ؟؟

اه زى بالظبط ماحنا شايفين إن الجواز تاج , وإن الزوجة دى بتبقى ملكة جوة مملكتها , وإنها سبقتنا بمرحلة , لأن الدنيا مراحل مدرسة ...كلية ....شغل....جواز , وكما هوه معتاد , احنا مش بنصبر وبنحب ديما نشوف حظنا هندخل كلية ايه , طب وهنشتغل ايه , ونقعد نسعى ورا الشغل ومانهداش غير لما نشتغل , برده بنبقى مستعجلين نشوف زوج المستقبل , ونوع البطيخة إن كانت قرعة ولا حمرة , واول لما نتجوز نقول ياااااااه دا الواحد كان فى نعمة ونقلب الذكريات فى دماغنا , زى بالظبط لما رحنا الشغل وقولنا يااه ولا يوم من ايام الجامعة , هيه كدة طبيعة الانسان مايعجبوش حله ابدااااااااااا

ما هى العوائق من وجهة نظرك التى تحول بين الشباب والزواج هذه الايام ؟؟؟
اعظم الاسباب :الفلوس , لأنى اللى باشوفه إن الولد مجرد لما بيكون نفسه بيبدأ يدور ويقول للوالدة تسعى معاه فى البحث عن بنت الحلال , يبقى معنى كدة اللى كان بيمنعه بس عدم وجود إمكانيات .

بالإضافة برده لخوف الولد انه يترفض فى حين إن فى ناس ممكن يرضوا بالولد وهوه لسة بيكون نفسه طالما شايفينه بيعمل اللى عليه ( وإن قل وجود ذلك)

. وطبعا فى اسباب تانى مش رئيسية , زى حب الجامعت الفاشل اللى فى الغالب بينتهى بأنهم بيضيعوا وقت على الفاضى , وحب النت لما واحد يحب واحدة فى بلد اخرى ومن الصعب جدا انه يوصل لها بس بيضيع وقت برده على امل الوصول , والطموح الزائد عن اللزوم لدى الولد والبنت , يعنى بنت توهب نفسها تماما للشغل والفلوس وتبقى عايزة العربية ثم تفكر فى موديل اعلى ثم شقة افضل وتنسى انها بنت ولازم تتجوز وهكذا الولد كل اللى بيهمه لم الفلوس وانه ياكل ويعيش حتى لو كان وحيد

وسفر الولاد لما بيسعوا ورا الفلوس ويقعدوا سنين علشان يكونوا نفسهم والسكينة تسرقهم , لغاية مايوصلوا الاربعين , ويرجعوا فى غناء فاحش ولكن مين من البنات اللى سنها صغير هتتجوز واحد عنده اربعين سنة , ما اظنش فيه



من وجهة نظرك هل النكد موجود فى العزوبيه ام فى الزواج ؟ ولماذا ؟

النكد موجود مع الشخص نفسه , ولماذا ؟لأنه شخص نكدى ومش عاجبه حاله ابدا ,

العزوبية ممكن نستغلها فى انها حرية وراحة بال ودماغ رايقة ومافيش اى مسئوليات والفلوس ليا لوحدى , فبالتالى مافيش احسن من العزوبية , الحتة الوحيدة اللى بتنغص العزوبية إن الواحدة او الواحد ساعات بيحس انه خلاص محتاج الحنان والحب النص التانى ومفتقد الرومانسية اللى البنى ادمين العادين عايشينها , وديما بيتمنى انه يلاقى النص التانى دا بقى وبيتخيله باستمرار :

الجواز ممكن برده نخليه حلو لما احس ان اللى بحبه جنبى فى كل الاوقات , انه اختارنى انا بس علشان ابقى الملكة بتاعته , وابقى سعيدة جدا وانا باخدمه لأنه حبيبى وافرح من ابتسامته وحبه اللى بينط من عينيه

, والحتة برده اللى بتنغص الجواز : الروتين القاتل ومسئولية البيت والعيال , بس برده وجودهم فى الحياة بيبقى جميل رغم صعوبته .

ما الحل من وجهة نظرك لمشكلة (( العزوبية )) فى مصر ؟؟

يتوفر سكن ووظائف فبالتالى الشباب هيتجوزوا , الشباب يبطلوا استهتار شوية هما والشابات , الاهل يبطلوا طلبات تقطم الوسط

ما هو رأيك فى انشاء مدونة (( رابطة )) للعزاب من المدونين ؟؟؟

لأ .. مافيش حد هيشارك فيها وبخاصة البنات , كله هيتكسف

تاج غريب جداااااااااااااا من ماى هوبيز , مش فهماه اصلا ههههههههههه

.....................................................................................
التاج اهو
1- اذكر 10 اشياء عن نفسك2- اختر 5 اشخاص تهدى لهم التاج3- اترك لهم لينك تخبرهم فية بالتاج4-
لا تهدى التاج لمن اهداك اياه
5- اترك لصديقك الذى اهداك التاج اخبارية بان التاج نزل و تعالى شوفه.....
**********<

1- اذكر 10 اشياء عن نفسك

1_ من الناحية الدينية : ساعات باحس انى بعيدة اوى عن ربنا وساعات باحس انى قريبة اوى منه , بس دقت قبل كدة حلاوة الإيمان وهابقى اعمل فيها بوست كامل دى إن شاء الله

