تاج فقرى

انا مش باحب اجاوب على التاجس علشان انا مش لبقه ومش باعرف اجاوب على الاسئله الشخصيه اوى

وكمان باحب ابقى سيكرت ماشى ع الارض

بس ايا كان انا اتحدف عليا تاج

من شاب فقرى , جيت احدفهوله راح حادفه عليا تانى وعليه زيادات كمان

اولا انا باعتذر له علشان اخرت التاج اوى ,

بس والله كان عندى ثراء تدوينى فظيع شنيع ,

لدرجة انى ما اكتفيتش بالكتابه هنا , فبدأت اعمل مدونة جديده كمان , ولسه باظبطها

ثراء ثراء يعنى

:)

واحب اقول للشاب الفقرىىىىىىى

: حرام عليك التاج صعب جدا

, ماكنتش حاسه بصعوبته وانت بتحله خالص

, قلبت عليا المواجع

:) :

السؤال الاول

:
رتب الاتى حسب اهميتها بالنسبه لك
الصداقه _ الحب _ العائله_ المستقبل _ المال

1_ العائله

2_ الحب

3_ المستقبل

4_ الصداقه

5_ المال

_____________

السؤال التانى
:
اجب عما يلى
:
1_ عرف الحب فى جمله صغيره ( حب الحبيب و الحبيبه) ,ه

الحب وطن مقره القلب اساسه الوفاء ودستوره التضحيه ولا يخلو من الألم

وهل يمكن ان نعيش بدون حب (الحبيبه او الحبيب برده ) ؟؟؟

اهه عادى جدا هنعيش وهنتنفس كمان ,

بس هنفتقد مذاق كويس

2_ ما الرساله التى تريد ان تبعثها لحبيبك او حبيبتك ( زوج /ة المستقبل ) إن وجد أو لسه ماوجدش ؟

رساله لزوج المستتتتتتقبل

اممممممممممممممم

مش عارفه , بس ممكن اقوله اتقى الله فيا , وماتخبيش عنى حاجة , وحبنى بجد

كن انا , اكن انت

بس

وربنا معاه منى بقى هيشوف ايام

:)

3- ياترى إيه أكتر حاجة بتكرهها فى الحياة ؟؟؟

الكدب , مابعرفش اسامح فيه ابدا

حتى لو مثلت انى سامحت فيه جوايا بافضل شايل

4- لو هتتمنى أمنية قبل ما تموت هتبقى إيه (( ملهاش علاقة بالدين )) ؟؟؟

اكون حققت جزء كبير من احلامى

5- مين أكتر حد محتاج تشوفه وترتاح فى حضنه أو تبص فى عنيه ؟؟

مافيش حد

6- مين أكتر حد نفسك تخسره ؟؟؟

مس مها _ مديرة المدرسه

7- من وجهة نظرك ... إيه هى الحياة ؟؟؟

الحياة : مرحلة ما قبل الموت

8- ياترى هتقع فى الحب تانى لو حبيبك/حبيبتك سابك أو لو كان سابك بالفعل ؟؟؟؟

مش عارفة ماجربتش

بس اللى متأكده منه انى هاحب اللى هيبقى جوزى إن شاء الله

9- ياترى تقول إيه للعالم كله ؟؟

لو للعالم كجماد هاقوله :

I hate u

لو للناس

الله يكون ف عونكم

10- ياترى لو هتخسر كل اللى حواليك فى سبيل حلمك ؟؟؟ هتكمل وتحاول تحققه حتى لو كان مستحيل ؟؟؟

مش هاخسر اللى حواليا علشان حلمى اصلااااا

لأن اللى حواليا اغلى عندى من حلمى

11- ياترى إيه أكتر إحساس عشته الايام اللى فاتت ؟؟؟

عد عندك :

أ_ خوف

ب_ توتر

ج_ فشل

د _ ندم

و_سعاده

ه _ امل

واكتر والله :)

