عادى ؟

وفيها ايه يعنى اما تكون طاير فوووووووووق فووووووووووووووووق

وفجأة تلاقى نفسك ف الارض ؟؟

عادى

دكتور روحانى حضرتك؟؟؟

ريهام العربى حدفتنى بالتاج دا , وماينفعش ابدا انى ارفضلها طلب , دى واخدة حتة كبيرة من كيانى يعنى ولازم ارضيها بدال ماتغدر بيا وماترجعوش تانى , هوه تاج مايفرقش كتير عن البطاقة الشخصية :

اسمك؟

سمــــــــــــاح

المشهور بيه وسط أصحابك؟

موحة أو سموحة أو سماح

سنك؟

تلاتة وعشرين سنة ان شاء الله

مجال دراستك؟

ليسانس ألسن

لغة اولى ألمانى

تانية انجلش

اسم مدونتك؟

زى الهوااااااااااا ( الهوا الشفاف)ه

صورتك الرمزية فى المدونة بتعبر عن ايه؟

لو الرمزية اللى هيه فوق دى من المدونة يبقى بتعبر عن الحزن اللى كنت حساه بس الحمد لله نسبته بقت ضئيلة

لو الرمزية دى اللى هيه بتبقى مع البروفيل فدى بتعبر عن الطفولة والبراءة اللى اى حد فينا بيتمنى يحسها

هل فكرت فى اغلاق المدونة ؟ والسبب؟

اه .... واكترفترة فكرت فيها اقفل المدونة هيه الفترة دى لانى حاسة انى بقيت عاجزة عن التعبير عما بداخلى

إيه رد فعلك لو حد قل أدبه فى تعليق ؟

نفس رد فعلى لو حد دلق عليا كوباية ميه وانا ماشية ف الشارع هبص عليه وهضرب كف على كف وهكمل طريقى عادى ولا كأن حاجة حصلت

اسوأ مدونه؟

ماعتقدتش لسة شفتها دى لانى بحاول مادخلش غير المدونات اللى اعرفها ومافيش اى مدونة اعرفها بحسها سيئة

هيحصل إيه للايميل بعد ماتموت؟

هيموت مع صحبته

اديت الباسوورد لحد قبل كدة؟

اه __ لاتنين لصحبتى وهيه اصلا مسطولة وزمانها نسيته وباكتبه اودام اختى عادى بس برده شكلها مابتحطش ف بالها يعنى هيموت الايميل هيموت

السفر بالنسبة لك ايه؟

مش حلم عندى ولا حاجة

عادى يعنى

الموود بتاعك ايه ؟

ديما الحمد لله باكون رايقة على رأى ماما

بتعمل ايه فى وقت فراغك ؟

ممكن افتكس اى اكله او اقعد على النت او اناااااااااااااااااااااام

الأكلة المفضلة ؟

جمبرى

بشاميل

بيتزا

كشك

الصفات التى أخذتها من والدك؟

التناكة

الصفات التى اخذتها من والدتك ؟

العياط الكتير

اكتر ست حاجات بتكرههم ؟

الحر

الصوت العالى

دموع التماسيح

الكورة

نشر الغسيل

العيل الذكى بس مابيذاكرش

اكتر ست حاجات بتحبهم ؟

ايد العيال الصغيرة بابقى عايزة اكلها

ضحكة بابا

البحرررررر

بحب الحب

اللون اللبنى

الشارع بتاعنا وقت الفجر كدة او اى وقت بيبقى فاضى فيه وضلمة

شخصيتك نوعها ايه ؟

ممكن نقول شخصية غريبة ( وش محول ) السؤال دا غريب

لماذا دخلت عالم التدوين من الاساس؟

كنت عايزة اكتب كل اللى جوايا , واعبر براحتى فى مكان ليا انا بس

احلي جملة قيلت فى وصف مدونتك؟

مكسلة ادخل ادور , وخصوصا لأن جمل المدح كتيرررررر ( وش مغرور ) ه

احلى بوست كتبته؟ ضع اللينك ثم اذكر لماذا؟

البوست بتاع القطة

والبوست بتاع عارفين الواد دا يبقى مين ؟

اصلى كنت حاسة اوى الموقف وانا بحكيه

افضل مدونة قرأتها؟

مافيش افضل , اى مدونة رديت فيها اكيد عجبانى

افضل بوست قرأته؟

سؤال رخمممممممممممممم

الشغل بالنسبة لك ايه؟

ساعات بحسه حياتى

وكتير بحس انه اكبر غلطة ف حياتى

الانترنت بالنسبة لك ايه؟

عادى بيسد فراغى

تمرر التاج ده لمين ؟

لأى حد يدخل عندى ويعوز يخده

بلاش تخدهم وخدنى انا

فى عصرى كانت دادة يعنى واحدة عجوزة طخينة لابسة جلابيه تقيلة وغامقة , مكانها المفضل الارض واكلها المفضل سندوتشات العيال ولازم يبقى اسمها مكلكع وقديم يعنى مثلا مقبولة , ام كلثوم والحاجات دى

كانت عندى دادة ام كلثوم كانت على طول بتكنس , او بتبيع فيشار وعسلية , كانت بتبيع الكيس بشيلن , كنت اقعد اسحب منهاواقولها ماما هتحاسبك , وهيه كانت عارفة مامتى

