احلى ايام عمرى بعيشها معاكى اموحا ;)

7/12/2013

لسه مش مستوعبه انى مدام حازم

 ولا انى كنت عروسة بالفستان الابيض من كام يوم

كواليس ماقبل الفرح

انهاردة5/12/2013

يعنى باقى يومين على فرحى 

ماما :

هاين عليها تجيبلى الدنيا ومافيها علشان تشوفنى مبسوطة ... عمالة بتدعبس وتسأل الناس احطلها ايه فالتلاجه .. اجيبلها فاكهة ايه .. نفسك فى ايه ؟؟ خطيبك بيحب ايه؟؟؟ 

ومش بتقولى عايزة فلوس تانى ليه ولا خلصتى الاولانى فى ايه؟

بابا :: 

فرحان وطاير .. بس كالعادة الكبر واخده ومش مبين 

بينشف دماغه فى حاجات مش وقتها

بس من جواه قلبه بيرقص م الفرحة وبيدعى تتم على خير 

اميرة ::

رغم انها بروطة إلا انها فجأة نط فيها النشاط وبقت بتخدمنى بعنيها .. كل ماتشوف حاجة اودامها عقلها يصورلها انها هتنفعنى وتجيبهالى 

وايام كتير كانت بتروح معايا بتاع 3 مشاوير فى النص بين الشغلين بتوعها .

سارة ::

مش فالحة غير فى انها تحسبلى باقيلى كام يوم وسريري يبقى فاضى والشقة تبقى مافيهاش سماح :D

وهتلبس ايه فالحنة وهتلبس ايه فالفرح

هيكون فيه اغانى ايه علشان ترقص هيه وصحابها 

هتخرج معانا ولا لأ 

دا غير انها هتموت وتعيش معايا اول اسبوعين علشان تاكل الاكل بتاعى كله 

:D

صحابى :

معايا خطوة بخطوة بيطمنوا اذا ناقصلى حاجة وهيموتوا ويخدمونى 

دا غير ان فيه ناس كتير مش قريبين ليا بيعرضوا عليا مساعدتهم ومش عزومة 

معارفى ::

اكتشفت ان فيه كام حد كده مكانته فى حياتى ماكنتش كبيرة بيعمل علشانى حاجات وخدمات مش متوقعه .. ولو اتنططت مش هاعمل ربعها .. وبدون مقابل 

وبيقولولى على طول جملة (( دا اقل حاجة ))) انتى جمايلك مغرقانه 

حازم ::

رغم الضغط اللى عليه .. زاللى هوه 5 اضعاف الضغط اللى عليا إلا انه بيحاول يكون معايا بيضحك ومبسوط ومش بيقفش ...

 رغم انه 

شوية بيتحول .. وتحول مخوفنى منه بس اهم حاجة انه حاسس بيا وحاسس اد ايه انا قلقانه م الخطوة دي

 بس اللى فهمته انه مش بيحاول يفكر فاللى جاى وسايبه على ربنا ... مش قلوق زيى  

انا ::

بقيت عصبية .. باكل ضوافرى .. شكلى وحش ... عينى دخلت لجوه .. السواد اللى تحت عينى بقى اسود غامق فاقع ... وكل يوم ورايا 5000 مشوار 

وتعبتتتتتتتتتتتتتتتتتتتتتتتتتتتتتتتتتت

لمجرد اما بافكر احط راسى عالمخدة بتبدأ الافكار تلعب بدماغى الكورة .. وافكر هاقدر اتحمل مسئولية بيت ؟؟ طيب وهاعرف ارضى ديما جوزى واحسسه ان الحياة احسن بعد الجواز ,,, والاكل اللى مابعرفش اعمله هيجيلى يوم وابقى باعرف كده مع نفسى .. ولما ربنا ان شاء الله يكرمنا بالذرية .. هاقدر اطلعهم عيال جامدين كده وصالحين ؟؟

واصلا اصلا اذاى هابات بره بيتى وهتتحول حياتى بالشكل دا 

شغلى ::

انا كان نفسي اكمل فى الشغل دا بعد الجواز ومايغذلنيش ... بس النصيب انى اسيبه ... وفعلا اكتر حاجة استفدتها من شغلى هيه الناس .. عرفت ناس كتير جدا  ومن كل فرد فيهم اتعلمت حاجة جديدة .. دا غير انى كسبت صحبه جديدة ..ربنا يديم بينى وبين الناس دى المحبة :)

tired

Need to sleep calmly without thinking :)