2_ من الناحية الاجتماعية : اه انا شخصية اجتماعية رغاية , بس لازم اخد على اللى اودامى , لو اول مرة ممكن ما اتكلمش ولا كلمة لدرجة انه يقول ايه الشخصية الرخمة دى

3_ اهدافى : مش عارفة بس احلامى فى الشغل خلاص انطفت شوية لما جربت تعب الشغل , ودلوقتى بقى حلمى زى اى بنت اتجوز واحد هوه اللى يتبهدل وانا اقعد معززة مكرمة , واخدمه بعنيا طالما انا مرتاحة

4_حياتى حاليا : مش عجبانى خالص , عايزة اغير الروتين المملل اللى عايشاه

5_ اعز اصدقائى : ربنا يخليهم ليا ريرى ومنى وايمان , واحدة صحبتى من ابتدائى وواحدة من اعدادى وواحدة من كليه , غير ناس تانى كتير بحبهم , بس دول اقوى ناس ليا علاقة بيهم

6_ اسرتى :تعتبر كل حياتى,,,, بافرح لما باشوف بابا مبتسم وإن قل , مش علشان هوه كئيب بس علشان قليل لما انا وهوه بنقعد فى البيت وانا اكتر واحدة باضحكه , ماما حبيبتى : اه ديما بتشد شعرها منى بس هتعمل ايه يعنى مضطرة تستحملنى , وطبعا اختى , فهيه قريبة منى لأنها اكبر منى بسنة واحدة , واختى الصغيرة انا فرحانة بيها اوى لأنى باحسها بتعيد عليا المراحل اللى كنت باعيشها بالتدريج

7_ مش عارفة فى ايه تانى اقوله عن نفسى , ممكن حالتى الصحية هههههههه , مافيش مناعة عندى , وكنت فى فترة مريضة جدااااااا , ومانساش وقفت بابا وماما جنبى بجد , لما باغمض عينى وافتكر الفترة دى , كانوا متأثرين جدا والاتنين كانوا بيقعدوا من الشغل علشان يعملولى الاشعة والتحاليل , وماما كانت تقعد تعيط عليا وبابا كان بيقعد يحفظ ملامحى , واختى كانت تقعد تهزر معايا علشان انسى وجع الحقن والمرض واختى الصغيرة كانت تقعد تعيط لما تشوفنى موجوعة وباعيط , اللهم لك الحمد

8_ بحن اوى للذكريات واحيانا كثيرة باقعد ابكى على الماضى

9_10 : المدونة زى اى مرحلة نتية وهتنتهى فى يوم ما , زى بالظبط المنتدى كنت مابعرفش اقعد يوم غير لما ادخل عليه , لكن دلوقتى سبته وماباعتبوش , بس ساعات باحن للماضى واروح رايحة فاتحة مواضيعى القديمة وافطس من الضحك , وقول ليت الشباب يعود , دا بالظبط اللى انا متخيلاه هيحصل فى المدونة انها فى يوم ما هتتقفل ومش هادخلها تانى , غير لما احن للماضى والذكريات

اختر 5 اشخاص تهدى لهم التاج
D . Esraa Hamed
Wahdi _ Fatma
واحد بيدور على قلبه
د/ اجدع بنوتة
نورى

القطة عايزة تصاحبنى

زى كل يوم صحيت متأخرة , وانا مخنووووووووووووقة اوى من الروتين اليومى اللى ريحاله , افتح الدولاب وعين مفتوحة والتانية مقفولة زى ماتكون رافضة الوضع اللى اتحطيت فيه , طلعت التونيكات اللى حيلتى كولها , والكام سويت شيرت , وابتديت ارجع بالذاكرة لأودام علشان افتكر انا كنت لابسة ايه امبارح , لحسن يحصل لبس وألبس نفس الطقم بتاع امبارح والناس تقول ماعنديش لبس ولا حاجة لاسمح الله





ظبطت نفسى واخدت سندويتشاتى وموبيلاتى وسلطاتى وبابا غنوجاتى وتوكلت على الحى الذى لا يموت , فتحت باب الشقة وقولتلهم سلامو عليكم , اه مانا رايحة اطبق الروتين









بس فعلا سبحان الله اليوم دا كان غريب غير كل يوم , اول ماخرجت شميت ريحة
النسيم جميلــــــة جدا زى مايكون بقالى زمان مااتنفستش , ويااه بقى لما قولت دعاء الخروج حسيت راحة غريبة رغم انه بيتقال كل يوم , بقلب فى الشنطة علشان ادور على الساعة علشان ألبسها واظبط نفسى على تلت دقايق علشان ابقى اودام باب المدرسة , لقيت نعناعاية ( هولز) , كلتها وياااااااااه على متعة الانتعاش , انا فى وادى والخلق المتأخرين على اشغالهم ومدارسهم دول كلهم فى وادى تانى خالص , عبده الرايق رايح الحديقة ( دا اللى هوه انا ساعتها ) ههه


دا كله كوووووووووووم والقطة الغريبة اللى طلعتلى كوم تانى خالص , وانا ماشية ومستمتعة اوى بالنعناعاية الاقى قطة بيضة فى رمادى فاتح , وصوغيرة خالص عدت ادامى ببطأ يستفز القرد السرحان , مش هاكدب واقول انى شجيع السيما وما بخافش من القطط , لأ اطلاقا انا اودام القطط باتحول لفار بعون الله , بس القط دا كان حاجة تانية بجد