ومرررررررررت الايام , ودلوفتى اتمدينت الدادات جدااااااااااا , عندنا كان ف المدرسة دادة غريبة الشكل والطبع واللون , الموبايل بتاعها انات يعنى انضف من موبايلى بلا فخر , وبشعرها مش لابسة ايشاربات وسبغاه كمان كستنائى , وكل شوية شغالة تتصل من الموبايل , وبتلبس بنطلون مش جلابية خالص , وف مرة كمان شفتها برة المدرسة كانت مظبطة نفسها على الاخر

الحمد لله من كام يوم مشيت وجابولنا دادة جديدة

بس ايييييييييييييييييييييييييييييييييييييييه

برده غريبية الشكل واللون , تيجى ترغى ولا كأنها من سننا , ولا لما تشوف حد فينا بيضرب عيل , تيجى تقعد تقولنا خلاص ماتضربوش علشان خاطرى , وتفتح ايديها وتقول لنا اضربونى انا بداله , مستفزة مستفزة يعنى , ومن كام يوم البوليس كان ف المدرسة علشان اجراء عادى يعنى كدة واوراق وكدة , راحت نزلاله تقوله والله المدرسين دول غلابة , ماتخدش حد منهم , خدنى انا وبلاش هما

اووووووووووووووفر اوووووووووووووووووووووووووووووفر يعنى

وبنلح على انها تنزل ابتدائى تحت ويجيبولنا واحدة جديدة وياعالم هتبقى عاملة اذااااااااااااااى

كل سنة وانا زى مانا

بوادر اكتئاب

دلوقتى بس عرفت يعنى ايه اغتراب ووحدة

انا تعبانة جدا ومكتئبة وزعلانة من كل الناس اللى اعرفهم علشان سابونى اوصل للدرجة دى

جايز هما مالهمش ذنب

بجد من جوايا انا مش طايقة اى حدددددددددددد ف اللحظة دى

انا كنت ماشية بنظرية انغام بتاعت مابحبش حد يشوف دموع ف عنيا

بس خلاص مش قادرة عينى قربت تورم

ادعولى موضوع الاكتئاب والخنقة والوحدة دا يعدى على خير

انا عمرى ماكنت كدة

دى الناس كانت بتحسدنى على روقانى وتكبير الدماغ

ان شاء الله هعرف ارجع زى ماكنت

يكفينى شرف المحاولة

ماحدش يسألنى عملت ايه ف الاجازة دى نهااااااااائى

--------------

كانت اجازة صغيرة اووووووووووووى

---------------

مالحقتش استمتع

-------------

خااالص

----------------

بس بجد الشعور بالفراغ هيوحشنى ----- ولا الصحيان متأخر جميللللللللللللللللللللللللللللللل وممتع جدا ,,,, ربنا يصبرنى بقى الاربع شهور الجايين لغاية اجازة اخر السنة

وداعا

التدوين بيخلينا غصب عننا نتعلق ببعض اوى , صحيح ما شفناش بعض ولا اتكلمنا مع بعض بشكل

مباشر لكن عرفنا بعض من جوه

توفى المدون الفارس الملثم , ربنا يرحمه ويجعل قبره روضة من رياض الجنة ويغفر له ذنوبه , انا فعلا عمرى مااتكلمت معاه شخصيا ولا شفته , بس حسه انى اعرفه من كتيرررررررر اوى , وطبعا مش هقول دا ياعينى كان تمانية وعشرين سنة , علشان الموت مالوش سن , كل اللى اقدر اعملهوه انى ادعيله عن ظهر قلب , واطلب منكم تدعوا له , وياه بقى لو قرأتم جزء من القرآن بنية طلب الرحمة له , وف النهاية دى عظة لينا علشان نحاول نقرب من ربنا ونظبط اعمالنا قبل فوات الاوان

مصدر الخبر من مدونة mohamed ghalia

علامة استفهام ووش بيضحك

Refresh

ياااااااااااه افتكرت الإعلان بتاع


_اخيرا


زيست __لما البنت كانت بتيجى تاخد نفس عميق وهيه بتشم صابونة ريحتها رائعة وتبتسم , كنت بحس إن احساسها دا واصلنا كلنا


اهوه الاحساس دا انا حساه دلوقتى __





اخيرا هاخد اجازة


هاعود لسنى الحقيقى


مش هابقى ميس وبتاع ,,,اللقب اللى حساه عمره ما لاق عليا ابدا


حتى الناس والله مستنكرينه ومش بالعينه عليا خالص


عارفين انا نفسى فى حاجات كتيرة اوى رغم انى متأكدة إنى مش هنول منها اى حاجة بس هخرج الكبت بقى عليكم وخلاص,,,,,,,,,


نفسى اروح اى بحر واحط رجلى فى المية واكلم البحر شوية __ بجد شيلاله كتير

,,,,,,,,,,,,,,,,,,,,,وعايزة انام على ضهرى على وش المية واسيبها تشيلنى شوية بقى ,, علشان تعبت من كتر مانا شايلة نفسى , عارفين الشعور بانك تقيلة على قلبك اوى انا بقى حساه



,,,,نفسى كمان اروح حديقة كبيرة مايبقاش فيها غيرى بس وانام على ضهرى وافتح عينى كدة واسرح فى السما الزرقا




,,,,,نفسى اشوف كل واحدة من صوحابى اللى الدنيا شغلتنى عنهم وشغلتهم عنى







تفتكروا اقدر احقق كل الاحلام دى فى ظرف اسبوع او اسبوعين ؟

, هوه الوقت بس اللى زنقنى مش اكتر ______

ماينفعش؟

لما كنت صغيرة كنت اقصى حاجة اخاف منها الكائن الخرافى اللى اسمه عفريت ,,,,,,,,,,,,



