موحه فى رمضان

ناهيكم عن الرزه الحقيره اللى جوه ضرس العقل بقالها تلت ايام والوجع الغبى اللى حساه

وماحدش يقولى ازاى سيباها لانى قمت بكل الطرق والاساليب علشان اخرجها من ضرسى لتلاشى الذهاب الى الدكاتره المؤذيين بتوع السنان وخاصة لاننا فى شهر الصوم وماهينفعنيش باشا منهم يقولى هنخلع واقعد متعذبه من الضرس والعطش فى أن واحد

المهم دا مش موضوعنا

عزمت النوم بسبب المجهود الخرافى اللى باعمله فى يومى ونبهت على بيرسون بيرسون ماحدش يصحينى اتسحر ياجماعه

وإذا بصوت السيده الوالده :

سماح

ياسماح

ياموحه

سمووووووحه

ياسمممممممممممممممماح

انتى يازفته

وبكل ادب واحترام :

انا :

نعممممممممممممممممممممممممممممممممممممممممممممممممممممممممممممم

ماما:

قومى علشان تتسحرى

بنفس الادب :

والله العظيم ما هاتسحر

مانا قولت مش هاتسحر

روحى اتسحرى انتى

وتمشى ماما فى هدوء بعد كل الاذعرينا اللى كانت عملاها

دقيقتين ونفس الصوت :

سماح ياسماح

ياسماح

ياسماح

انا:

نعممممممممممممممممممممممممممم

ماما:

طب خدى ساندوتش الفول دا

انا :

انا قولت مش هاكل

مش هااااااااااكل

والله ماهاكل

ويتكرر نفس الحوار :

مره زبادى ومرة سندوتش جبنه

ومره بيضايه مسلوقه

ومره الشاى ابو لبن

ويعلو صوتى مرة بعد الاخرى

إلى ان تنتهى كل مكونات السحور فتضطر امى للجلوس

هعععععععععععع

تفوت مده حلوه والاقيها جيالى بالميه

وانا ماباقولش عالميه لأ

________________________________

دا باب السحوررررررررر

________________________________

انزل تانى يوم علشان رايحه مشوار للقسم علشان اعمل الفيش

برده ناهيكم عن الراجل الغريب اللى بيعمل الفيش

طبعا كنت محرجه جدا

اولا لانه بيمسك ايدى ويقعد يلطخها فى ماده سوده كده

ثانيا : لأنى بابقى شايله هم هانضف ايدى ازاى

ولكن لرحمة ربنا , لقيت راجل عجوز كده وابن حلال

نادى ليا وقالى انا هاصبلك الصابون دا وانتى ادعكى ايدك جامد

وبالفعل ايدى نضفت جدا والحمد لله

والمفروض وانا باشترى الورقه بتاعت الفيش , بامشى من ناحية الحجز بتاع المساجين

وفوجئت بمشهد ماشوفتوش قبل كده

الا وهوه المساجين والظابط بيديهم اوردرز :

اقعدوا عالارض ,, قوموا اقفوا ,, كله ايده على كتف زميله

بس شباب زى الورد

شكلهم مش متشرد ومبهدل ولا زى سواقين الميكروبصات اللى بنشوفهم

لأ اطلاقا ,, شباب زى اخواتنا وزمايلنا ,, منهم اللى لابس جينز على تيشيرتات

ومنهم بنطلونات باجى , يعنى فيه منهم كاجوال وكلاسيك

فعلا الكلبشات ماكانتش لايقه عليهم

بس الله اعلم بيهم , وباعمالهم

المهم انى المفروض كنت هاعدى علشان اطلع فوق

وعلشان اعدى لازم اعدى فالنص بين الشباب دول والظباط

طبعا كنت مرعوبه

وكل اللى فدماغى , طب ماممكن يكون حد فيهم محتاج يهرب ياخذنى اسيره

ويقول اللى هيقرب منى هاقتلها

(نظام افلام عربى يعنى )

لغاية لما الظابط اخد باله منى

راح مشاورلى جنبه ,, قالى اقفى هنا

رحت وقفت فى هدوء تام

ثم عزمت الرجوع

ركبت الميكروبص والناس موتىىىىىىىىىى

فعلا الصيام باين عليهم

ماحدش بيتكلم

مجرد اجساد تتنفس

غير بس راجل عجوز ربنا مديله الصحه كان ياعينى بيستظرف ومش لاقى حد حتى بيبن سنانه مجامله