مش عارفه

افرحلك ؟

ولا ازعـــــــل عليــــــــكى ؟

ولا ازعـــــــل منــــك ؟

ولا انساكى بقى ؟

مـــش عارفه

My pillow

من خــــوفى قولت انام

تدارينى مخدتى

معادله سهله

الحــــــــــــــظ = استعــداد + فرصه

ونحط 100 خط تحت استعداد

_________

استعد لغاية لما الفرصـــــــــــــــه تجيلك

واما تجيلك اوعى تفرط فيها

علشان مابتجيش غير مره واحده ف العمر

_____________

حظك حلو : يبقى الفرصه جتلك وانت مستعد

حظك وحش : يبقى ماكنتش مستعد لما الفرصه جاتلك

م الاخر

عايزه اقول إن حتى الحظ بايدينا احنا

:)

هانت اوووووووووى

باقى يومـــــــــــــــــــــــين

الحمـــــــــــد ـللـه

مبسوطه جدا

طـــــ فـــــ ل

طفــــــــــــــــل

الكلمه دى عباره عن تركيبه رائعه , للأسف مش اى حد يدركها

تركيبه عقليه شنيعه , ممكن تستوعب اى قدر من المعلومات

دا غير ان الطفل دا عامل زى العجينه بنشكله بايدينا

بس مع الاسف

عندنا الاطفال بيتشكلوا ع الفوضى

هاقولكم على موقف اثبتلكوا بيه ان الاطفال طينه بتتشكل ايا كانت بلدهم وجنسياتهم ومستواهم العلم

ولادى مثلا ومش هاقول الشاطرين

لأ فصل الضعاف

كنت معوداهم على تفاصيل معينه طول ماحنا ف الفصل بنطبقها

زى مثلا :

لما ادخل الفصل بيقولوا :

Good morning Miss Samah . It's nice to see u

واما عايزين يدخلوا الحمام :

May I go to the bathroom , please .

واما باسألهم خلصتوا بيردوا :

not yet

or

Yes

وحاجات كتيرررررررررررررر

كنت اول لما ادخل الفصل كل حد اودامه ورقه بيشيلها
واى حد من الولاد لابس دبله او اسوره او اى هبل من دا بيشيله

وكانوا بيستوعبوا اى اوامر اقولها بالانجلش

Don't say Miss!

Put your hand on the desk!

Raise your hands!

Stop talking!

Begin with....

Ask about.....

Make aques.

Who can ask?

Who can answer?

Who can put it in a sentence?

atc.

رغم مستواهم العلمى الزفت , إلا انهم اهوه بيتشكلوا

واتحداكم إن كانوا فاهمين كلمة من دول

بس متبرمجين وبينفذوا , يبقى ليه مانشكلهمش صح زى الدول الصح

:)

كنت شوفت قبل كده ع اليوتيوب اطفال اليابان ,

مذيع زار مدرسه عندهم وقعد يحكى على سيستم حياتهم وتعاملاتهم جوه المدرسه

مش هاقول انهم اذكى مننا ولا انضف مننا ولا ولا ,,,

لأ خالص والله , احنا برده اذكيا ونضاف اوى كمان

بس احنا بنوظف اطفالنا غلط

طبعا اول الكليب جايب موظفه ف المدرسه ماسكه علم عليه كلمة مدرسه وبتعدى طفل طفل الطريق

لأ والعيال تلقائى وهما بيعدوا , بيقوموا رافعين ايدهم علشان قصيرين ف العربيات تشوفهم

واصلا مافيش زحمة ولا عربيات ولا بتاع , كل اللى ماشى عجلات

خايفين العجله تخبط الولاد ياعينى

عيدوا نفس المشهد عندنا

هتلاقوا العيل ماسك شنطته اللى تقريبا تزن نفس حجمه وبيناطح مع العربيات

لأ والناس اللى ف العربيات مش بتراعى نهائى

علشان معاهم عيالهم ومتأخرين على مدارسهم

وعيالهم اولى من عيال الناس التانيين

تانى مشهد مشهد للمدير

لابس بدلته ومهندم نفسه ومبتسم , وبيحط ايده على كتف العيال بيحسسهم بالأمان

زى عندنا تمام : S

والمدرسه اموووووووووووره اول لما بتشوف الولاد بتبتسم

مش زى عندنا العيال كانوا يشوفوا المدرسين يتذعروا و يستخبوا ف بعض

ندخل بقى الفصول

الديسكات نضيفه مش عليها القلم الحبر طافح , ولا العيال حافرين اسماءهم على خشب الديسك