المهم القطة بقت تيجى من ناحية اليمين لناحية الشمال ادام رجلى بالظبط وتلاعب ديلها وكأنها مستمتعة اوى باللعب ادامى , وتستنى اما امشى كمان وتروح جاية من الشمال على اليمين برده ادامى , قعدت تعاكسنى كدة على طول الشارع والشارع بصراحة كان طويل جدا , بسببها ماحسيتش بطوله خالص , بس مرة واحدة رحت اتزعرت وخفت لتكون شوشو

ش (شيطان يعنى ) , قعدت امد اوى رحت خبطها فى رجلى , طبعا القطة اخدت منى موقف وماشفتش ديلها اللى كان بيتمرجح ادامى دا تانى





طبعا لا ربع يوم يشغل تفكيرى ولا بتاع , كل اللى كان شاغلنى القطة دى , وطلعت على الاوضة وانا فرحانة اوى وبدأت حديثى بجملة ( انا حصلى انهاردة حدث غريب اوى ) على امل انى الاقى ودان مفتوحة وعيون مبرأة , لأ إطلاقا استهونوا بكلامى وخصوصا بعد لما سمعوا حكاية القطة , وف الغالب قالوا فى سرهم دى عبيطة دى ولا ايه


اليوم اللى بعده خرجت تانى جرى على المدرسة ونفس القطة وف نفس المكان قعدت تلعب معايا برده رغم انى كنت لابسة غير اليوم اللى قبله تماما , لا نفس اللون ولا نفس الاستايل ولا اى حاجة , جاتنى برده وقربت اول لما شافننى وقعدت تتمرجح طول منا ماشية من اليمين للشمال ومن الشمال لليمين


شعور جميل لما يكون ليك صديق(قط), وخصوصا لما يكون هوه اللى بدأ بالصداقة , صحيح هوه حيوان بس سعيدة اوى بصداقته, عارفة انكم هتقولوا عليا غريبة وهوائية وخيالية ومش منطقية , بس انا فعلا حسيت الشعور دا وحسيت إنى لازم احفره فى صفحات مدونتى طالما كان فى يوم احساس ضمن احاسيسى .

______________________________________________________

التحديث
وانا ماشية اول امبارح ماشفتش القط خالص , واتضايقت جداااااا , حسيت ان فى حاجة منى ضاعت , بس امبارح بس عرفت انه مات لما شفته واقع فى الارض ومليان دم , مش هاقولكم انى فقدت صديق لأن مافيش صداقة بتحصل بسرعة كدة , بس انا حساه كان امل او ابتسامة تفاؤل وجاتلى لغاية عندى وبعدين ضاعت منى تانى

ابكى على ...........................ب

تاج اكتر من رائع

قبل ما نندمج مع التاج الجامد دا , حبيت بس اقولكم عملت ايه فى اليومين دول , علشان كتير دخل يسألنى ويسخر منى , بس فعلا والله عملت كل اللى عايززززززززززاه بغباء خروج وخرجت زيارات وجت , وفرح وحضرت , نوم وصلاة وعملت , كل اللى قولته ماعدا قليل جدا اللى ما اتعملش , بس المشكلة انى لما نزلت بقى تانى يوم بعد الاجازة الجامدة دى , حسيت انى زى مايكون حد حدف ظلطة كبيرة على دماغى , كنت بحلم وفوقت , مااستسلمتش للواقع بسهولة رفضته شوية بإنى صحيت متأخرة , وللأسف جه على دماغى انا , وبدل ما اتخصملى ربع يوم اتخصم نص يوم , بس فعلا كانوا يومين سكرررررررررررر , يكفى انى كلمت ريرى مرتين , اللى مابعرفش اعثر عليها ابدااااااااا , اسبكم بقى مع احسن تاج قابلته فى حياتى البلوجيه


تاج امير الهدوء , ربنا يبارك له


التاج دا مش اجبارى , بس حقيقى لما عملته وتخيلت الاسئلة حسيت احساس تانى , اللى عايزه يتفضله


لو سألك غير المسلم عن نبي الإسلام بماذا ستجيبه في سطور؟

حبيبى , كان الرسول عليه الصلاة والسلام أكرم الناس وارحمهم واصدقهم واكثرهم امانه( الصادق الامين) , كان عادل , متواضع , شجاع ,
صبورررر
كان عظيما كزوج , ورحيما كأب , ومطيعا كعبد , وجميل كشخص







لو أتيحيت الفرصه لرؤية النبي صلى الله عليه وسلم في أي مكان تريد أن تقابله؟

اى مكان هقابله فيه هيبقى روضة







مالذي ستخبره به ؟

هأقوله انى كنت سلبية اوى اوى , ,وإنى كان نفسى ابقى موجودة فى عصره , علشان ابقى بعيدة عن كل الفساد دا









وماذا ستطلب منه ؟

مااعتقدش انى هابقى عايزة حاجة بعد رؤية الرسول عليه الصلاة والسلام غير رؤية ربنا







أذكر مقوله قالها النبي صلى الله عليه وسلم لصحابي تمنيت لو كان قالها لك ؟


مش متذكرة والله اى موقف , بس فى موقف تقريبا كان الرسول عليه الصلاة والسلام بيكلم فيه واحد من الصحابة فى حرب وكان مصاب وبيحتضر وتقريبا بشره بالجنة بس مش فكراه بصراحة مين , فانا طبعا كنت اتمنى انى اكون انا المبشرة بالجنة






أذكر أحب حديث لرسول الله صلى الله عليه وسلم لقلبك ؟


قال رسول الله صلى الله عليه وسلم: "لا يتمنين أحدكم الموت لضر أصابه، فإن كان لابد فاعلا فليقل: اللهم أحيني ما كانت الحياة خيراً لي، وتوفني إذا كانت الوفاة خيراً لي"




قال رسول الله صلى الله عليه وسلم: "ما منكم من أحد إلا سيكلمه ربه ليس بينه وبينه ترجمان فينظر أيمن منه فلا يرى إلا ما قدم، وينظر أشأم منه فلا يرى إلا ما قدم، وينظر بين يديه فلا يرى إلا النار تلقاء وجهه، فاتقوا النار ولو بشق تمرة".