دلوقتى ماخاوفى زااااااادت اوى , وكبرت معايا

________



هوه ماينفعش ارجع موحة الاننة ؟؟

,



بس اذاى صحيح إذا كان اللى كانوا بيقولوهالى ماتوا الله يرحمهم

(انا خايفة من الاحساس بالفشل )

انا ما وصلتش لحاجة م اللى حلمت بيه

فتحت صوابعى العشرة على امل انى اتنى اى صابع منهم واقول انا حققت كذا وكذا , بس للاسف العشر صوابع مرفوعين مافيش حاجة منهم اتنت

مش هنكر إن حالى مش وحش وانى احسن من ناس كتير ,,, وانى حققت حاجات كانت برة ديرة احلامى , بس كل اللى جوة ما اتحققتش ______________ ومش هنكر برده إنى مش زعلانة اوى وانى لسة عندى امل فى الفين وتسعة

إن شاء الله السنة الجاية هتبقى نبرتى اقوى من كدة يوم مااكون حققت معظم اللى فى الدايرة ويارب مانشنش غلط تانى

على فكرة انا مش عارفة اقولكم كل سنة وانتم طيبين بمناسبة السنة الهجرية او الميلادية حتى , بسبب كارثة غزة

يلا ربنا يستر

اهه

عندما يتـــــــــألم الألم

وتموت الحياة

مش عارفة اختار مين فيهم

تعبت من الشغل جدا

اسيبه ؟؟؟



طب مانا بكره قعدة البيت

طب ماهو الشغل متعب ورخم وفوق طاقتى



وقعدة البيت بتكأبنى وبتحسسنى انى بلا هدف

مشتته بجد ومش عارفة اقرر


طب اشد فى شعرى من الغلب

انا ناوية إن شاء الله لما ربنا يكرمنى كدة واتجوز انى اقعد فى البيت معززة مكرمة وهخدم جوزى بعنيا وخصوصا لانى جربت الشغل وعرفت اذاى البنى ادم بيتعب طول ماهو بره بيته وساعتها مش هاكره قعدة البيت لانى هيبقى ورايا حاجات كتيرة اعملها فى بيتى ولعيالى إن شاء الله

_____________________________________

ماتقولولى اعمل ايه دلوقتى لغاية لما ربنا يكرمنى ينوبكم ثواب فى واحدة مسكينة زيى؟؟

हैप्पी फेअस्त

كل سنة وانتوا طيبين

ووحشنى جددددددددددددددا

, وياااااااااااارب يكون عيد حلو ويعدى علينا بخير إن شاء الله

وبرااااااااااااااااااااااااااااحة على الخروف بالله عليكم

إن شاء الله السنة الجاية تكونوا بتتابعوا مدونتى كدة من اى سايبر جنب الكعبة

وماتنسوش إن دا عيد لحمة مش عيدية ( على رأي الوالد ) , يعنى انتهزوا الفرصة وماتطلعوش شلن من محافظكم

السلام ختام

هقفل البلوج فترة



واحتمال تطول الفترة دى





وذلك للفقر التدوينى عندى اليومين دول



, ولأنى مش عارفة اعبر عن اللى جوايا بالكتابة



, بس دا مايمنعش انى لجألكم فى مدوناتكم إن شاء الله إن احيانى المولى



, إلى ان اعود للتدوين





والسلام ختام

امتى عدى يوم من غير ما انجرح ؟

السعادة

_______


دا عنوان التاج اللى بعته :

mohamed ghalia

_______________________________

وبصراحة التاج دا مناسب جدا لأنى حاسة انى داخلة على حالة من التشاؤم والاكتئاب



السؤال الأول:ماهى السعادة من وجهة نظرك؟

الرضا بالمكتوب ايا كان

_________________________________

السؤال الثانى: كيف تصل إلى السعادة؟

لو حللت كل شىء فى الكون على حسب مزاجى , يعنى مثلا:

هوه شخط فيا علشان بيحبنى ,

هيه كشرت فى وشى علشان اكيد حد ضايقها فى البيت , وهكذا

___________________________

السؤال الثالث: هل السعادة وهم أم أنها حلم صعب؟

حقيقة بس مش اى حد بيوصلها

___________________________

السؤال الرابع: هل السعادة طريق للنجاح ؟وضح؟

اه , السعادة بتخلى البنى ادم وشه مورد كدة وجميل , الناس بتحبه والحياة بتبقى حلوة ادامه , بيعرف ينجز ويبدع


___________________________


السؤال الخامس: ماهى أكثر اللحظات التى شعرت فيها بالسعادة؟

يوم نجاحى فى الثانوية العامة

يوم التنسيق

يوم تخرجى

يوم ما اخويا اشتغل وشوفت السعادة فى وش بابا وماما وحتى بابا عزمنا على كفتة

__________________________

السؤال السادس:هل ممكن أن تحقق كل شىء؟

اه ممكن لو فى اصرار بس اعتقد إن الاصرار مش متوفر اوى


________________________


السؤال السابع: السعادة تجعلك تقبل على الحياة أم لا؟

اكيد اه

_______________________

السؤال الثامن: هل أحسست يوما انك وصلت لقمة السعادة؟

لا لسة

________________________

السؤال التاسع: لماذا تمر أوقات السعادة بسرعة؟

علشان عمرها قصير

________________________

السؤال العاشر: هل ترى السعادة فى التدين؟

طبعا ( حلاوة الإيمان ) , ربنا يرزقنا اياه

________________________

السؤال الحادى عشر: هل أنت متفاؤل وعندك أمل؟ وضح؟

طول عمرى بابقى متفائلة لاقصى حدود , لدرجة الناس بتستغربنى وبتحسدنى عليها , بس حاسة إنى جبت اخرى وصبرى هينفد