حتى السواق اخد الفلوس ناقصه

وقال كده يبقى باقى اتنين

ماحدش رد عليه راح سكت واتبط

الناس تعبانه وعطشانه وعرقانه

الراجل السواق يقول حد نازل النادى ؟

يقوم ماحدش يرد

اول مايجى النادى يقوم تلاته نازلين

طب حد نازل الوادى؟

ماحدش يرد

ويجى الوادى يوقفه واحد وينزل

انا بقيت مستغربه حال الناس

دول حتى مش قادرين ينزلوا محطتهم

لغاية ماجت محطتى

الراجل قال حد نازل ابو سمره

ماحدش رد

اول ماجه ابو سمره

قولتله : ايوه هنا لو سمحت

راح مبحلقلى

كان ناقص يقول يامجانييييييييييييين

هععععععععععععععععع

المهم علشان كده طولت جامد

روحت البيت والساعه لسه تلاته

لا عارفه انام ولا اصحى ولا اتفرج على تى فى ولا اقرأ قرءان ولا اى حاجه

كل اللى حساه انى تعبانه ومدروخه وعطشانه

وغير قابله لاى حاجه

طبعا الاربع ساعات مروا عليا كأنهم سنه

إلى ان اذن المغرب

وشربت

والله المستعان

:)

ايووووحا

هابــ۩ــــ۩ــــى



رمضـــ۩ــــــــــــ۩ـــــــــ۩ــــان

فضفضه ع الهامش _2

باضحك اوووووووووووووووى بجد ومن قلبى

لما حد بيسألنى شكلك متدايق ليه؟؟ أو هوه أنتى متدايقه؟؟

لألألألألألألألأ إطلاقا هاطق بسسسسسسسس

اقولكم على حاجه بصراحه؟؟

انا مستغربه إنى لسه بابتسم فى وش الناس

ومعلومه كمان

انا فاشله

معلومه تالته بقى

فاشله فى كل حاجه

:(

اقوى من اى آلااااام

انا لو قلبـــــــــــــى هيحلـم بيك

هقتل جواه الاحلام

:(

Stop asking meee

هوه مين دا ؟

دا واحد كان معاصر لعصر انور السادات فبيحكى حاجات كتيره عنه

اهه بس مش غريبه انه لسه عايش؟

مانتى شيفاه مهكع وعجوز ازاى , وبعدين دى اعمار , بيد الله يعنى

هوه ربنا ازاى قادر يتابع كل الناس دى واعمالهم فى وقت واحد؟

قادر على كل شىء

ايوه يعنى ربنا عنده كام عين؟

ما اعرفش غير انه بيشوفنا من جوانا وبرانا , يعنى حتى ماتخفى النفوس

:)

هوه انتى ليه ما اتجوزتيش لغاية دلوقتى؟

بس انا مش كبيره اوى كده يابنتى

ايوه بس مياده اصغر منك بكتير واتجوزت , انتى ليه لأ؟

النصيب , لسه الحد المناسب ماجاش , وانتى بتشوفى بعينك اشخاص غير مناسبين

:(

هوه انتى ناويه تسمى عيالك ايه؟؟

مش عارفه , اما ربنا يكرم

هوه الفيل كبير اوى . صح ؟

اه طبعا ,, ضخممممممممم

يعنى هوه اكبر ولا الديناصور ؟

الديناصور انقرض

مانا عارفه بس ايه اكبر؟

اكيد الديناصور

هيه اسماء الامارات السابعه ايه؟؟

مش هاعرف منهم غير اتنين تلاته, مش فاكره الباقى

ايه بنجلادش دى ؟؟

دى بلد

وعاصمتها ايه؟

اسألى بابا او شريف

طب والعمله بتاعتها ايه؟

مش عارفه مش عارفه

طيب هوه ليه الثور بيكره اللون الاحمر بالذات ؟

جايز يكون فى فعينه موجات مابتتماشاش مع الاحمر , بس عموما عندك اميرة بيطرى جوه تسأليها :(