الولد منهم يقوم يجاوب , يروح مرجع الكورسى جوه الديسك بكل نظام

مابيقولش دى ثوانى وهارجع تانى

لأ خالص , الكورسى بيرجع على طول لزق ف الترابيزه

اوووووووووووووووووووووه على جرس الفسحه بتاعهمم

مش كبينة مطافى زى عندنا

لأ موسيقى تريح اعصاب العيال ومن سكات جدا بتروح المدرسه واخدة شنطتها

وتحيى الولاد وتمشي

الفصول منظمه وشكلها عسول والعيال كلهم لابسين نفس شكل ولون الشنطه

علشان زحمة الالوان بتعمل صداع نصفى

و

عندهم اربع طرق لرفع الايد

واحدة معاناها عايز اجاوب

وواحدة عندى سؤال

وواحدة عندى اضافه

وواحدة انا باعترض او مخالف للرأى يعنى

احنا لو علمنا ولادنا كده هيحصل ايه؟

هيقولوا لأ؟

لو زرعنا فيهم النظام واحترمنا ادميتهم كده هيطلعوا وحشين؟

فيلم عسل اسود بنظره موحيه كئيبه

طبعا صورة الشهيد خالد سعيد لازقه فى دماغى وحارقالى اعصابى

وبقيت حاسه بعدم الامان

وشاء الحظ انى ادخل فيلم عسل اسود علشان اتكدر اكتر واكتر

انا ماليش ف النقد السينمائى نهائى

بس تقبلوا كلامى عن الفيلم دا

الفيلم دا مليان ضحك ياما , بس كنت حاسه اننا عبط وبنضحك على نفسنا

لأن الفيلم للأسف بيوصفنا صح ,

بيوصف سذاجتنا , وعدم انتماءنا , وسلبيتنا , و استكانتنا , وغباءنا , والعطاله , وسوء التصرف , واننا شعب غلبان اوووووووووووووووووى

احمد حلمى عمل الدور حلو جدا ,

بس حتى لما حب يحسسنا بإن مصر فيها ايجابيات ,

ما عرفش لأنها مافيهاش

تقريبا من الفيلم كله كانت ايجابيتنا ف الدفء الاسرى وحنان الام

وال ايه مش موجود ف اى بلد تانى

هاتوا لى اسرتى وعيلتى واشحنونا ف طياره لاى بلد , بلاش بلد , لأى جزيره فاضيه

عادى جدا هاحس بنفس الدفء الاسرى اللى باحسه هنا ,

وهيحبونى وهيخافوا عليا برده

احمد حلمى عرف يوصف مصر وكل سلبيات مصررررررر حلو جدااااااااااااااااااااااااااااااااااااا

بس والله فعلا كان ضعيف جدا فى انه يمثل ايجابيات مصر , ودا مش ذنبه , مصر هيه اللى مش مسعداه

المهم بقى , اكتر الادوار اللى شدتنى , واللى فعلا ألمتنى

لما دخل القسم , وكان بيتضرب على قفاااااااااااااه

حاول يتعامل زى المواطن الامريكى , ويسأل عن سبب الضرب , ويزعأ لأنه حاسس بالاهانه

لكن اتعامل زى المواطن المصرى , لأن الباسبورت بتاعه مصرى , اتضرب على قفاه تانى , وخلوه يروح يقرفص على رجله شويه

جميل اوى التعامل دا , بيحترمونا جدا الناس دول

:S

ولما اللواء اللى ف المظاهره , باعه فى لحظه , وخلاهم اكلوه علقه محترمه لمجرد انه عايز ياخد حق الراجل اللى عربيته اتخبطت