________________________

السؤال الثانى عشر: إذا شعرت بالحزن ماذا تفعل؟

يا بعيط او اضحك ضحك غير طبيعى


________________________


السؤال الثالث عشر: هل يستمر معك الحزن فترة ام ينقضى فى الحال؟

بيبنقضى فى الحال بمجرد انقضاء الامر

________________________

السؤال الرابع عشر: ما رأيك فى الأفراد المتشائمين؟

التشاؤم شىء لابد منه فى بعض فترات حياتنا , بس على فترات بعيدددددددة , لكن التشاؤم المستمر بيعصبنى

_______________________



وفى تاج تانى كان جايلى من.....

حسن حنفى

______

عارفة انى اخرته جدا , اسفة اوى بس عوقبال لما كتبته

________________________
:: اية اكتر احساس بيراودك هذة الايام تجاة نفسك والاخرين ؟

تجاه نفسى : انى ماوصلتش لحاجة خالص

تجاه الاخرين : انى غريبة وسطهم وانى مش منهم , بس انا اللى عاملة كدة مش عيب منهم
________________________


أذكر صفتين يراها الناس فيك وهى ليست كذلك ؟

بيشوفونى صوغيرة اوى عن سنى , وانا مش كدة تماما , انا بحس إنى خدت من الدنيا دى وشوفت فيها اللى يخلينى اكبر من سنى بيجى ستين سنة

صفة تانية انى هادية ومستسلمة , بس انا مش كدة انا بحب اوى اخد حقى

________________________

لو معك ثلاث وردات لمن تهديها ؟

هدى وردة لبابا وماما يقسموا بقى ورقها عليهم

وابعت واحدة لشريف اخويا فى ميل

وتالتة هديها لبنوتة معايا فى الكلاس اسمها حبيبة اصلها هريانى بونيونى فمفيهاش حاجة لو اشترتلها وردايا بربع جنية يعنى

________________________


تهدى التاج لمين ؟

لأى حد مابحبش افرض حاجة على حد

خلاص الاسير بقى حر

شكرا

الشكر فى البوست دا غريب شويتين , لأن الشكر بيكون لإنسان فى الغالب دا بعد الشكر لله طبعا , بس المرة دى انا بشكر شىء

اه بجد انا بشكره من اعماقى , الشىء دا يبقى

قلبــــــــــــــــــــــــــــــى

كنت راكبة ميكروباص وسمعت اغنية لمطرب ما بيقول فيها ( خلاص الاسير بقى حر ) , يااااااااه مش قادرة اوصف شعور البنتين اللى ورايا لما سمعوا الجملة دى , سمعونى تنهيدة والعربية كلها سخنت والموتور كان هيولع من كتر ما نفسهم كان سخن , بنت فيهم قالت للتانية عوقبال يارب ما نتحرر

مش البنتين دول بس , كتير اوى اوى الحب بيأسرهم , جايز يقدروا يفكوا الاسر بعدين بس لازم تكون اتكسرت جواهم حاجة , علشان كدة انا بشكر قلبى علشان لغاية يومنا دا لسة ماحدش قدر يأسره

السؤال بقى دلوقتى : هوه ليه الحب ؟؟ هوه احنا غاويين نتعذب وندى نفسنا لحد غيرنا علشان يأسرها ؟؟؟؟

كلاكيت تانى مرة : انا وهى

بعد ما مدونة : انا وهى ماتت

بعلن انه تم احيائها مرة اخرى

ماهى مش ديمالك

إذا ماتت الام فتقول الملائكة

:

ماتت التى كنا نكرمك من اجلها فاعمل عملا نكرمك من اجله

الجملة دى هزتنى اوى لما سمعتها , بجد وقفت كل حاجة فيا , فعلا الواحد لما بتحصله حاجة حلوة بتتقال ادامه كتير اوى ( انت ربنا كرمك بس علشان خاطر والدتك ) , كنت باعديها بشكل عابر جدا , لكن اول مرة افكر اوى فى المعنى بتاع الجملة دى ।

نصيحة بنصحها للكل وقبلكوا انا , حاول تكظم غيظك اودامها , عارفة ان الدنيا مليانة بلاوى , واننا بنتعب جدا فى اشغالنا وبنبقى محتاجين حد نتعصب عليه , بس حاول مايكونش الحد دا والدتك , هيه مش مجبرة ابدا انها تستحمل عصبيتك بس بتستحملها علشان بتحبك , كل لما تحس انك هتتنرفز اودامها , عاقب وإستغفر مية مرة ( إجبارى ) , واجرى بوس ايديها علشان جايز تصرفاتك دى تشفعلك بعد كدة , دى الجنة تحت اقدامها ,

وماتنساش انك رحت او جيت حتى لو اتنططت هتتحاسب وهتقف اودام ربنا وهيقولك انت عملت كذا يوم كذا فى والدتك , يااخى اعمل كدة فى حد ظلمك مش حد مستعد يعيش تعيس طول حياته فى سبيل يشوف ابتسامتك

انا بتكلم بانفعال اوى عارفة , بس دا بسبب واحدة كانت بتحكى اودامى عن والدتها ومواقفها معاها فعصبتنى معاها اوى , لاحظ إن الام مش