هما ليه حولوا نظام الحكم من ملك لرئيس؟

نزلت شروط جديده بتجارى التقدم , فقالوا يعملوا نظام حكم جديد

اربعتاشر سنه من الاسئلــــــــــه

اللى عماله بتسأل دى سارة اختى

والغلبانه اللى بتجاوب , تبقى انا

عايزه اقولكم ان دى والله نسخه مصغره من اسئلتها

تقدروا تقولوا انها مش بتسيب حاجه غير وتسأل فيها

ولا حد ف البيت غير وشغاله عليه اسئله

خلاصة الكلام البوست دا علشان انصح كل شاب وكل فتاه

عودوا ولادكم مايسألوش

ماتسمعوش كلام الدكاتره ف التليفزيون اللى بيقولوا كل ما العيل يسأل جاوبه علشان مايتعقدش ويتعود ع الوحده

وال ايه كل مايسأل كل مايبقى ذكى

الناس دى انا سمعت كلامهم وبقيت اسيب اختى تسأل لما طلع على دماغى انا

والدكاتره دول مش خاسس عليهم اى حاجه

:(

لولا الملامه

لولا الملامه ياهوا لولا الملامه

لافرد جناحى ع الهوا زى اليمامه

لأطير وارفرف ف الفضا

واهرب من الدنيا لفضا

ماكفاية عمرى اللى انقضى وانا باخاف مالملامه

واه مالملامه

:)

ضيـــــقه اوى

هافضل لغاية امتى جوه الحلقة المغلقة اللى حطيت نفسى فيها دى؟؟؟

:(

صغيرة ع الحب

كنت باسمع الاف ام بالليل واتشليت حيث الناس اللى بتحب والسلام
انا متهيألى انهم مش بيتنفسوا علشان يعيشوا

لأ خالص دول بيحبوا علشان يعيشوا
مثلا بت مفعوصه عندها 14 سنه عماله تقوله انا مش متأكده من مشاعرى يااسامه

عايزه اقولها قومى فزى يابت انتى هاتيلك كتاب ذاكريلك كلمة

ولا اقرى حاجه مفيده تنفعك
خيبه عليكى

والتانيه تقوله انا خرجت من قصه على قصه ومش عارفه انا كده باظلم التانى دا ؟ ولا لأ؟ لأنى مابحبوش انا بانسى بيه الاولانى
قالها اول حب طبعا ما بيتنسيش , قالتله دا مش اول حب , انا كنت باحب واحد قبل كده

قالها انتى كام سنه ؟ قالتله 19

هعهعهعهعهع
19 سنـــــــــــــــــــــــــــــــــــــــــــــــــــــــــــــــــــــــه

ايه البنات دىىىىىىى؟؟

وايه بقى عالم حب ف حب
واحد باعت مسدج : قول لمش عارف ايه مش عارف مين بيحبك وبيموت فيكى

والتانيه قول لمش عارف مين انى كرهته من تصرفاته وانى ماكنتش باحب حد اده
بس مش هانكر انى كنت اسمع عن اسامه منير دى انه هايف , لكن لما سمعت ردوده فى كذا حوار حسيته عاقل جدا , ومش مجامل

زى ماتخيلته
:)

المهم المزيج المعوق من الحب دا فكرنى بالمدرسه وعيالى بتوع سته ابتدائى
جيت ف مرة وانا باشرح اتكعبلت فى ورقه

بابص عند رجلى اتخايلت بحرف الحاء والباء


طبعا علشان ما الفتش انتباه العيال رحت مطبقاها وحطاها ف جيبى

غير انى برده خفت ما اعرفش اتصرف

لما خرجت بافتح الورقه لقيت الاتى :

حبيبتى هبـــه انى احبك , فهل تحبينى

نعم ...... لا ......, اعملى صح اودام الاجابه

طبعا اتعفرت مش من العيال ولا الحب ولا قلة الادب

لألألألألألألألألألألألألألألأ من الصيغه , حسيت انى ف امتحان دراسات اختار نعم او لا هههههه

باقول لمدرسة الدرسات لقيتها بتقولى اومال ايه ؟ دا من زمان وهبه دى بلوى وبت مش كويسه