بس ياخد حقه اذاى , اذا كان اللى خبطه رتبه مهمه , رتبه مهمه يعنى عندهم جزم نضيفه كده بيدوسوا ع الناس الغلابه امثالنا بيها

وتألق احمد حلمى لغاية اخر مشهد , و اثبتلنا اكتر واكتر اد ايه احنا فعلا متداس علينا

لما حب يعمل نفسه بيموووووووووووووووووووت , بيحتضر يعنى ....... بتطلع روحه , بس للاسف هوه مصرى

ومافيش مشكله لما مصرى يموت

اصل الطياره مشيت ومش هينفع نرجعها

لكن لما طلع الباسبورت الامريكى يهوى بيه , الناس كلها ربطت الاحزمه , والطياره استعدت للهبوط

اصل الامريكى ما ينفعش يموت , لكن المصرى لاااااااااااااازم يموت , علشان يريحوا البلد منه

مشهد برده جميل اوى بتاع ايمى سمير غانم , المشهد دا كان بتكرر اودامى تقريبا كل يوم , دا بصفتى مدرسه يعنى

كنت ممكن اكون معديه اودام فصل , وافاجأ إن مس الانجلش جوه بتنطق الكلمه غلط

اول سنه كنت باندفع بشكل هيستيرى للفصل وادخل انادى للمدرسه واقولها الصح

بس بعد كده , لقيت ناس بتاخدنى على اد عقلى ومجرد ما ألتفت ترجع تنطق الكلمه غلط تانى

وناس بتزعل , من غير ماتفكر ابدا إنها كده بتبوظ جيل بحاله

اه , دا ربنا هيحاسبها على الكلام الغلط دا , انا كان فى كلمات متعلمها ف ابتدائى واعدادى غلط

ممكن يكون صعب على العيل انه يحفظ كلمه جديده , لكن الاصعب واصعب انه يكون حافظها بشكل , ويلاقى حد بيقوله دى غلط احفظ الصح بتاعها

بيبقى مخه كسل خلاص عن الكلمه دى , وبيعانى علشان يغيرها

طب اقسم بالله فى مدرسات انجلش مرحلة ال كا جى

K G

بيقولوا انا مدرسة كىىىىىىىىىىىى جى

حرف الكا بقى كىىىىىىىى

هيعلموا اجيال اذاى دول؟؟

خلاصة الكلام , الفيلم دا عجبنى جدا جدا ,

لأنه اظهر حقائق , مش هاقول مستخبيه , بس ممكن نقول اننا عاملين نفسنا مش شايفينها

مجرد رتب واجب

اقرأوا لغاية الاخر جايز اسمك مكتوب هنوزع جوايز

:)

الرسايل المجانيه بتاعت الموبايل دى جايه عليا بخساره

لألألأنى

امبارح اتسألت سؤالين

ولقيت نفسى بافكر كتيررررررررر

وف الاخر جوابت اجابات مش مقتنعه بيها نهائى

حسيت انى حافظه مش فاهمه

:)

المهم قعدت افكر

الحل ايه؟الحل ايه؟

مالاقيتش غير انى احط السؤالين هنا واخلى المدونين هما اللى يجاوبوه

رخامه يعنى , يعنى زى تاج

بس هما فعلا سؤالين حلوين

____________

السؤال الاول

:

رتب الاتى حسب اهميتها بالنسبه لك

الصداقه _ الحب _ العائله_ المستقبل _ المال

السؤال التانى

:

اجب عما يلى

:

1_ عرف الحب فى جمله صغيره ( حب الحبيب و الحبيبه) ,

وهل يمكن ان نعيش بدون حب (الحبيبه او الحبيب برده ) ؟؟؟

2_ ما الرساله التى تريد ان تبعثها لحبيبك او حبيبتك ( زوج /ة المستقبل ) إن وجد أو لسه ماوجدش ؟