ديمالك , ارضيها اووووووووووووى قبل ما تروح منك , وذى ماقولتلكم الكلام دا ليا قبل اى حد

احبب ما شئت فإنك مفارقه

تم البدر بدرى

يااااااااا ه الدنيا اتغيرت فى الشوية دول , صحيح بقالى شهر ما كتبتش بس لما رجعت انهاردة حسيت انى باقيلى سنة مادخلتش , شكل المدونة من عندى اتغير جدا , بقت المدونات تحت بعضها كدة , وايه حكاية الفلورز الكتيرة دى , اعمل فيها ايه؟؟ , انا كنت هافتحها بس خفت واترددت مش عارفة ليه ( وش متعجب ) ه

استحملوا بقى رغيي انا بقالى قرون مادخلتش

انا عارفة إن معظمكم وإن ماكنش يعنى كلكم عنده تطفل وعايز يسألنى عاملة ايه ؟؟ وعملت ايه فى الايام اللى فاتت ( وش متكبر ) ,

بصوا اولا انا قضيت رمضان الحمد لله حلو إلى حد ما , دا من حيث العبادات , وإن كنت ختمته بشوية كسل , وخايفة اوى تكون خاتمتى كمان كدة ( ربنا يرزقنا حسن الخاتمة )

وعن رجعت للتدريس بعد إصرار وتصميم انى ما اعودش ليه تانى , بس هاعمل ايه انا حاولت بكل الوسائل بس زيى ماتقولوا كدة ان المدرسة دى كانت مكتوبالى فى صفحات نصيبى , بس عموما انا محتاجة اى مشكلة عبيطة علشان اسيبها وافررررررر , وعلى فكرة الشغل مع العيال الصغيرة كان احسسسسسسسن بمراحل , الكبار مملين ورخمين , بس احسن حاجة فى الشغلانة دى بجد إن لو البنى ادم اخدها بنية صح , هياخد ثواب جامد , دا جايز بعد لما اموت يبقى ...علم ينتفع به... , او جايز عيل من عيالى يتفوق فى الانجلش ويترجم بعد كدة حاجات دينية وابقى انا اول صفحة من صفحات تقدمه

عايزة اقولكم على حدث غرررررررريب حصلى , من كام يوم كنت ماشية فى الترقة بتاعت المدرسة وقابلت الموجهه بتاعت الانجليزية , الاستاذة دى كانت بتدينى فى اولى اعدادى انجلش يعنى من حوالى اتناشر سنة , طبعا كعادتى اتكسفت اسلم عليها ومشيت , اكيد مش فكرانى يعنى , لقيتها بتشدنى من دراعى , وبتقولى بكل دهشة : سمــــــــــــــــــاح ؟؟؟؟؟؟؟؟؟؟؟؟؟؟؟؟

انا اذبهليت اوى , واستغربت انها مش بس فاكرة الفيس بتاعى لأ وكمان اسمى , يادى الهنا عليا وعلى جمالى , مش عارفة اوصفلكم مدى فرحتى بجد , نفسى ذيى ماعلمت فى دماغ الميس دى اعلم فى دماغ ولادى اللى بعلمهم كدة , ويقولى المس دى هيه اللى اسستنا

استحملوا رغيى بس لما صدقت , كنت عايزة اقول ايه تانى ياربى

اااااااااااااه , لسة من كام يوم كانت جيالى شكوى علشان الضرب ,مامت ولد عندى , كانت بتقولى حضرتك قرصتيه من ودانه جامد

طب اعمل ايه بقىىىىىى , عصاية ومابقتش ادخلها معايا , اسيب اللى مابيذاكرش واللى مابيحفظش واللى مابيكتبش الواجب , وابقى زيى زى الطربوش اللى واقف فى الكلاس ؟

المشكلة إن ولية الامر دى كانت بتتكلم بشكل ودى جدا وعمالة تقولى شكلك صغنون اوى ولا اللى هتصاحبنى , كان نفسى تنزل الادارة علشان اتخانق , بس يلا لسة ما اتكتليش اسيب المدرسة

الكلام نسانى اقولكم انكم وحشنى موت موت موت , وانى عايزة اعرف اخباركم واحدة واحدة واحدة واحد , , يلا اودامى ايام كتير اهيه ادخل اتفرج على مدوناتكم , لأنى شايفة مدونات كتير ماتت من بعدى ههههههههههه

كل سنة وانتوا كلكم طيبين

من قلبى لقلوبكم

اززززززززززززيكم ؟؟؟ اما جيت اكتب انهاردة حسيت إن الكتابة وحشانى موووووووووووت , بس طبعا بما إن رمضان جاى فمش هيبقى فى اى وقت عندى إن شاء الله

انا جيت بس علشان اقولكم كلكم كل سنة وانتم طيبين , ويارب يارررررررررررررررررررررررررررررررب ( من قلبى والله بجد ) مانخرجش من رمضان زى مادخلناله

لما تحس إن قلبك جامد وانك بعيد عن ربنا ومش عارف تقرب , اكثررررررر اوى من الذكر ( ألا بذكر الله تطمئن القلوب ؟؟؟) , واوعوا تفوتوا يوم تراويح , انا بوصيكم اهوه

رمضان دا فرصتنا , الشياطين محبوسة ومتقيدة , يعنى لو ماعرفتش تلين قلبك وتعمل كل العبادات صح وتقرب من ربنا اوى , يبقى اكيد الغلط جواك انت , واكيد انت وحش اوووووووووى من جوه , وطبعا ماحدش ضامن انه يعيش لرمضان اللى بعده ابددددددددا