انا اصلا مابحبش من الفصل دا حد قبل هبه

دى هيه الوحيده اللى بتجاوب وبتقفل الفوووووووووووول مارك

المهم روحت جبت هبه وقولت اعقلها ودى طفله وهتستوعب كلامى وهتخاف

اجى اكلم البنت الاقيها بتقولى انا اصلا مش بحب الولد دا وهوه حاول يكلمنى وانا رفضت

ومش هوه اصلا اللى ف دماغى

ومش عارف مين خرج ورايا ومشى ورايا لغاية البيت

وبابا شافنى مع مش عارف مين

انا حسيت ان معبودة الجماهير قاعده اودامى

ووقتها بس حسيت انى غير مرغوب فيا

هههههههه

ولقتنى بازعأ ف البيت بتاعة سته ابتدائى وباقولها اياكى اسمع عن ورق وحوارات من دى تانى

البت انتفضت من مكانها

ولولا اننا كنا ف اخر السنة وخلصنا المناهج

انا متأكده ان اخر يونتس دول ماكنتش هتفتحهم , لانها كرهتنى انا ومادتى

المهم وانا باحكى للمشرفه بتاعتى

لقتها بتقولى اومال ايه ,, دى هبه متفوقة الفصل والف من يتمناها

O_o

قولتلها اومال لو جبتلهم بنوته من فصل المتفوقين هيعملوا ايه ؟

قالتلى ولا حاجه هيحسوها كوبه ورخمه ومتكبره عليهم , غير انها مش هيكون لها ف الهبل دا , ومذاكرتها اهم حاجه

:)

فكرت شويه وفعلا دخلت احملق ف العيال بتوع سته اول

لقيتهم ياعينى البنات مش طايقين الولاد

وكل اللى يهمهم انهم يعملوا مسابقه ضد الولاد ويكسبوهم

والولاد بيكرهوا البنات وعايزين يبقوا التوب

حسيت انهم عيال نضيفه

ولاد ناس

مخهم صح

عارفين ان كل سن وليه متطلباته

وان الحب دا حاجه فرعيه جدا فى سنهم دا

ولمدة خمستاشر سنه كمان بعد سنهم دا

العيال دول هيتعبوا ف حياتهم كتير

على عكس التانين _ عارفين اللى ليهم واللى عليهم :)

انتى مرايتى

باشوف فيكى نفسى

ماتت

امتدت إليها يد الموت ....

فذهب ضجيج الحياة..

وبقى صمت القبور .

ء

لمسانى

إتخنقت

وطلعت كنت بضيع وقت

كان حلمى وهمي وانا صدقت

للأسف صدقت

إتخنقت

كان حلمى بيموتني ببطء

خلاني فقدت النطق

أحبطت وأتخبطت

انا ماوصلتش لحاجة من اللى حلمت بيه

سوء اختيار دة ولا سذاجة ولا ايه

انا ماوصلتش لحاجة من اللى حلمت بيه

سوء اختيار دة ولا سذاجة ولا ايه

رجعت للصفر من مكان ما بدأت

........

سكك فيها ناس كتيرة

والحلم ما اختلفش

في واحد شاف حقيقته

وفي واحد ماشافش

رجعت للصفر من مكان ما بدأت

......

إتخنقت

على اشكالها

الطيور على اشكالها تقعععععععع

يعنى اكيد مافيش نسر بيعجب ببطه وبيروح يرتبط بيها
ولا مثلا عصفورة صاحبت نسر

وحتى لو نفس الفصيله والنوع لازم يكونوا شكل بعض

يعنى لو صقر شايف نفسه شويه وانيق ومهندم
مش هيرتبط ولا هيصاحب صقره مبهدله وريشها مليان طين لأ خالص دا ممكن كمان يهزأها علشان كده بتسيىء لمنظر الصقور
:D

احناااااااااااااااااااااااااااااااا برده زيهم تمام

على اشكالنا بنقع

بننقى بعض حتى لو فين

ايام الكليه كنت ملاحظة الموضوع دا اوى

كان الناس الاستايل والدماغ يتلموا على بعض

والناس الوسط مع بعض والناس والناس والناس

و ف الشغل متقسمين برده لقبائل

ناس بتقاتل من اجل القرش ودول مصاحبين بعض

وناس مكبره للفلوس ومابتعملش حاجه غير عايشه حياتها دى قبيله تانيه

وناس وسط وبرده دول عملين قبيله

وناس تانيه شايفه شغلها اوى

وناس ماعندهاش ضمير

ودا حال الدنيا قبائل شبه بعضها

دا اجابة سؤال واحدة سألتهولى :