طبعا التاج دا أى حد بيدخل عندى ياريت يحله

بس فى ناس هاعمله اجبارى عليهم

وإن كان فى ناس منهم ف امتحانات بس عادى ادينا قاعدين

هاستناهم

1_ يمامه شارده

2_ البحث عن زوبه

3_مورجاااااااانه

4_ شمعـــــــــه

5_ Mahasen Saber

_ طبعا انا اسفه جدا انى قفلت الفيس بوك _ بس والله علشان مشغوله جدا _وهوه بيضيع الوقت جدا _شهر وهافتحه تانى ياجميل :)

6_ طوبه فضه وطوبه دهب

لو فتحت مدونتها اصلا _وحشانى نتيا _ ( لا فيس ولا مدونه ) عااا

7_ رومانسى باشا

8_ محمد غاليه

9_ شاب فقرى

10_ المختار

11_ اقدم عاصمه ف الحب

12_ ليس فقيرا من يحب

13_ باربى جيرل

بيعجبنى كلامها جدا

:)

على فكره مش اجبارى اوى (وش خايف منهم )ه

مابحبش افكر كتير

لازم اقرر بقى

إسمعوا واعو

السعاده بين ايديك اهيه

نبطل كأبه بقى ونجيب الكتاب

:)

كتاب هل تبحث عن

السعـــــــــــــــــــــاده

حاليا بالمكتبات

:

البلد

عمر بوك استورز

سندباد

سنابل

ليلى

حنين

مدبولى

ادم المعادى

الكتب خان المعادى

مدبولى البحوث

فرشة قصر النيل

بوك اند بينز المنصورة

جارى استكمال التوزيع وقريبا بجميع مكتبات القاهرة وباقى المحافظات

ومكتبات الشروق وديوان

مبروووووووووووووووووووك الكتاب

اخى العزيز : محمد غاليه

هانت

واحد وعشرين يوم

عالى عليا

لسه هابدأ السلالم من الاول

لوحدى

مش عارفه هاوصل لفين

عااااادى

لما الحبيب يخون حبيبه

لما الصديق يجرح صديقه

لما العامل يبيع ضميره

لما الابن يقتل ابوه

واما البشر كلها تتوه

عاااااااااااااااااااااااااااااااااااادى

( الجمل دى قالتهالى صحبتى لما لقتنى مستغربه الواقع )

مدرستى العزيزة عذرا

ملحوظة : البوست طويل جدا وتقريبا انا كتباه لنفسى علشان افتكر بعد السنين ما تعدى فم الاخر مالوش لزمه تقرأه

بعد ما قضيت تلت سنين من عمرى

فيكى

قررت

انى اسيبك

يامدرستى العزيزة

كل مرة كنت بامشى منك كأجازه على احتمال انى هارجع اليكى

ولكن عذرااااااااااااااا , مش هينفع ارجع تانى

هاخد منك اجازة كامله

مش هاقول ما استفدتش منك

لأ إطلاقا , دا انتى ادتينى فرص مااخدتهاش فى حياتى

ادتينى فرصه اتعامل مع ناس محترمه جدا

ادتينى فرصه احس انى اد المسئوليه

وانى يوم لما ربنا هيرزقنى بولاد ف المستقبل مش هاعانى فى تربيتهم

هاعرف اشد وارخى

وبرده اتعاملت فيكى مع ناس سلبيه

مهما تاخد على دماغها ما تقولش اى

بقت جبله

وناس تانيه حبتنى من قلبها بجد

وناس كانت بتبتسم فى وشى , ومن ضهرى ( الله يسهلهم ) ه

مدرستى العزيزة

فيكى انا جربت الاعتصام عن العمل والاضراب والاحتجاج والمعارضه ,

ومافيش شغل تانى كان هيدينى الفرصه دى

صحيح كنا بننزل من الدور الاخير خمسين

عوقبال ما نوصلل لمكتب صاحبة العمل بنبقى اتنين

بس ادينى كنت باحتج وخلاااااااااااص

فى ناس كانوا بيقولوا عليا عبيطه علشان اتضحك عليا وانا اللى اتحطيت فى وش المدفع

بس من مكانى دا باقول انى فخورة بنفسى

لأنى يوم لما وضع مش بيعجبنى , ما باسكتش عليه

مدرستى العزيزة :