اعمل لنفسك جدول طاعات يتعمل كل يوم , صلوات واجبة وسنن وتراويح وقيام وتهجد وزكاة وصوم ( بس صوم بجدمن غير نميمة ولا غيبة وبغض البصر والفم وكل الحواس عن اى حاجة حرام )

ولو فى يوم ماعملتش حاجة من العيادات اللى فى الجدول عاقب نفسك بنفسك , يعنى مثلا انت المفروض هتتصدق بربع جنية انهاردة او ختى بريزة , وماحصلش , يبقى عقابا ليا انا هادفع فى اليوم اللى بعده , خمسة جنية وقعلا تدفع , علشان لما العقاب هيبقى رادع هتتجنب الوقوع فيه

مش عارفة اقولكم ايه تانى غير ربنا معاكم , وابقوا ادعولى , واشوفكم مع اول بوست إن شاء الله اخر يوم رمضان علشان اهنيكم بالعيد , إن احيانى المولى , بس طبعا هاحاول اداوم على زيارة مدوناتكم علشان اطمن عليكم باستمرار

هتوحشونى للمرة التانية

ـــــــــا closed مؤقتـــــــ

هتوحشووووووووووووووووونى اوى اوى والله

اشوفكم على خير إن شاء الله

يلا السلام عليكم

زى الهوا

نار بابا ولا جنة جدووووووو

خرجت على بابايا فى هدوء , وجبتله الطفاية , وسألته عايز شاى يابابا ؟؟ , قالى لأ , رحت مطلعة من جيبى ( اكيد مش خنجر ) , طلعت ملبساية معتبرة بالنعناع , وقولتله طب خود دى ملبسة جامدة

قالى تعالى هنا ياعصعص هاااااااااااا عايزة تقولى ايه؟؟

((وبالصدفة كان الاكل بيتحط , ورغم انى ما بحبش اعمل حاجة وقت الاكل غير انى ألتهمه إلا انى تحاورت معاه))

قولتله : هيه مش تاتا ماشية رايحة تصيف ؟؟

( ( وهنا كانت الصدمة ) )

قالى : اه , ايه رأيكوا لو نروح كلنا نقعد عندها اليومين دول

قولتله : بابا انا نفسى اروح اقعد لوووووووحدى عندها

بصــــــــــــــــــلى بصة تشبه نظرة الاحتقار جدا , اللى الحبيب بيبصها للى كان حبيبه وخدعه وحب حبيب غيره

راح قالى : ابقى اقعدى فى اى اوضة , او اى بلكونة لوحدك ياسمممممممممممممماح

طبعا شيلت فى قلبى وسكت وقولتله اللى تشوفه ياوالدى

شوية وكلم تاتا ,,,,, قالتله دا الحاج ( جدو يعنى مش راضى يجيى معانا الساحل الشمالى , وهيقعد هنا

جه يوم السفر وبابا اكتشف انه عنده شغل ومش هينفع يروح بيت جدو , قولت فرصتىىىىىىىىىىىى

جدو ينام بدرى وانا اسرح فى البكونة للصبح , والهواء النقى يخبط فيا والورد بتاع الجنينة ريحته تبهرنى

قولت لبابا , قالى ماشى حتى علشان جدك مايكونش قاعد لوحده

خلصت درس السواقة منها , وجرى على جدو , واااااااااااه منه جدو

اول لما دخلت لقيت جدو مشمر هدومه وهاتك يا دلق , اه عمال بيدلق فى المية , ماهو عارف إن فى مساحة جياله تمسحله بيته

لأ وحبكت يعنى يطلع قلب التلاجة فى اليوم اللى قررت اروح استجم عنده

قالى : معلشى ياموحة اصلى لما صدقت لقيت تاتا مشيت , قولت انضف التلاجة بقى من التلج , بصى ألواح التلج اللى كانت فى الفريزر اد ايه؟؟

قولتله : ياخبر ياجدو , طب اساعدك فى ايه ؟؟؟

طبعا من ورا قلبى تماما , بس ماينفعش جدو يشتغل وانا اتفرج عليه )هه)

قالى : لأ ادخلى انتى بس غيرى هدومك وألبسى بجامة من بجامات عمتك , واكون انا خلصت

طبعا انا دخلت ألبس فى البيجامة فوق الخمس ساعات , هروووووووبا من هذا المأذق

ودخلت على البلكونة عشر دقايق , ولقيت جدو بينادى عليا ,

مووووووووووووووووووووحة

نعممممممممممممممممم

هتتعشى ايه ؟؟

اى حاجة ياجدو

( فى سرى كنت بقول يارب ينزل على المطعم بتاع عمو ويجبلى كفتة او جمبرى او حواوشى او اى اكل جامد كدة , واهو منها يتأخر ومنها اقعد ريلاكسيشن من غير شدة اعصاب جدو )

راح نازل جايب جبنة , ومربة وحلاوة طحينية , وبيض , وايه ماخدش ثانية

وقالى : انا عارف انك مالكيش فى الاكل الجامد بتاع عمك بالليل , وإلا كان زمانك كنتى تبقى دووووووووبة

دخلت عملت شاى بلبن , واكلنا , والنوم بقى على جفونى , رحت دخلت نمت انا فى اوضة , وجدو فى اوضة بعيدة جدا عنها ,

طبعا الرعب ماخلنيش اعرف انام , بقيت قلقانة وعايزة انام فى نفس الوقت

اتنقلت فى اوضة اقرب شوية لأوضة جدو , بس برده كنت خايفة لأنه بيتعود يقفل عليه الاوضة , (بيخاف هوه كمان هههههههههه)ه ,