صدق الرسول الكريم

* أذكر صفه تدل على عظيم خلقه صلى الله عليه وسلم والاستدلال عليها بموقف ما ؟


الحــــــــــــــــــــــــــــــــــــــــــــــــــــــــــــــــــــــب ( الرومانسية ) فعلا :
قرأت قبل كدة كتير عن الرسول كزوج , بس من ما قرأت : انه كان من شدة حبه للسيدة عائشة كان بيحرص على الشرب من نفس الجهه اللى كانت بتشرب منها
, وكان ايام حرب ما , بس مش فاكرة اسمها _, تأخر عن باقى الصحابة والفرسان بالفرس مع عائشة ليتسابقا ( يعملوا سباق يعنى مع بعضهم , بيحاول يخليها تستمتع )
, ولما توفى على صدرها
يااااااااااااااااااااااااه اى رومانسية دى بس , وبنقول على اللى على ايامنا دى رومانسية ؟؟؟؟ طب اذاى ؟؟؟

الصبر : الصبر على الجوع ( لما كان بيربط حجر على بطنه من الجوع ) , ( ولما كان مابيرضاش ياكل من التمر اللى ادامه خوفا من انه يكون تمر الصدقة )

الصبر على الشدائد : لما كان فى الاول بيقوم بالرسالة وماكانش فى حد بيسلم , كان ممكن ييأس , دا الواحد لما بيجيى يعمل مشروع ولا يفتح دكان ويقعد سنة مش شغل بيقله , الرسول صبر كتير .

الصبر على البلاء : يوم موت ابنه لما قالعليه الصلاة والسلام فيما معناه : ( إن العين لتدمع وإن القلب ليخشع , وإنا على فراقك لماحزنون وما نقول إلا إن لله وإنا إليه راجعون )

البساطة ( مش بيعقد الامور ) : زى الموقف بتاع الرجل اللى كان عايز يزنى والرسول عليه الصلاة والسلام رد عليه بكلام فيما معناه : لو ترضاه على اختك فانا موافق


هل هناك تأثير لرسول الله صلى الله عليه وسلم على شخصيتك أو حياتك او بيتك إذا كانت الإجابه نعم فأذكر مثالا واحدا لكل منهم ؟

البساطة والصبر , صفاته باحاول اطبقها , بس اكيد مش هاوصل لنفس الدرجة بتاعت سيد الخلق

يومين يادى الهنا

يووووووووووووووووومين اجازة ياخلق , مش عارفة اعمل ايه ولا ايه , حاسة انى لو قعدت ارتب اللى عايزة اعمله فى اليومين دول , عوقبال لما اوصل لأخر سطر هيكون جه يوم الاحد وانزل المدرسة تانى .

المهم انا عايزة اصلى كتيرررررررر , وعايزة انام برده كتير , وعايزة ابات عند تاتا , وخليت ماما عزمت ولاد خالتو , طب مانا كدة مش هاعرف اروح لتاتا .


وعايزة اقعد على الياهو كتير , واتفرج على البلوجات , وعايزة اقعد اعمل دستتين بوستات واحطهم فى الدرافت علشان اما انشغل تانى بالدراسة , يادوب ادخل اعمل بابليش , بوست لمدة يومين بس , ويارب اعرف استمتع بغباء

أكل وفرجة ولا السنيما

مش حرماكوا اهوه من حاجة

بصوا مبدأيا قبل ما البوست يبدأ كدة , ممنوع التدخين , وممنوع الحزن , عايزة ابتسامة من الخد دا للخد دا , البوست مليان صووووور ,

ومليان كلام برده , اللى مصدع ومش طايق يقرأ ما انصحوش بصراحة , وادينى جايبلكم تورت وجاتوهات ,

والمناسبة : علشان افتح نفسكم قبل ما تقروا البوست , كلوا الاول وبعدين ابدأوا قراية :

نبدأ بسم الله :

ورن الموبايل ياااااه دى الساعة بقت ستة , جريت علشان اتوضأ وصليت ولبست بسرعة , جريت على المدرسة , , تأخير ربع يوم ياميس كالعادة , ماشى ياستى احنا مابيهمناش اصلا , احنا واخدين الشغل دا اصلا تضييع وقت , أطلع جرى الاقى العيال قاعدين بينقلوا فى المجموعة اللى انا كتباها من اليوم اللى قبله , والنور مضلم ( مش لأنهم عندهم كآبة وبيحبوا الظلام من دلوقتى , ولا لأنهم رومانسيين , كل الحكاية انهم ما بيعرفوش يطولوا السويتش بتاع النور) , افتح لهم النور , واقولهم يلا بسرعة حلوا اللى على البورد , اقعد اسرح شوية فى الكون والزمن والعمر والبتنجان , وبعدين اتفاجىء بصوت مسح حبل افكارى باستيكة ناشفة , صوت معاذ بيه وهوه بيقولى ( ياميس حضرتك ماكتبتيش التاريخ ) , اقوم اتمختر وامسح التاريخ القديم , واقولهم هوا انهاردة كام ياولاد , ويهز ودنى الوسطى صوتهم وهما بيقولولى انهاردة 6 _ 3 _ 2008