حببتينى ف التدريس وعرفتينى قدرات ف نفسى ماعرفتهاش

خلتينى نميت الانجلش بتاعى كتيررررررررر

مدرستى العزيزة

احيتى ذكريات الطفوله اللى الناس كلها بتفتكرها من بعيد

انا عشتها جواكى

شميت ريحة هوا الصبح اللى كنت باشمه زمان وانا لابسه مريلة المدرسه

اتفرجت ع الطابور الصباحى وجسدت صورتى وانا واقفه مكان الولاد

استعدت ايام الامتحانات وطعم الخوف والرعب والتوتر اللى كنت باحسه

لما شوفته ف عيالى

مدرستى العزيزة :

كل مبنى فيكى شايلى ذكريات ياما

كل درجة سلم حفظانى وصمانى

الكانتين ياما شال منى رقاااااااااات

حتى المراجيح ياما كانت مكان اشرافى

مدرستى العزيزة:

مش هنسى يوم اشرافى

ولا ايام التصحيح

ولا ايام المراقبات

مدرستى العزيزة :

مش هنسى يوم لما مشيت منك

وقررت انى مش هارجعلك

ولقيت تليفونات من ناس ما توقعتهاش

وفوجأت بمشرفتى العزيزة تأبى العمل لحين عودتى

كبرتنىىىىىىىىىى كتير , وخلت راسى ف السما

ولا هنسى المشرفه اللى قبلها

لما كانت بتدافع عنى بعزم قوتها وما بتطيقش حد يقولى كلمه تدايقنى

مدرستى العزيزة :

مش هنسى يوم تكريم عيالى

لما كان كل واحد بيطلع منهم

باحس انهم بيقولولى انا برافو عليكى

تعبتى ولقيتى

واما طلعت ع المنصه اتكرم وعيالى فرحولى

ويوم لما الامتحان جه صعب بس برده عيالى رفعوا راسى

وقالولى : يامس تعبك ما رحش بلاش

ياااااااااااااااااااااااااااااااااااااااااااااااااااااااااااااااااااااااااااااااااااااه

انتى مكان حلو اوى يامدرستى

بس مدرستى العزيزة :

مش ناسيه لحظات احباطى فيكى

وضغط الرؤساء علينا

ويوم ما مشيت إيمان صحبتى منك

ويوم ماهناء مشيت بعد ماعملت اللى عليها ودعيتوا عليها

ويوم ما طردتوا ايمان ومحمد ووائل

رغم ان شغلهم تمام اوى

مش هانسى انى ياما ضعفت واتخنقت فيكى

مدرستى العزيزة :

مش هنسى ايام ما كنت باتعب اوى واعانى مع الفصل الضعيف

وانزل الاقى الناس التى لا يعنيها طالبين منى طلبات اداريه

مش هنسى زعيأ الاستاذه مها بصوت عالى

متظاهرة بإن دا لمصلحتنا

وبرده مش هانسى انى اكتر واحدة ف المدرسه كنت باستفذها

مدرستى العزيزة :

مش هنسى انى قعدت فيكى تلت سنين من عمرى

واخدت خبرة ف التدريس بمية سنه اودام

بس نسيت الألمانى

اللى تعبت فيه اربع سنين

مش هاكدب واقول انا عارفه طريقى

وعارفه هاعمل ايه بالظبط ؟

ولا هاخدع نفسى وهاحسس نفسى انى لسه صغننه

والمستقبل اودامى وردىىى

لأ إطلاقا ... انا شبه راحت عليا .. واليوم مش يومى خالص

والخريجين هما اللى جه دورهم يشوفوا هيعملوا ايه

واكيد انا بقالى كتير ماقولتش لبابا هات المصروف

ولما هاقعد اكيد هاحتاج اقوله لانى اتعودت ع البذخ والاصراف

بس دا كله ما يمنعش انى مسئوله مسئوليه كامله عن قرارى

وسعيده بيه جدا جدا

غير بس الكام صديقه اللى هافتقدهم , و

وقت الفراغ اللى كان بيتقضى ,, و

العيال اللى حبيتهم واتحفروا جوه قلبى

واخيرا مدرستى العزيزةةةةةةةةةةةةةة

شكرااااااااااااااااااااااااا

( ومن قلبى بجد )