My man

بيقولوا ان الرجولة مواقف 

وانت مواقفك معايا كلها بتقول انك 

ارجل راجل 

<3 i="">

باقى من الزمن

40 يوم و 15 ساعه و 36 دقيقه وتبقى بتاعتى :)

هاتبقى احلى عروسه على فكره

Re-Real happiness

ربنا يحققلك حلمك ويكمل فرحتك

Real happiness

فرحتى بجد هتكمل

 لما إن شاء الله ربنا يكرم اختى بالزوج الصالح 

واخويا بالذرية الصالحة واشوف الفرحة فى عين ماما وبابا 

:) يارب ماتحرمنيش الفرحة دى  

بعض الفشل

ربنا يحميك ويخليك ليا يابابا 

____________________________________

بقيت باخاف افرح وخصوص لأنى 

بدأت اقتنع بإن الدنيا مش بتفرحنى غير علشان مجهزالى صدمة كبيرة 

__________________________________

رغم انى مش باحس مع حد فالدنيا بالامان اد مابحسه معاه إلا انى خفت وقتها وهيه الورقة بتتكتبوحسيت ان مجرى حياتى كلها هيتغير 

__________________________________

مش عارفة افرح ولا اخاف ... بس غالبا انا فرحانة بنوع من القلق 

__________________________________

هوه ممكن احساس الفشل اللى بيلاحقنى دا يموتنى ؟؟!!!!

__________________________________

  احبطت جدا من رد الفعل ... وخصوصا اما تلاقى اللى المفروض يبقى معاك وسندك وبتاعك بقى عليك وضدك بدال مايكون معاك 

فى اقل حق ليك .. 

وبعدها فعلا اقتنعت ان ماحدش هيحبنى ويحترم رغباتى اد ابويا ... ربنا يقدرنى واقدر افرح قلبه

___________________________________

اذاى كونى ابقى مستقلة بحاجاتى اصبح حاجة مش من حقى 

____________________________________

كل ماابقى فرحانه ومتعايشة .. يجيى هاجس فى دماغى يفكرنى ان بعدى كان سهل ومش بيوجع وابدأ اضغط على قلبى علشان يشد ومايبقاش عبيطا

____________________________________

المصيف دا جاى فى وقته .. انا فعلا محتاجة انضف من اى حاجة مديقانى او مزترانى وخصوصاا الفترة الجاية 

Can't forget

حقيقى باحسدكم

   بالنسبة للناس اللى مابتشغلش وقاعدة فالبيت

سؤال بسيط :

انتوا ازاى مستحملين حياتكم كده ؟؟؟؟؟

بجد انتوا عندكم قدرة مش عند ملايين غيركم 

ازاى بتبقوا طايقين الاربع حيطان الثابتين دول ..

وعصبية كل حد راجع من شغله اللى بيطلعها فيكوا 

والسكوت والصمت وفترة السرحان اللى بتيجى بسبب ان مافيش اى مجهود عقلى كبير بيتم ولفترة كبيرة

انتوا ازاى جامدين كده ؟!!!!!!!!!!!!!!؟؟

همسات

عارفة انك بتحبنى ياربى ... واكبر دليل على كدة انى كل مااجى اغرق الاقيك بتطلعنى تانى

بس للاسف انا اللى مابحبش الدنيا 

__________________________________

المشكلة اللى كانت عندنا ان كل حد اتوجع بالحاجة اللى دايقته وانشغل عن انه يحس بوجع التانى 

___________________________________

انا حساه هيجيبه الارض وخايفه عليه من الندم :(

___________________________________

مش عارفة احسينى للمرة التانية ولا ابقى ابدا زى اول مرة ((حماسة الشباب ضاعت خلاص)) هع

___________________________________

ماهى دى طبيعة بشرية فينا ... هارجع واقول تانى :: ماحدش فالدنيا يلاقى دلع ولا يدلعش

واكسر للبنت ضلع يطلعلها 24 :)

___________________________________

No answer from my side for such as these cases :s

Any subject

I'll keep my comments in my mouth & won't advice anyone .

Every one will be responsible for his actions and behaviors as my advise is always considered as a distaste .They feel as if I'm their enemy and I only aim to my personal benefit.

Stop putting me in this circle . Now  I am trying to build my new own life .

I try to be patient , keep the good feelings  as I refuse to lose you .

I won't protest because may be the work's stress makes him like that and also because he suffered alot from me.