ياااااااااااااااااااااااه معقولة 6 _ 3 _ 2008

انا كنت عارفة انه قرب , بس مش اوى كدة

خلاص يعنى باقى يومين واتم اتين وعشرين سنة ؟؟؟؟ , مش هاقول الزمن جرى

, لأ بس لف واتغير , سبحان الله الواحد كان راسم السنة اللى فاتت لنفسه طريق , ومشى فى طريق تانى غيره خالص , ممكن اكون كنت باتمنى مشوار تانى خالص وحواوات مختلفة تماما , بس لما لقيت نفسى فى الطريق الجديد اكتشفت انه فعلا فيه خير ليا اكتر من اللى كنت عايزاه .كتير اوى من المدونات اللى دخلتها يوم عيد ميلادها كانوا بيكتبوا بالبونت العريض سؤال كدة واتكرر كتير :هوه احنا ليه بنحتفل بمرور عام من عمرنا وبنفرح اوى ؟؟؟؟؟؟؟؟؟؟؟؟؟؟؟؟

اليوم يومى بقى دلوقتى واقدر ارد , بنحتفل باليوم دا علشان ننهى السنة اللى فاتت بكل مافيها بحلوها ومرها , باحياءها واموتاها , علشان هنبدأ صفحة جديدة فى حياتنا , انا باشحن البطرية فى اليوم دا , بأبدأ بطموح جديد بحب جديد , مشاعر جديدة , كله حاجة جديدة.علشان كدة انا فرحانة إن الصفحة الجديدة دى هتتفتح بعد يومين , وبأمل انها تكون احسن , وبالنسبة لطموحى فى السنة الجديدة فهاحتفظ بيها بقى فى الدرافت او ممكن احتفظ بيها فى قلبى وخلاص , ولو حيانى ربنا للسنة الجاية هابقى اقولهالكم , ونشوف حصلت ولا لأ

اما بالنسبة للأحتفال باليوم دا , فمتهيألى إنى لازم هاحتفل بيه مع عالمى الجديد , اللى هما عيالى يعنى, ومضطرة اعرفكم عليهم :

بس قبل ما اعرفكم بيهم هاقولكم جملة عمتو سماح لما قولنالها على بنتها وحشة , قالت بنتى فى عينى احلى واحدة فى الدنيا , لو بضب ومعفنة , وطختوخة , ومناخيرها طويلة , هتبقى ديما فى عينى سيندريلا , مهما شافوها الناس وحشة , علشان كدة اعرفوا انكم مهما شفتوا عيالى دول وحشين فهما فى نظرى : سندريلات و علاءييين الدين:

عالمى الصغير

نبدأ بالجيرلز :

كان فى اليوم دا فى غياب كتير فاكيد مش هما دول بس الجيرلز , وإن كان دول اكتر عيال باموت فيهم .

البويز بقى ( على فكرة انا بحب البويز اللى عندى فى الكلاس اكتر من الجيرلز وباحس إن الجيرلز بيغيروا من الموضوع , بس هاعمل ايه الولاد اشطر ودمهم سكرررررررررررر) هههه

هاعرفكم بقى على اقربهم إلى قلبى , وإن كان اكيد مافيش تفرقة , بس انا باعز اوى الشطار واللى دمهم خفيف













:




:




:




:

اللى على اليمين دا حبيبى حبيبى حبيبى ((( معـــــــــــــــــــاذ ))) , حتة سكرة , باموت فيه , اشطر عندى , عمرى ما فكرت اضربه , يحب اوى اسئلة الذكاء , وفلوسى مخلصاها عليه من كتر ما بيبهرنى باجاباته , بجد ماشاء الله عليه ربنا يباركله , ويارب ديما كدة متفوق , اول لما تبدأ الفسحة , الاقيه نازلى فى مكان اشرافى , وياه لما ميس كدة عندنا قالت ادامه المس بتاعتكم دى وحشة , بكل قوته قالها لأ حلوة , كنت حاسه انه عايز يطلع المطوه ويضربها بيها , لو قعدت اوصف باحبه اد ايه مش هاخلص

اللى على الشمال : دا مارتن نفس مستوى معاذ تقريبا , بس هاااااااااادى اوى وبرده ما باضربوش غير عند الشديد الاوووووووووووى , شخصيته هادية حبيتين مع بعض الانطوائية , فبيخاف يهز معايا باين , بس باموت فى ضحكته البريئة .