قلبى وقع ف رجليا

امبارح فى عز مانا نايمه الساعه تلاته الصبح

فجأة قومت مفزوعه ..... لأ مزعوره

على صوت اتنين بيضربوا بعض تحتنا

قعدت فوق الساعتين قلقانه وقاعده فى مكانى ما باتحركش

كل اللى كنت حساه انى مرعوبه

وإن رجلى بتدق

فعلا صدقت دلوقتى الناس اللى بتقول قلبى وقع فى رجليا

مش امبارح بس

انا بقالى فترررررررررررررررررررره جبانه

باخاف من اى حاجة

اول امبارح كنت قاعده مع صحابى وفجأة برقت وما اديتش اى ريأكشن خالص

اتارى مس سحر فتحت التكييف تحت والسور اتهز جامد والصوت هزنى بجد

بلااااااااااااش دى __ طب قبلها بالظبط كنت ف الفصل

وحذرتهم اى حد يسألنى اى سؤال وانا مندمجه ف الشرح

وكان فى ولد ورايا , وانا مش حاطه اى خوانه

وال ايه الولد , حبكت يسألنى , ومحشور فى بوقه سؤال

والباشا جه من ورا ضهرى

وقالى يامس

انا اتنفضت من مكانى

والعيال هاتك ياضحك

انا استهبلت وضحكت

بس انا من جوايا كنت مخنوقه جدا

لو حد قفل الباب واترزع بجد باتفزع

انا ماكنتش باخاف كده

هوه انا خايفه ليه؟!!!!!ه

ومن ايه؟!!!!ه

قبل ان تتركها هي الاخرى

ألقت دميتها

واستعادت وحدتها

يطاردنى

شبح افكارى

مافيش احسن من كده

فنجان شـــاى

نقــطـــة امـــــــــــــل

مشتـــــــــــاقه

للبحـــــــــــــــر

والايس كريم السايح من هوا البحر

العيال كبروا

انهارده كان فى حفلة تكريم ف المدرسه

العيال وهما بيتكرموا كنت حاسه انى انا اللى باتكرم

مع كل سقفه اتسقفت ليهم كنت باحس ان معنوياتى بتعلى لما بتوصل لفووووووووووووق

وخصوصا لان التكريم كان ع الانجلش بس

عيالى بتوع الفصل المتفوق اتكرموا الكلاس كله

والكلاس اللى هما الميتين اتكرم منهم عدد حلو يعنى بتاع سبعتاشر مثلا

طبعا احساس حلو جدا

لأ والعيال احلووووووووووووووووووووووا جدا

وكل واحدة وواحد جايبه الكاميرا وجايبه ماما وعايزة تتصور جنب مس سماح

وياه لما بافكر اتصور جنب اتنين

الشاطر بقى يطللللللللللع المس فين

العيال اكبر منى

واشيك منى

انا باحقد عليهم

صورهم هاحطها اهوه

اسراء اول واحدة طلعتلى

وجيبالى الموبايل بتاعها

وبليززززززززززززز يامس نتصور

وكانت خجوله جدا ف الصورة اللى طلعت فيها معايا

1_

بعدها هلت علينا علياء , قولتلها تعالى ادخلى ف الصورة

قمر ماشاء الله عليهم

2

شويه ونزلت تحت خالص الكانتين ولاقيت ايد على كتفىىىى , وإذا بها مرررررررررررررررررريم