وقعدت احلم بالحرامية

وصحيت الصبح على تليفون بابا بيتريق عليا , وبيقولى انبسطتى ياموحة؟ , زى مايكون حاسس بيا , قالى شوفتى اهة نار ابوكى ولا جنة جدك , وقعد يترجانى اقعد يوم كمان , قولتله ابدااااااااااااااااااااا , قفلت معاه وجريت على بيتنا حبيبى , ونمت يجيى عشر ساعات مبسوطة بنعمة الأمان

وتوتة توتة خلصت الاستورى

_______________________________

ملحوظة :

انا علاقتى ببابا مش وحشة ابدااااااااااا , دا انا نفسى اتجوز واحد كوبى بست من بابا , بابا بيموت فى انه ينرفزنى , وبيقعد يضحك عليا لما بتنرفز و مش لأنه بيكرهنى اكيد , بس لأنه بيحب يناغشنى , وإذا كان عصبى , فانا مراعية انه كدة من يوم ما اخويا سافر , الراجل بتاعه بقى , وكمان شريف كان قريب منننا اوى , وبابا كان بيرمى عليه كل الحمل , عارف انه مش هيسيبنا نغلط ابدا , لكن دلوقتى بابا بقى خاااااااااايف علينا , لأن شريف مابقاش قاعد معانا , ولا بيتكلم معانا , وعلشان المسئولية بقت عليه كاملة

لكن بابا داحبيبــــــــــى حبيبـــــــــــى حبيبــــــــــى ( ربنا يكرمه يارب ) ه

_______________________________

حاجة تانى عايزة اقولها : انى رغم كل اللى شايفاه من قعدة البيت إلا انى باقدس قعدة البيت , وبحبها كتير عن الشغل , هوه بس اى حاجة بتزيد عن حدها بتتعب , وانا علشان قعدت كتير , وكمان مافيش فى حياتى زحمة تلاهينى فانا زهقت , بس لو قعدت اسبوع بس فى الشغل هتلاقونى متضايقة اكتر من كدة بكتير

فرااااااااااااااااااااااااااااااااااااااااااغ

زهقت شوية لأ شويتين أو جايز تلاتة من بيتنا , من احساسى بأنى بلا هدف , وإحساس الاخرين بانى بطيخة قاعدة بتاكل وخلاص

,

وبخاصة انى زهقت من روتينى اليومى , اصحى اقعد اكنس وانضف فى الشقة المنيلة التلات اوض

,

وكل اوضة يمشى فيها سبع حصنة وتوخان كمان , دا ساعة الترويق بس اللى بتكبر , وبعد لما اروق ويادوب أجيب ليا طبق اى حاجة امزمزه واسلك بيه سنانى عوقبال لما الاكل الرئيسى يتعمل

,

الاقى ماما بتقولى املى الكولمن علشان بابا يلاقى ماية لما يرجع وما يزعقلكيش

وانا مالى انا يزعقلى ليه , هوه كل اللى يحب يزعق فى البيت دا يلجأ ليا انا ؟؟؟؟؟؟؟؟؟؟؟؟؟

المهم بابا بيدخل من الشغل ,,,,,,وانا براعى جدا البنى ادم اللى بيشتغل , لانه فعلا بيتعب وانا جربت , بس بابا بقى عصبى بشكل يعصب الاسد البارد

اول لما يدخل يقعد ساكت , اكيد بيفكر فى حاجة تنرفزه علشان يزعقلى , ممكن مثلا والله بجد , يقعد على السرير اللى انا لسة مروقاه ,

ويروح نازل بالملاية فتقوم تتبهدل , مزاجه كدة بقى , ويقولى ال ايه ((( يامووووووووووحة تعالى روقى السرير دا شكله منرفزنى))هأ

ويااه لو فكرت اتنرفز ولا اتعصب , جززززززززززززى ياموحة على لسانك علشان صوتك مايطلعش ( انا بكلم نفسى لإنى بترعب من بابا ) ه

المهم انا اصلا قعدة البيت ديما لما بتطول بتنرفزنى , بس ديما كنت لما اوصل لأخرى كدة فى الفترة دى يقوم يجيى المصيف
قعدتين اكلم فيهم البحر وبابقى تمامممممممممممممممممممممممممممممممممممممممممممممممم لأقصى حد

طيب المشكلة بتكمن فى انى مش رايحة بحار ولا جبال السنادى

فقررت ادورلى على مكان مهجور بلا بشر

, ( ويكون فيه هواء نفى يخبط فى دماغى واقول ( تش

اول لما سمعت إن تاتا هتصيف , قولت بسسسسسسسسسسسسسسسسسسسسسسس دى فرصتى , اروح اقعد لوحدى فى بيتها الللى اوضه كتير ماتتعدش دى , وبيتها طالل على حديقة والبلكونات برده كتير والشبابيك وفرص الحرامية فى الدخول عليا مية مية

ووووووولكن هل سيوافق ابىىىىىىىىى؟ هذا ما سنعرفه فى الحلقة القادمة (( طولت عليكم بغباااااااااء فقولت ارحمكم شوية من رغيى , واكمل البوست الجاى)) بس