اللى تحتهم : الاستاذ حسسسسسسسسسسسسن , ممتاز زيهم تمام , اصل دول اشطر تلاتة عندى تقريبا , بس الباشا حسن بقى شقى اوى اليومين دول وشكله عايز يتظبط , بقاله كام يوم كل لما يشوفنى مش عليه غير جملة :

May I go to the bathroom

لما كرهنى فى نفسى , بس برده باموت فيه

_____________________________

دا بقى محمد خالد , اسماعيل ياسين بتاع الفصل , ولو انى مش بحب اسماعيل ياسين , بس هوه الواد دا عليه حركات وكلام يفطططش من الضحك , لأ وماشاء الله عليه رجولة فظيعة , عمرى ماشفت دموعه بصراحة غير مرة واحدة , والغريبة انى ساعتها ما ضربتوش , انا بس قولتله انا زعلانة منك يامحمد ياخالد , ومنها بحر دموع , باضربه بالخمس عصيان ,وبيعمل نفسه بيضحك مع انى بابقى عارفه انه بيتقطع , عثل ياولا ياحمادة والله

دى باقى الصور :

وبما إن الموضوع دا مليان صور فبالمرة هاحطلكم صورة نور بنت عمتو , اللى كنا بنقولها عليها وحشة :

:

:

:

الصور دى فى مراحل مختلفة من عمرها ههههههه

ماتنسوش الهدف الرئيسى من البوست , انكم تقولولى كل سنة وانتى طيبة

ذكريات

بقالى زمن مابقلبش فى المواضيع القديمة بس جيت بالحظ كدة بابحث فى جوجل عن اكلة معينة , وباقلب فى الصفحات لقيت لينك كدة انا عارفاه دخلت عليه وفطست من الضحك , جايز ما تضحكوش زيى علشان انتوا مش فى الموقف , بس عارفين لما يكون حد عمال بيسرد عليك الذكرييات مش بتفاصيلها لأ بفتافيتها فتفوتة فتفوتة , قعدت اضحك اوى لما قريت البوست دا , مقارنة باللى انا فيه دلوقتى ,

ملحوظة: البوست دا كان فى اجازة اخر السنة اللى فاتت ,وبالتحديد من سبع شهور فاتوا , بس فعلا كل حاجة اتغيرت , دا حتى اخويا ابو رجل مبجلة سافر , فعلا ممكن نقول حياتى اتغيرت 360 درجة بعد الشغل :

دوسوا عليه وماتخافوش :

اضغط

ماى هوبيز

دا مش تاج دا عصررررررررر , اللى هيقرااااه هيعمله عنده

, ايوة شمعنة انتوا تعرفوا كل حاجة عنى ,

تاج ماى هوبيز (اللى حساها بتعملى محضر)ه






اسمك؟
سماح
و تقدر تقول ميس سماح



اسم الدلع المشهورة بيه وسط أصحابك؟
يعنى فيه بيقولولى موحة كتير , وفى بيقولولى ياصغيرة ( لأن شكلى بابى فيس حبيتين) بس تقريبا





كنت طالب شاطر في المدرسة؟

فى الابتدائى : مش اوى
فى الاعدادى : اااااااااااااااه ممتازة ابتديت اعتمد على نفسى بعيدا عن مامتى المدرسة
فى الثانوى : اه كنت شاطرة بغباء , وكنت معروفة اوى للمدرسين , كنت فى ادبى ,انا واتنين تانيين بس اللى كنا جايبين فوق التسعين ايامها وكنا حاجة غريبة جدا بالنسبة للفصل
الكلية : إطلاقا ماكنتش اعرف معنى الشطارة , يعنى كباقى الطلاب المكبرة جيد واقلب




مجال دراستك.؟

ليسانس الألسن جامعة عين شمس قسم ألمانى ولغة تانية انجلش





ايه كانت أحب مادة ليك في المدرسة و الكلية؟

فى المدرسة حبيت علم النفس والالمانى جدا
فى الكلية : كنت باحب المادة على حسب دكتورها




كنت عايز تطلع ايه و انت صغير؟

حاجات كتير دا انا عملالها بوست خاص , بس اللى كان غالب يعنى صحفية





اسم مدونتك؟

(((((((((((زى الهوااااا ))))))))))))))))





لماذا اخترته؟

برده عاملة بوست كامل عن اسم المدونة ,اول بوست خالص فى البلوج , باختصار لأن اللى بحبه زى الهوا

و ما هي نيتك من اختياره؟

زى ما اى واحدة بتحب دايما يبقى اسم حبيبها اودامها , انا بحب اسمه يبقى ادامى علشان افتكره باستمرار





صورتك في المدونة ... رمزيتها؟

صورة بنت رقيقة وسكر , اما باشوفها بافتكر عيالى فى المدرسة, ساعات بافتح البلوج بس علشان ابص عليها





هل فكرت في اغلاق مدونتك؟

اه , كتيرررررررررررررررر





والسبب؟
لما نفسيتى بتبقى تعبانة اوى , وماباحسش انى عارفة اعبر بالكتابة , بابقى متضايقة جدا من المدونة , ومش بس عايزة اقفلها لأ كمان اولع فيها , لأنى ساعتها باحس انها مش بتقوم بوظيفتها , بس هيه ساعات بتساعدنى جامد فى انى اخرج من مودى لو متضايقة





لماذا دخلت عالم التدوين من الأساس؟
ههههههههههههههه كنت باشوف مدونة مشمش وباحسده عليها جدا , ولقيت ريرى هتعمل مدونة جديدة ليها , حتى ساعتها باين كنت باسألها هيه بتعملها اذاى وقعدت تتريق عليا وقالتلى ابعتى جواب لنقابة المدونين واعملى طلب بعمل مودنة والغريب انى صدقتها , فلاحين بلدنا بقى , بس لما عملتها ساعتها عملت البوست بتاع زى الهوا وكنت فاكرة إن ماحدش يقدر يشوفه غير انا بس واى حد هاسمحله , بس فوجئت بناس كتير كدة معلقة كنت هاعيط , واقعدت اقول دى خصوصياتى , بس بعد كدة فهمت انه مكان جميل للتعبير اللى بالداخل مع مشاركة الاخرين لك احساسك