هوه انتوا ليه اتبهدلتوا كده بعد الكليه وناس كتير منكم اتفرقوا ؟؟؟

الرد بكل بساطه علشان مابقيناش شبه بعض زى زمان

مابقيناش اشكال بعض

فطبيعى جدا كل حد فينا يقع على شكله الجديد اللى يشبه

:)

مشى خلاص

هتصدقونى لو قولتلكم إن الحياه معاه مختلفه ؟

طب هتصدقونى لو قولتلكم انى باعيط عليه دلوقتى ؟

وانه واحشنى من دلوقتى ؟!

احكى الحكايه م الاول

من شهر ونص تقريبا , ابتدى البيت كله يستعد للحدث الجديد اللى هيحصل ف بيتنا

اه حدث جديد , يكسر الروتين اليومى الللى عايشينه

حدث جديد ينسى كل حد فينا اللى خانقه واللى تاعبه

زى بالظبط لو العيد داخل علينا مش هنجهزله؟
لو فرح حد من الاسره , مش هنجهزله ؟

حدث حلو اوووووووووووووى يعنى

كلنا كنا محتاجينه

وفعلا كل حد كان فيه حاجه شغلاه او مضيعه وقته ابتدى يسيبها ويتفرغ لأحسن حدث

الحدث دا يبقى :

احلى اخخخخخخخخخخخخخ ف الوجود

شـــــــــــــــــريف

تقريبا قعد اسبوعين , او اكتر كام يوم

بس كانوا حلوين اوى , كنت باصحى ادور عليه واطمن انه ف وسطنا

يااااااااااااااااااااااااااااااااااااااااه الغربه دى وحشه اوى

المهم انى كنت حساه بيولد جوايا الامل اللى بدأ ينكسر

كنت تايهه , وحاول يرسينى ع الطريق الصح

مش انا بس

لأ الابتسامه والفرحه اترسمت على وش كل حد فينا

زى مايكون كان ف ايده فرشه وشغال يقلب العلامه :( للعلامه :) ههه

وكنت حاسه بابا عايز يصرخ ف الناس ويقولهم سندىىىىىىىىىى اهوه

وماما كانت مبسوطه اوى

انا واميره وساره بيبقى واحشنا احساس الاخ اوى

وبعدين كفايه انه بيقعد يناغش فينا واحده واحده وهوه رايح وهوه جاى :)

اثر فينا كلنا

وزى كل مره وهوه ماشى قعد يوصينا على بابا وماما

ومشى انهارده

وكأنهم بياخدوا جزء من جسمنا يادوب مالحقش يستقر ف مكانه جوانا

مش هارغى كتير لأنى مش عارفه اعبر

:(

خدوها منى حكمه

1_

الحقيقه بكل مافيها , ماتخصش إلا صاحبها

___________________________

2_ مابقاش فيه صديق ... الاصدقاء ماتوا ف الحرب ... بس مش فى حرب اكتوبر ... لأ حرب المصالح

بس لسه فى ناس بتحب من قلبها بجد :)


__________________________

3_نصيبك هيصيبك ولو فين ... زى ماكان بيقول حلمى إن الواقع ممكن نغيره لكن القدر او النصيب مكتوب علينا
:)

__________________________

4_مافيش اى بيت او شركه او اى حاجه ف الدنيا تقاد بشخص واحد إلا وبتدهور

لأن بكل بساطه ما واحد إلا الله

(قالهالى اخويا ) ه

___________________________

5_ سرك تخليه جواك ..... دا لو حد صحبك قالك سر عمرك ماهتقوله ... بقى بالذمه مش عيب تدارى اسرار الناس وماتعرفش تحفظ سر نفسك
:s


___________________________



6_ اخر واحدة بقى وعارفه ان ماحدش هيفهمها , بس هيه حاجة فى نفسى ومحتاجه اقولها من غيظى