Keeping silent in a quiet place is the best decision .

something new can break my bad routine.

feel that I became one of his last priority . 

Partially died . 

عودة للكتابة

كنت مقررة انى ابطل اكتب هنا بقى .... بس باينله بقى ادمان وبقى هوه مصدر الفضفضة الوحيدة 

بالنسبة للاحلام اللى بنصحى منها على احقر واصعب حقيقة دى .. كانت بتبدأ ليه من الاول ماكانوا يسيبونى عايشة فالحلم

واضح ان الواحد بعد كده لازم ياخد باله من كلامه ايا كان قرب اللى بيتكلم معاه علشان جايز يكزن قربه دا مجرد تعود وهوه عبيط ومايعرفش او جايز كمان يكون تسلية ومش بعيد يكون وهم وهوه مش حاسس ماهو كل حاجة ممكنه 

عايزة حالا اروح البحر واكلمه زى زمان مابقاش ينفع استغنى عنه 

في شغلى ,, انا فاشلة 

هوه ليه ماحدش حاسس بالخنقة اللى جوايا .. علشان باضحك يعنى ومش قلباها نكد؟؟؟ جايز وممكن واحتمال !!

بقيت باخاف 

ايام وبنعيشها.....

في كلام كتير جوايا زعلان :(

something is lost

كسماح

مش مبسوطة خالص

وعايزة اعيط

صحابى نعمة

الاصدقاء نصيب

وانا نصيبى حلو اوى بجد فيهم 

صحيح مش بنتقابل كتير 

وكل فين وفين لما بنتكلم 

بس بنحب بعض وبنشتاق لبعض من غير اى مصالح

لما واحدة منهم بتيجى في بالى بابتسم و باحمد ربنا على النعمة دى

can't stand

Everything is Fake

Everyone is abuser 

Need to live alone 

انا مأريفه

يعنى ايه مأريفه؟؟؟

 يعنى عندى إحساس بالأرف ما اعرفش سببه

وفعلا مابيبقاش فيه سبب؟

لأ طبعا فيه اسباب كتيرة بس من كتر ماهيه متكررة الواحد بدأ يحس ان مافيش سبب يخليه يزهق ويتدايق

زى الروتين اليومى 

الشغل اللى بيفرض عليك تشوف ناس مش حابب تشوفهم

الاخبار الجديدة والسعيدة اللى مش بتحب تزورك رغم انها بتزور ناس كتير اوى غيرك

الشلل الوظيفى (لما مايبقاش فيه طموح وظيفى )

الغيرة والحقد .. لما نفس الشخص اللى معاه نفس مهاراتك يكون بقى تايتل وصاحب وظيفة جامدة فى حين انك قاعد فالبيت او بتشتغل فى مجال تانى خالص .. والحقد دا مش عيب 

المحسوبية والظلم اللى حواليك

تكشيرة الناس فى وشك وعصبيتهم عليك علشان بيتعشموا فيك انك انت اللى هتستحمل غضبهم رغم ان اللى صايبهم صايبك

 رغبتك فى الاحساس بالاهتمام من الناس اللى حواليك وخصوصا اللى بتحبهم ..فى حين انهم مشغولين بحياتهم وشغلهم ومش فاضينلك اصلا

فرصة كانت اودام عينك وسيبتها بسبب غباءك ونفسك تضرب نفسك 100 قلم بسبابها

احساسك بالتقصير تجاه ناس انت بتحبهم بس بسبب الاريفة دى مش عايز تتواصل 

معاهم وانت دمك تقيل كده

اخبار سياسية تغم نفسك

احساسك بعدم الامان 

حواليك ناس ضميرهم مات من زمان وبيستخدموا طرق غير مشروعه وفعلا بيقدروا بيوصلوا ويعلوا ...وانت مش عارف تتكلم ويقولوا عليك منفسن ولا تسكت وتحس انك شيطان اخرص

وحاجات كتير مش ظاهرة اوى ... لكن بتأثر عليك بالبطيىء لغاية ماتشل تفكيرك

لغاية ماتوصل للشعور اللى انا حساها دلوقتى

شعور الأريفة

يعنى ايه دا

بدأت اليوم بكابوس غريب خلانى ماعرفتش اكمل نوم تانى 

قومت لبست ونزلت 8.30 

رغم انى معادى هناك الساعة 11 غير اننا الجمعه  يعنى الطريق هيكون فاضى وهاوصل فى نص ساعة تقريبا