أحلى جملة قيلت لك في وصف مدونتك؟

اخر بوست فى ناس كتير قالوا جمل عجبتنى , بس احلى تعليقات اللى مش بس بتعجبنى لأ كمان بتبهرنى هيه تعليقات ماى هوبيز بتخلينى اقف ادامها كدة شوية , وفى برده تعليق زمان كان من واحدة مش معروفة ومش عاملة بلوج , قالتلى انا مش عاملة بلوج بس فعلا متابعة بلوجك وكل بوست فيه وقعدت تتكلم عن البوستات برده عجبنتنى , وفى بقى تعليق قشعرنى جدا بس هوه ماكنش فى وصف بلوجى كان تعليق على بوست اهوه :

رئيس جمهوريه نفسى said...
واللهى لو فى يوم كان الى درسى انجليزى اتعامل معانا زى ما انتى بتتعاملى مع الاطفال كنت دخلت كليه السن صوت الضمير وانك بتزعلى لما تحسى انك قصرتى مع الاطفال ده دليل على ان معدنك نضيف ربنا يكرمك ان شاء الله الاطفال بقى دول احباب الله ونقطع ضعفى الذيذه

التعليقات بالنسبة لك .. أهميتها؟

اما التعليقات اللى عندى فبترفع معنوياتى لأنها بتحسسنى إن فى حد بيشاركنى احاسيسى , وبعدين بتفرق معايا كمان لأنى من النوع اللى يحب يستفيد من الاخرين جدا , ومهما كان الرأى الاخر صغير باحاول استفاد منه

حد قل أدبه في التعليق .. عملت ايه؟

اه

هوه : بوست هايف جدا جدا جدا كالعادة
انا :ههههههههههههههههههه بس الحقيقة انا مطلبتش رأيى حضرتك للأسف , وطالما مش عاجب حضرتك متابع بوستاتى ليه باستمرار دليل على كدة كلمة كالعادة , ربنا يهدى يافندم



إيه اللي هيحصل لايميلك لما تموت؟
انا فكرت كتير فى الموضوع دا , حتى كنت بافكر احط اغنية زى الهوا , بس قولت ولو موتت ؟؟ فرفضت مبدأ انى احط اغانى فيها , وفكرت انى اكتب موضوع فى الدرافت عبارة عن ادعية وكلام كدة تفتكرونى بيه لما اموت وادى الباص ورد لريرى , وفعلا اديتهولها بس ماعملتش لسة الموضوع , ودخلت قبل كدة مدونة حد لقيته عامل حركة رائعة , كاتب فى حالة انى موتت دوس هنا , وعامل موضوع روعة , مش عارفة يارب اكون قررت هاعمل ايه , قبل ما اموت





اديت الباسورد لحد قبل كدة؟ايه كانت علاقتك بيه؟
اه ريرى بس

شخصيتك... نوعها ايه؟
غامضة, وديما خايفة من اللى جاى

مودك ايه؟
عادى



الأكلة المفضلة؟
محشى ( بكل انواعه )
بيتزا
كشك ابيض

السفر بالنسبة لك؟
السفر كمواصلة اكيد باكرهه , بس كهواية باموت فى السفر وتغيير مكان الاقامة





صفات أخدتها من بابا؟
مممممممم ممكن حتة انى مااتكلمش مع اللى اودامى كتير فى اول مرة لغاية لما اعرفه كويس وابتدى اعيش حياتى عادى, بمعنى اصح مش اول لما اتعرف على حد اظهر بطبيعتى .





صفات أخدتها من ماما؟
انى اى حاجة على اعصابى , وممكن من كتر الزعل يجيلى مرض






اكتر 6 حاجات بتكرهها؟
خصم الربع يوم اللى باخده كل يوم بسبب التأخير

انى انزل لغاية الكانتين وماالاقيش اللى انا عايزاه

صفة البخل

الطيبة لدرجة الهبل

إنى اتظلم والاقى حد بيطلعنى غلطانة كمان

إنى اشترى لبسسسسس



أكتر 6 حاجات بتحبها؟
ضحكة الرضا لما باشوفها فى وش بابا وماما

فرحة ولى الامر لما ابنه جاب الفول مارك

فرحة اتنين حبوا بعض واتجوزوا بعض او مخطوبين حتى

يوم اجازة من الشغل

الاستيكة اللى بريحة الفراكه سواء البمبى او البيضة



الشغل بالنسبة لك؟
حاجة جميلة بس متعبة , ومسئولية لو مش قدها لازم تسيبها



ايه الكمبيوتر و النت بالنسبة لك؟
مجرد سد للفراغ , ورررررررراحة من التعب , وبالتالى اى حاجة فيها راحة لازم تبقى ممتعة






ما أحلى بوست كتبته؟ ضع اللينك ثم اذكر لماذا؟
زى الهوا ياحبيبى

لأنه اول بوست اكتب فيه احاسيسى علنى اودام الناس

مش بياعة ومش مترجمة

لأنى كنت عملاه وانا مترددة لكن ردود الناس خلتنى اثبت على رأى واحد

عارفين الواد دا يبقى مين؟؟

لأنى كنت حزينة اوى وانا باكتبه ومن ردود الناس حسيت انى فعلا قدرت اوصلهم الحزن اللى جوايا