لو متغاظ من حد اوى قوله جواز صالونات

جواز صالونات

صالونات

صالونات

:P

هع هع

هموت من كتر الضحك

:D

كاظم قال

ابكــــى

ولا احد يرى دمعاتى

:)

طب ايه ؟؟

هيه هتضــــــحكلى ؟؟

ولا هتضحك عليا ؟؟

:unsure:

:)

للطرح مآرب كثيره

ركبت من كام يوم المترو

تقريبا من ساعة لما خلصت الكليه

وانا بقيت استبعد جدا مواصلة المترو دى من دماغى

اى حاجة تانيه ممكن توصل اسهل بمراحل

ديما لما باخرج باركب ميكروبصات مع صحابى او مينى بصات

واخر حاجة بنفكر فيها المترو

المهم شاء القدر انى اركب المترو

كل وقتى فيه لم يستغرق نص ساعه

بس شوفت حاجات غريبه جدا

ماكانتش موجوده على ايامى طبعا

كان وقت خروج الطلبه من امتحاناتهم

ومش هانكر انهم اصغر منى بكتير , بس اتعلمت منهم كتير كتير كتير

واهم شىء اتعلمته ف النص ساعة دى



, استخدامات الطرحه



المفروض انها على ايامى
, كانت مجرد بتتلبس ع الشعر علشان تداريه
انا واقفه فى حالى لقيت واحدة داخله ومعاها اربعه صحابها

, والخمس بنات حاطين جوه الطرحه من ناحية خدهم اليمين التذكره

مش عارفه ليه اشمعنى اليمين

, بس عموما فعلا دا اقتراح عظيم جدا

اومال يشيلوها فى ايدهم زينا زمان

وتعرق وتتبهدل

او مثلا ف جيب الشنطة

وتتلغبط مع الفلوس ونقعد ندور عليها

دا اول استخدام للطرحه

شويه وبابص على بنوته عسوله كده
, لفت انتباهى اوى لون شعرها اسود غااااااااامق جدااااااااااا
, انا باحب اللون دا اوى ف الشعر
, وطبعا كوياه وعملاه أصه عسوله
, ولابسه طقم اعسل بنطلون لبنى وبادى ابيض

وطرحه عملاها كوفيه عند رقبتها وهنا يظهر تانى استخدام للطرحه

, وطبعا الاستاذه قاعده عماله تظبط ف شعرها

وعلشان مرهقه من الامتحان راحت سندت راسها ع الشباك بقت دماغها كلها بره

, وشعرها بيطير , ولونه يهبل انا بقيت خايفه حد يشده ويجرى

المهم الهانم جت المحطه بتاعتها

, راحت واقفه عند الباب وعملته مرايه
, وابص الاقيها شالت الطرحه من على كتفها , وال ايه بتلبس الطرحه على شعرها

اومال مالها كانت واخده راحتها وقاعده بشعرها كده ؟

علشان عربية سيدات يعنى ؟؟؟؟؟

طب مافى محطات , والولاد هيشوفوها ,

ربنا يهدى بجد

ودخلت واحدة حاطه جوه الطرحه الموبايل من نفس الناحيه اليمين

وبتكلم عمو خطيبها , وعماله بتزعأ فيه

, وانا مركزه جدا



وبكده تظهر تالت فايده للطرحه فعلا كان ممكن ايدها تعرق من الموبايل
, او ماتعرفش تمسك ف الماسوره
الجيل دا واضح انه احسن من جيلى