مفجـــــــــــــ(ياموحة)ــــــــــــوعة

اكتشفت شىء شنيع جدا فيا

انا بموت فى الاكل

اموت فى الجمبرى

والله على الكشك

ياحلاوة على المحشى الكوسة والبتنجان والبطاطس والفلفل وورق العين وياجمال الكرنب

بعشق البشاميل بكل انواااااااعه

ويااااااااه على طاجن المكرونة بالصلصة

والبيتــــــــــــــــــــــــــــــــزا

او طاجن البطاطس او بطاطس الصينية وهيه مجلدة كدة على الوش ولسة خارجة من الفرن وعضم اللحمة الضانى من فوقها مشوى ومجلد برده

واسألونى بقى عن جمال السبااااااااااااااااانخ الساحر

والملوخية وهيه لسة اهيه طالعة من على النار

اللوبية والفاصوليا البيضة

شوربة الخضار وشوربة البطاطس بالتوم وشوربة لسان العصفور وشوربة الارنب

ياجماله الارنوب مسلوق او متحمر والفراخ والبطة والديك الرومى

الكفتة واللحمة المشوية والطرب والفراخ البانيه واللحمة الباردة والبرجر والشاورمة

بس بقى كفاية علشان شكلى جعت ياناس

عايزة الفت انتباهكم لإن وزنى 50 كيلو دا ساعة لما بيكون عالى اوى , يعنى المعتاد 45 علشان الحسد بس ربنا يحفظنا

اه قبل ماانسى اياك حد يتقرف من بق البنت اللى فوق دا , دى كفاية ضحكتها السكر دى وهيه بتاكل

وعلى رأى الست الوالدة : بس انتوا ابقوا هاتوا ضوفرها

انــــــــــــــــ((((((((وهى ))))))))ــــــــا

انا هاقفــــــــــــــــــــل الكومنتس هنـــــــــــــــــــا

بس هيتفتح هنلك

اه باركولى عملت مدونة جديدة

بس المرادى مش لوحدى

((((((((((انا وهى ))))))))))))))

اتمنى انها تعجبكم

يلا الكل يروح يبارك ويهنى هناك

Cold air

طبعا انتوا عارفين انى باحب اسمى البوست اللى فيه تاج باسم اللى حدفه عليا , ودا لاسباب عديدة اهمها , انى بانتقم منه علشان الناس اما هتشوفه بلوجر شرير وبيحدف تاجات على الناس الغلبانة امثالى مش هيعتبوله بلوج , ودا هدفى الرئيسى , إن البلوج بتاعه يتهجر وماحدش يدخله , يقوم يتجنن ومايدخلش تانى وبالتالى نخلص البلد من الناس اللى بتحط التاجات كلها هههههههههههه

__________________________________________

طبعا لازم التاج عندى يبقى سبيشيال عن عند اى حد ولذلك قررت انى اخلى هدية على كل صفة هاكتبها صورة , وهما ستاشر صفة , يعنى 16 صورة , وربنا يعينى والاقى صور على اد صفاتى التاج بيقول :

_________________________________________

الأول : اذكر 16 صفة من صفاتك
الثاني : مرر الواجب لمن تحب

__________________________________________

1. جبانة : بمعنى انى بخاف ادخل اى تجربة , الناس كلها بتتلسع من الشوربة تنفخ فى الزبادى , وانا بقى باعرف منهم هوه ايه اللى بيلسع واقوم نافخة فيه من قبل ما اشربه , بس دى صفة وحشة على فكرة , لأنها منعانى من متعة الدخول فى تجارب ومتعة الفشل ذات نفسها.


2. خوافة : لأ بس هنا خوافة بمعنى انى بخاف من خيالى , يعنى ممكن اكون قاعدة على السرير وخايفة يطلعلى من تحته عفريت , مش عارفة هاقعد فى يوم فى بيت لوحدى ازاى




3. بحب اغمض عنيا , بس مشكلتى انى بخاف من الضلمة



4. عصبية جدا , ممكن اصبر كتير , لكن لما باتنرفز باتعب بعدها وممكن ادوخ كمان ويغمن عليا وهيصة ههههههههه





5. باعرف اتحمل المسئولية : الموضوع دا اكتشفته لما بقيت مدرسة , ومنها رجعت بالزمن لورا ولقتنى فعلا ادها وادود




6. إرادتى قوية : اكتر موقف اكدلى الموضوع دا لما كنت عيانة وباموت , وماكنتش باروح الكلية ,وذاكرت فى الاخر ونجحت الحمد لله





7. مش هقول على نفسى غامضة , بس ممكن نقول مش سهلة





8. متفائلة فى زمن لا يعرف التفاؤل , وبعتبره عيب مش ميزة






9. لوك لوك , رغاية يعنى , بس مع اللى اعرفه بس




10. ساعات بابقى شريرة , وساعات اطيب منى ماتلاقيش ( على حسب الموقف ) ه





11. بحب اوى اسحب الكلام من اللى اودامى لما بحس إن الفضفضة هتريحه , وباكتم الاسرار الحمد لله



12. بحب قعدة البيت اكتر من الشغل , بس لما بطول باحس بملل وقلة الحيلة وانى بلا هدف




13. ممكن حاجات هبلة اوى تخلينى اعيط من كتر الخجل , واما احكى لحد يقولى الموقف مايستاهلش



14. بقدر الصداقة جدا , وعشرية لأقصى حدود



15. مش سطحية بحب اتعمق





16. بموت فى النوم , وبكره التعب , بس لو مضطرة بتعب
    

السؤال التانى : اللى عايز التاج يخده , بس رغم انه كان تقيل على قلبى اوى , بس فعلا خلانى افكر انا فيا ايه , جايز اكون منه اتعرفت على جوانب شخصيتى المتغطية