ماى بيست بيوبيل

طبعا اخدت البت بالاحضان من كتر مانا فرحانه بعسلها

ويلا يامريم علشان تتصورى

3_

واما طلعنا نعمل بروفا لقيت جيناااااااااااا

حبيبة قلبى

عمرى ما باقرأ وراها لأنها اكيد حله صح

ربنا يحفظها

4_

اوووووووووووووووه

علاء باشا

واقف اودامى مكسوف وعمال يقولى مس

يامس

يامس

قولتله عايزززززززززززززز ايه

قالى عايز اتصور مع حضرتك

هههههههههههه

عسلللللللللللللل

طبعا روحت تنيت ليه دراعه ودخلت دراعى فيه

وقولتله يلا انا العروسه وانت العريس

الواد اتكسف جدااااااااااااااااااااااا

بس كان فرحان وانا كمان كنت مبهوره بيهم

وادى علاء :

5_

تسنيممممممممممممممممممممم

ممتازة ممتازة ممتازه

وغلبانه وهاديه

ومؤدبه

وياااااااااااه على اسئلتها السكررررررررر

دقيقه جدا

وان شاء الله هتطلع يادكتور يامهندسه

وادى تسنيم

6_

مااااااااااااااااااااااارك

جالى سلم عليا وقالى مش انا طلعت الفيرست

قولتله تعالى اتصور ياولا يافرست هنا

برده كان مكسوف جدا

وخصوصا لما قولتله اعمل ياولا اى حركه

7_

يوووووووووووووووسف

جبته من بين العيال وقولتله تعالى اصورك يايوسف

وبعد ما اتصور بساعه

جايلى وشايل منى اوىىىىىىىىىى

وقالى على فكره حضرتك ما ادتينيش فرصه اصورك عندى اتصورنا فى الكاميرا بتاعت حضرتك بس

قولتله بعد التكريم يا يوووووووووووووسف

راح قالى ماشى

وصل لغاية اودام خالص وداخل يتكرم

واذا به : يااااااااااااااااااااااااااااامس

يامسسسسسسسسسسسسسسسس

راح غامزلى وقالى هخلص واجيلك نتصور عندى

8_

مارينااااااااا

مذيعه صغيره
هتبقى شخصيه مهمه ف المجتمع
إن شاء الله
9_

آيــــــــــــــــــــــــــــه

عندها مبدأ

وانا احترم جدا الشخصيات اللى عندها مبدأ
اول ما بدأت السنه وجت مدرسه فى مرة بتضربها علشان بتتكلم مع صحبتها
قالتلها انا ما اتكلمتش والله وعمرك ما هتلاقينى مقصره فى حاجة علشان ما اديش لحد فرصه يضربنى
ورفضت تضرب
لغاية ما المدرسه طردتها بره وخرجتلى منهاره
لما اتكلمت معاها احترمتها جدا واحترمت مبدأها
هوه فى احسن من ان الانسان يبقى عنده مبدأ ويعمل كل اللى عليه علشان ماحدش يخترق مبدأه دا ؟
وادى آآآآآآآآآآآآآآآآآآآآآآيه

10

مناااااااااااااااااار

مامتها مدرسة ثانوى عام
بتمسك كتب الثانوى وتذاكرها وتيجى تسألنى فيها
ومش بالسهل انها تحب اى مدرسه
لذلك انا فخوره انى دخلت قلب

11_

دول شادى ومصطفى وعمر

وهما فى فقره

12_

وهنا لقيتهم بينادولى ويقولولى رفعنا راااااااااااااااااااااااسك يامس وجبنا الكاس

وقولتلهم والله لاصوركم بيه يااحلى عياااااااااااااااال

وبعد ما صورتهم قالولى اتصورى بالكاس قولتلهم طب يلا معايا

ووقفت ف النص والكاس فى ايدى

وهما حواليا

وإذا بى افاجأ بإن سبع موبيلات متسلطه عليا وبيصورونى ال ايه وانا ماسكه الكاس

وواقفه جنب عيالهم

طبعا اتكسفت جدا وانسحبت بسرعه لأنى لا الحضرى
ولا احمد حسن

13_

ودول بقى الكابلز اللى ما بيتفرقوش ابدا

بسنت وبسنت

14_

ونورهان ونوران

15_

ربنا يرزقنا بعيال حلوه كده

والنهايه كانت عسوله , لأنى اتكرمت انا وصحابى اللى باحبهم

واللى فعلا يستحقوا التكريم

:)