وكان فيه اربع بنات , فهمت من حوارهم

انهم قاعدين ف المدينة الجامعيه

, وراجعين من الامتحان

, كان صعب لأنهم اول لما دخلوا

, كانوا مقشرين , فصحبتهم قالتلهم يابنتى انتى وهيه كفاره

, المهم اننا هنروح بيوتنا

ونتخلص من المدينه

وشويه وفكوا اووووووووووووووووووووى

واحدة شغلت اغنية عقيمه جدا بتاعت فريد الاطرش وشاديه

, مش فاكره اسمها , لما كانوا متدايقين من بعض وعاملين نفسهم بيحبوا بعض

المهم البت شغلت الاغنية من هنا والساده المتضايقين

بقوا شغالين رقص هيستيرى

, بلا مبالاه كل دا غريب طبعا

, بس الاغرب ان واحدة منهم طلعت من شنطتها طرحة

وراحت ربطاها ف وسط صحبتها وهاتك يارقص

, والدنيا بخيررررررررررررررررر والله




وهنا برده ظهرت رابع فايده للطرح

بس الغريب اوى بجد انى كنت انا بس اللى باتفرج

, انا بابص على الريأكشنز بتاع الناس حواليا

, عادى جدا

المنظر فاميلير بالنسبالهم جدا

, مش بيبصوا حتى على البنات


اللى بتقرأ ف المصحف عادى
واللى بتبص من الشباك
واللى معاها كتاب
واللى سرحانه
واللى بتتكلم فون
واللى بتنام

كأن انا اللى اوفر انى باتفرج ع الخلق دى ومستغرباهم
بجد اعوووووووووووووووووووذ بالله
انا حاسه انى فلتت بجد

1_ فضفضه ع الهامش

باكلم نفسى

فرحت لما لقيتها ما اتغيرتش , ولسه زى ماهيه ,
حاكم بقالى فترة باعانى من النفوس اللى بتتغير ,,,,,,,,


ارتحت لما اتكلمت معاها
, رغم كل صحابى اللى حواليا . بس كنت بقالى فتره قافله ع اللى جوايا ما باحكيهوش,,,,,,,


قعدت تتكلم كتير معايا وانا اتكلم كتير , كنا محتاجين نرمى همومنا على بعض,,,,,,,,,,


وفيها ايه مانا ياما زعلت وداريت,,,,,,,,,,


كان نفسى ماتتنازلش علشان التطوع مايتحولش لواجب,,,,,,,,,,,,


مابقتش احب حد يشاركنى احلامى,,,,,,,,,,,,,,


بقالى كتير ماشوفتكيش مبسوطه
, كنت قربت انسى شكل ضحكتك ,
يارب ديما,,,,,,,,,,,,


ياريت بجد علشان ارتاح.,,,,,,,,,


هدوء ماقبل العاصفه .. ياخوفى ,,,,,,,


قاولونى تاعبنى ,
مع انى مش متعصبه خالص , زعلانه بس
:)

تاج فقرى

انا مش باحب اجاوب على التاجس علشان انا مش لبقه ومش باعرف اجاوب على الاسئله الشخصيه اوى

وكمان باحب ابقى سيكرت ماشى ع الارض

بس ايا كان انا اتحدف عليا تاج

من شاب فقرى , جيت احدفهوله راح حادفه عليا تانى وعليه زيادات كمان

اولا انا باعتذر له علشان اخرت التاج اوى ,

بس والله كان عندى ثراء تدوينى فظيع شنيع ,

لدرجة انى ما اكتفيتش بالكتابه هنا , فبدأت اعمل مدونة جديده كمان , ولسه باظبطها

ثراء ثراء يعنى

:)

واحب اقول للشاب الفقرىىىىىىى

: حرام عليك التاج صعب جدا

, ماكنتش حاسه بصعوبته وانت بتحله خالص

, قلبت عليا المواجع

:) :

السؤال الاول

:
رتب الاتى حسب اهميتها بالنسبه لك
الصداقه _ الحب _ العائله_ المستقبل _ المال

1_ العائله

2_ الحب

3_ المستقبل

4_ الصداقه

5_ المال

_____________

السؤال التانى
:
اجب عما يلى
:
1_ عرف الحب فى جمله صغيره ( حب الحبيب و الحبيبه) ,ه

الحب وطن مقره القلب اساسه الوفاء ودستوره التضحيه ولا يخلو من الألم

وهل يمكن ان نعيش بدون حب (الحبيبه او الحبيب برده ) ؟؟؟

اهه عادى جدا هنعيش وهنتنفس كمان ,

بس هنفتقد مذاق كويس

2_ ما الرساله التى تريد ان تبعثها لحبيبك او حبيبتك ( زوج /ة المستقبل ) إن وجد أو لسه ماوجدش ؟

رساله لزوج المستتتتتتقبل

اممممممممممممممم

مش عارفه , بس ممكن اقوله اتقى الله فيا , وماتخبيش عنى حاجة , وحبنى بجد

كن انا , اكن انت

بس

وربنا معاه منى بقى هيشوف ايام

:)