أحلى مدونة قرأتها؟
لأ والله ماهاعرف احدد , دا سؤال صعب جدا , بس انا طالما زورت مدونة اكتر من مرة يبقى هيه عجبتنى

جربت تنام فى مواصلة

كنت خارجة انا والاسرة العسل بتاعتى ورجعنا على الساعة 10 كدة فى المينى باص , , المهم كان فى بنت شيك جدا وامورة بغبااااااااااااااااااااء واقفة مش قاعدة , بس شكلها كان مرهق جدا لدرجة تصعب على اللى ادامها والله كنت بافكر اقوم واقعدها لأن رجلى ماكنتش وجعانى , بس المشكلة إن ماما كانت معانا , وماما مبدأها انى مااركبش اى مواصلة فى الدنيا هاقف فيها , ماعدا المترو حبيبى طبعا , غير طبعا إنى خفت اختىتبرقلى , اصلها بيطرية وديما حريصة على انها تفرجنى على الحيوانات وهيه بتتشرح , علشان يعنى تعملى رعب واحترمها زيادة عن اللزوم , فخفت تبرقلى ولا بتاع .




المهم لما مشى المينى بص شوية البنت ابتدت تنام وهيه واقفة رغم كل شياكتها دى التعب فعلا كان مموتها , ومن هنا يبدأ موضوعنا , انا طول عمرى استغرب جدا الناس اللى بتنام فى المواصلات دى , واستنكر تصرفهم دا اوى , عايز او عايزة تنام طب خلاص يبقى تنام فى بيتها وبلاش تنزل , او تصبر لغاية لما تروح البيت , البرسيتيج بيبوظ اوى للناس اما باشوفهم نايمين , بوق مفتوح وعين محولة , دا غير طبعا اللى بيقعدوا يندغوا حاجة وهما نايمين رغم إن بقهم بيبقى فاضى تماما , قرف يعنى






دا كان مبدأى من صغرى , لكن السنادى جربته بصراحة

, فى اول السنة كنت باخرج من الشغل على البيت اقعد ساعتين لغاية لما النوم يجيى بغباء اروح نايمة لغاية الصبح , لأن فعلا الشغل مع العيال متعب متعب متعب , فى يوم جت عمتو طلبتنى وقالتلى اخرجى من المدرسة على عندى يابت ياموحة عايزاكى ضرورى طلبت ابوكى وقولتله , خرجت عليها , ويادوب اول لما وصلت جه معاد نومى , خلصت قعدتى معاها بصعوبة وانا بنام على نفسى ركبت المينى بص , اقسم بالله مابقيتش قادرة افتح عينى ولو خرم حتى ابص بيه انا فين , وكان واقف ادامى شباب يعنى المفروض ابقى خجلانة ولا بتاع , بس التعب كان قاتلنى , بقيت عمالة انام واصحى الاقى بوقى مفتوح , اقول الله مانا طول عمرى بانام ماحدش قالى إن بوقى بيتفتح , واروح فى النوم خالص واصحى فجأة الاقى الولاد دول باصين عليا وبوقى مفتوح , اقول يانهار دا زمانهم شافوا زورى

بجد التعب خلانى نسيت اى برستيج واى حاجة غير انى فعلا ميتة نوم , موقف تانى برده

, كنت فى فترة كدة بيجيلى ارق السنادى بردك , وماكنتش باعرف انام بالليل لمدة يومين , جيت اليوم التالت رحت المدرسة وحل النوم بقى فى اللحظة دى , نمت على الترابيزة السيراميك اللى فى مكتبة المدرسة علشان سقعة شوية وتفوقنى , بس رغم كدة مافيش فايدة , رحت ظابطة الموبايل على معاد الحصة بتاعتى علشان لو لا قدر الله رحت فى النوم , وفعلا لقيتنى باصحى على صوته , رحت قايمة جرى على الحصة , وكل اللى شايفنى , ايه ياسموحة انتى كنتى نايمة يابنت ولا ايه , (((حد ذكى يفتكر إن عينى كان مقفولة وانا ماشية ولا بتاع , اقوله لأ , اصل البلوفر لما كنت نايمة عليه علم على وشى علامات النوم)) ههههه

المهم جريت على الفصل , ودخلت لقيت العيال صاحين اوى قعدت اسأل فيهم قلت جايز يفوقونى , وجبت نسكافيه رغم انى مابحبش اشرب اى حاجة فى الكلاس , مافيش فايدة , لقيت نفسى باقول للعيال الجملة وانا نايمة , اول مرة فى حياتى اجرب النوم وانا واقفة , واقولهم يقولوها عشرين 20مرة لعلى استطيع انى افوق نفسى , مافقتش نهائى فى الحصة دى , ومااشتغلناش غير هي الجملة بتاعت العشرين مرة دى , بس العيال صموها , ومافوقتش غير وانا خارجة من عتبة الباب , بس لولا رحمة ربنا لقيت مدرسة الكمبيوتر تعبانة , اخدت منها حصتها وظبطت العيال ضرب وتهزيق

والمفاجأة الفظيعة إن الجملة اللى اديتهالهم اللى صموها دى هيه اللى جت فى الامتحان والاغرب إن فى منهم عيال غلطوا فيها ( وش بيشد شعره )

سؤال إجبارى ليكوا بقى : نمتوا قبل كدة من كتر التعب فى مواصلة ولا بتاع ؟؟؟؟؟؟؟؟؟؟؟؟