اول مانزلت لقيت الدنيا هوووووووووس والهوا لونه اصفر والتراب مالى الدنيا والجو العام يخوف

فجأة لقيت واحد طالع اودامى فى ايده سكينة مليانه دم وحاطط كيس اسود على وشه وعمال بيجرى بشكل فظيع 

وقفت وانا ساكته ومصدومة ومش عارفة حتى اصرخ 

لغاية مااالراجل وصل لاخر الشارع وانا بنفس سكوتى 

بعدين كملت وروحت اركب الميكروبص السواق فضل واقف بيملى فوق الربع ساعة 

واحد من الركاب اتخانق معاه علشان اتاخر على شغله قام نزله بالمطوة 

ودا يضرب فى دا ودا يضرب فى دا وانا فى حالة اذبهلال 

نزلت من الميكروبص وقررت اركب الميكروبصات ومش هاركب المترو

عديت الناحية التانية وروحت علشان اركب وبقيت عاملة زى الملبوسه

اقل صوت ممكن يخلينى اتزعر واتنفض من مكانى

روحت الشغل وانا متدايقة اوى

واللى فات كله كوم والعملا وقرف العملا فاليوم دا كان كوم تانى خالص

وفى احداث تانى دايقتنى بس اكتفى بها داخلى  

وروحت البيت بليل وانا ساكته ونمت وانا ساكته 

فعلا ربنا يرحمنا برحمته 

really

ريلى 

انا اتدايقت

my birthday

 

8 / 3 / 2013

 

بمجرد وجودك فى حياتى

اليوم دا

 

بقى مختلف عن كل سنة

 

 

bad attitude

باكره السلبية والجبن

مش انا

ساعات باحس ان مافيش منى اتنين

ايوه انا حاجة نادرة 

قليل اوى اما تلاقوا زيى 

دى مش شكرانية فى نفسى لاقدر الله

بس اصلى بت عسل ياناس

Warning

يوم ماتفكرى يادنيا تكشريلى عن انيابك

انيابك دى انا هكسرهالك ياحلوة 

فضفضة عالهامش

شكلى كدده هاضطر استحمل الوضع على ماهوه عليه لحين اصدار آخر وامرى لله

بجد ربنا بيحبنى لمجرد انه ربط مصيرى بالناس دول سواء بابا , ماما , اخواتى , زومى 
... الحمد لله

بحب اوى اما بنبقى فى وسط ناس كتير والاقى عينك عليا وملاحظنى .. وكونى وسط الناس الكتير دول مش بيخليك تنسى انى مسئولة منك .. دا انت حتى كمان بترد بدالى وعنى ساعات :)

عايزة اعيش العمر كله معاك

سجل الايام دى عندك علشان لما نبقى نحكيها لعيالنا بعدين .. ان شاء الله :)

البلد بقت محتاجة يتعملها ريستارت .. مع العلم ان فيه ملفات ( اشخاص) كتيرة هتتمسح والتحميل هيقف .. بس هوه اصلا من الاول وهوه غلط .. بلاش ننزل الغلط خلينا نزيله احسن .. حتى لو هنفقد حاجات غالية فالنص

:(

ياااااااااااااااااه لو انهاردة يبقى طوووووووووووووووويل والوقت مايجريش زى كل اوف علشان احس انى مستعدة نفسيا للشغل.. وماابقاش قرفانه وانزل زى العيل الصغير اللى بيعيط وهوه رايح المدرسة ويقعد يمسك ف كم مامته .. مع انه بيبقى متأكد ان دموعه دى 
مش هتخليها تاخده وتروحه عالبيت ..بس هوه قرف وبيطلعه فالعياط

بحب بووووووووووووووووووووووووووووووووووووووووووووووووووووووووبى ..حتة عيل عسل ياناس

...

الجو ساقعة تلج .. موحة تحت اللحاف .. والمحشى سخن نار .. وبيطلع دخاااااااااان .. موحة هتاكله اول ماينزل م الحلة .. احساس جامد 


خلى ابراهيم يخلص ياحازم بقى بقى بقى

عروسه المولد

عروسة مولد دى ولا مش عروسة مولد يامتعلمه يابتاعة المدارس

جبتلك العروسه اهو مسمعش صوتك تانى بقى ^_^

ya naaaas

للموت علينا حق

ياترى يوم مايجى اليوم اللى هاموت فيه , الناس اللى بيحبونى هيقعودوا يدعولى , 

وباستمرار هاجى فى بالهم , ولا يومين تلاته عشرة 

سنة وهينسونى 

ياترى هيجولى يزورونى كل فترة فى قبرى ؟؟ وبقية الاموات يقولولى كذا جالك وافرح اوى

 ولا جايز الدنيا تاخدهم واشغالهم متديهومش فرصة يفتكرونى 

وماكينة الحياة تدور بيهم 

ويادوب كل فين وفين لما يفتكرونى ويقولوا ربنا يمسيها بالخير

وفعلا ربنا هيمسينى ان شاء الله بالخير وهيسمع لدعوتهم الغير مقصوده دى لمجرد انها كانت من القلب

ياترى هيكون فيه شوية علم ولو صغيرين عند الطلبة بتوعى ينتفعوا بيه ويشفعلى ؟؟

ولا هاكون اصلا اتجوزت وعندى اولاد صالحين يدعولى 

عموما لو زعلت اى حد او قصرت فى حق حد .. انا اسفة والله ماباتعمد خالص .. ولو عملت كده يبقى غباء منى علشان الدنيا كلها على بعضها ماتستاهلش 

مش عارفة بس هيه هواجس داخلية وباخرجها علشان ماتكبرش جوايا 

(اللهم ارزقنى حسن الخاتمة )

waiting........

الدنيا عبارة عن فرص وضربات حظ

  ومافيش حد فينا مابيجيلوش الحظ ... دا مكتوب لينا وبيدق على بابنا كلناا 

بس الفرق فى التوقيت اللى بيجى فيه الحظ 

فيه شخص بيجيله الحظ بسرعة اوى ومن غير لا تعب ولا مشقة ولا اى اجتهاد 

ودا شخص عيشته مرتاحه وزى ما بنقول عليه :

بيضاله فالقفص

والشخص التانى الحظ لسه جايله فالطريق..حظه بطيىىىىىىء .. واودامه سكة سفر طويلة اوى 

واودام الشخص التانى دا حل من اتنين 

• اما انه يستنى ويصبر على الحظ لغاية لما يجيله ... بس هيستنى كتير اوى .. والشخص دا لازم يكون عنده صبر وايمان بإن الحظ جايله جايله .. لأنه فعلا هيجى بس متأخر شوية .

• او انه هيمل من الانتظار وصبره هينتهى و هيتراجع وهيخسر كل حاجة وطبعا هيبدأ يقوم بخطوات جديدة ومشوار جديد خالص .. وههوه وحظه فالمشوار دا اما ان الصبر هيجيله بسرعة او برده هيستنى 

ومن وجهة نظرى انه حقه يزهق من الانتظار ويمل من الصبر .. وانه شخص مظلوم ومتداس عليه كمان ... لأنه مهما اجتهد وعمل اللى عليه .. حظه متأخر وناس غيره كتير اودامه اقل منه فالامكانيات والقدرات والمجهود وماعملوش ربع اللى هوه عمله .. بس حظه كده بطيىء .. وهما حظهم اسرع منه .. وماجربوش ذل الصبر وملل الانتظار واحساس الجرح اللى هوه حسه 

نماذج كتير اوى من النوع دا انا شيفاها بعنيا ومعايشاها وبجد مش لاقيه حاجة اواسيهم عليها ... بس اواسيهم اذاى اذا كان انا نفسى فيه فرص فى حياتى الحظ متأخر عليا فيها .. وصبرى مش قادر يطول عن كده .. وبافكر اتراجع ... حتى لو هابقى خسرانه  

:(

2013

2012

 

مش عارفة ألاقى وصف ليكى .

 لما قعدت افتكر ذكرياتى لقيت انى قابلت وعرفت ناس لايمكن هيتعوضوا ولا هاقابل زيهم تانى ,, ودماغى مليانه بذكريات حلوة اوى مرتبطة باشخاص واماكن معينة عمرى ماهاعرف انساها ابدا

 

كفاية انك اول سنة اشوف نفسى فيكى عروسه ... مش بس كده .. دا كان جنبى احلى عريس فالدنيا

 

وفيكى حياتى اتملت باحلى حاجة باحبها فالكون (الورد) :)

 

واما بقيت باضحك بقيت باضحك من قلبى

 

اتطمنت على اخويا وحضرت كتب كتابه

 

من اسوأ احداثك وفاة تيتا مامت بابا ومامت ماما :(

وحصلى حالة لا مبالاة لأى حاجة بتحصل فالبلد

ومابقتش عارفة مين المفروض يكون فين

وكرهت كل حاجة فالسياسه

 

 

2013

 

ربّي أسألك عاماً لا تزوره أحزان ولا أفقد به أحباب . . [♥] 

 

 

respect the love and feelings on time

Once upon a time a bird fell in love with a white rose.

 One day he (bird) proposed to her (white rose), but white rose refused. 

White rose said I don't love you. 

Bird daily came and proposed to her. 

Finally, white rose said when I will turn red, I will love you. One day bird came and cut his wings and spread his blood on the rose and the rose turned red.

 Then the rose realized how much bird loved her but it was too late because bird was dead. 

So respect the love and feelings of the person who loves you on time.

______________________

لازم نحس ببعض ونحترم مشاعر بعض فى الوقت المناسب 

لو اتأخرنا بجد مابيكونش للاحترام دا اى طعم 

really :)

Stop tiring me

Dear tears , troubles , problems and pains , 

Please go out of my mind when I put my head on the pillow.

Really  I need to sleep ,my dears  :(

حاسس بيكى

انا كمان عايز اخد فاصل 

ايوه عايز اخد نفس الفاصل

فاصل من الشغل ومن الصحاب ومن المصالح ومن النفاق
فاص من الناس كلها

الا انتى ياسماح 

نفسى افضل معاكى اطول وقت ممكن

ونفسى افضل ابص ف عيونك دول لحد ماشبع 

انتى اصلا متعرفيش بصتى ف عيونك دى بتعمل فيا ايه 

عارفه انتى الغرقان اللى بينقذوه ف اخر لحظه وبيدوله قبلة الحياه ؟؟؟

بصتى ف عيونك هى قبلة الحياه. 

10_ فضفضة ع الهامش

 

 

محتاجة فاصل وراحة من الحياة ومن النفس اللى باتنفسه والروتين اللى اتخنقت منه

___________________________

 

مش عارفة اخد القرار دا وخايفه منه بس انا فعلا مليت وتعبت

___________________________

 

عايزة اخد اجازة مش اكتر من 5 ايام واعيش مع نفسى ولنفسى وبنفسى وبس ... بجد مش عايزة اشوف ضل بنى ادم فالفترة دى وساعتها فعلا هارجع سماح تانية خالص

___________________________

 

عايزة اى تغيير ايجابى يحصلى فى حياتى بقىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىى

___________________________

 

نفسى اقرب اوى من ربنا زى زمان واستشعر حلاوة الايمان واقعد اسهر على السجادة وانا باقرأ قرآن وقلبى يهفهف واحس ربنا بيقولى انا معاكى ومش ناسيكى ... يارب اهدينى وقربنى منك

___________________________

 

بقالى كام يوم عايزة افضفض واكتب بس كل مااجى اكتب اتراجع علشان عايزة لما افتح المدونة اول بوست تقع عينى عليه يبقى بتاعك ياحازم

 :)

_________________

 

زعلانة اوى عليكى يابلدى وعلى ولادك .. عماله بترجعى ورا ... وكله بيلعب بيكى .. ماحدش حاسس قيمتك .. بقيتى زى فار التجارب اللى كل واحد بيلعب فى هرموناته ويقطع فى جلده ويشوه فى جسمه لغاية مايدوخ ويقع يموت ... لو فضلتى فار اكتر من كده ... يومك هيقرب اوى يابلدى :( 

 

 

الطريق لقلب الراجل معدته

 صدق اللى قال الطريق لقلب الراجل معدته

النهارده كلت من ايديكى احلى صينية مكرونه بالباشاميل :)

يوم ماكنا مروحين من الشغل

يوم ماكنا مروحين من الشغل احنا الاتنين ومكنش معايا غير اتنين جنيه ساعتها قعدنا نفكر مع بعض هانروح ازاى ونعمل ايه بالاتنين جنيه وف الاخر جبنا كيسين تيتا نانا :) 

وانتى دفعتى حق تذكرتين المترو 
ساعتها كنت فرحان اوى وكنت حاسس اننا احنا الاتنين فعلا واحد بنفكر مع بعض وبنمشى حالنا باللى معانا

بحبك اوى على فكره

Hazem Saad 

شغل شغل شغل

 

يخربيت الشغل اللى يبعد الواحد عن صحابه وناسه وحبايبه اوى كده

بيج اوف على دا شغل معفن