3- ياترى إيه أكتر حاجة بتكرهها فى الحياة ؟؟؟

الكدب , مابعرفش اسامح فيه ابدا

حتى لو مثلت انى سامحت فيه جوايا بافضل شايل

4- لو هتتمنى أمنية قبل ما تموت هتبقى إيه (( ملهاش علاقة بالدين )) ؟؟؟

اكون حققت جزء كبير من احلامى

5- مين أكتر حد محتاج تشوفه وترتاح فى حضنه أو تبص فى عنيه ؟؟

مافيش حد

6- مين أكتر حد نفسك تخسره ؟؟؟

مس مها _ مديرة المدرسه

7- من وجهة نظرك ... إيه هى الحياة ؟؟؟

الحياة : مرحلة ما قبل الموت

8- ياترى هتقع فى الحب تانى لو حبيبك/حبيبتك سابك أو لو كان سابك بالفعل ؟؟؟؟

مش عارفة ماجربتش

بس اللى متأكده منه انى هاحب اللى هيبقى جوزى إن شاء الله

9- ياترى تقول إيه للعالم كله ؟؟

لو للعالم كجماد هاقوله :

I hate u

لو للناس

الله يكون ف عونكم

10- ياترى لو هتخسر كل اللى حواليك فى سبيل حلمك ؟؟؟ هتكمل وتحاول تحققه حتى لو كان مستحيل ؟؟؟

مش هاخسر اللى حواليا علشان حلمى اصلااااا

لأن اللى حواليا اغلى عندى من حلمى

11- ياترى إيه أكتر إحساس عشته الايام اللى فاتت ؟؟؟

عد عندك :

أ_ خوف

ب_ توتر

ج_ فشل

د _ ندم

و_سعاده

ه _ امل

واكتر والله :)

مش عارفه

افرحلك ؟

ولا ازعـــــــل عليــــــــكى ؟

ولا ازعـــــــل منــــك ؟

ولا انساكى بقى ؟

مـــش عارفه

My pillow

من خــــوفى قولت انام

تدارينى مخدتى

معادله سهله

الحــــــــــــــظ = استعــداد + فرصه

ونحط 100 خط تحت استعداد

_________

استعد لغاية لما الفرصـــــــــــــــه تجيلك

واما تجيلك اوعى تفرط فيها

علشان مابتجيش غير مره واحده ف العمر

_____________

حظك حلو : يبقى الفرصه جتلك وانت مستعد

حظك وحش : يبقى ماكنتش مستعد لما الفرصه جاتلك

م الاخر

عايزه اقول إن حتى الحظ بايدينا احنا

:)

هانت اوووووووووى

باقى يومـــــــــــــــــــــــين

الحمـــــــــــد ـللـه

مبسوطه جدا

طـــــ فـــــ ل

طفــــــــــــــــل

الكلمه دى عباره عن تركيبه رائعه , للأسف مش اى حد يدركها

تركيبه عقليه شنيعه , ممكن تستوعب اى قدر من المعلومات

دا غير ان الطفل دا عامل زى العجينه بنشكله بايدينا

بس مع الاسف

عندنا الاطفال بيتشكلوا ع الفوضى

هاقولكم على موقف اثبتلكوا بيه ان الاطفال طينه بتتشكل ايا كانت بلدهم وجنسياتهم ومستواهم العلم

ولادى مثلا ومش هاقول الشاطرين

لأ فصل الضعاف

كنت معوداهم على تفاصيل معينه طول ماحنا ف الفصل بنطبقها

زى مثلا :

لما ادخل الفصل بيقولوا :

Good morning Miss Samah . It's nice to see u

واما عايزين يدخلوا الحمام :

May I go to the bathroom , please .

واما باسألهم خلصتوا بيردوا :

not yet

or

Yes

وحاجات كتيرررررررررررررر

كنت اول لما ادخل الفصل كل حد اودامه ورقه بيشيلها
واى حد من الولاد لابس دبله او اسوره او اى هبل من دا بيشيله

وكانوا بيستوعبوا اى اوامر اقولها بالانجلش

Don't say Miss!

Put your hand on the desk!

Raise your hands!

Stop talking!

Begin with....

Ask about.....

Make aques.

Who can ask?

Who can answer?

Who can put it in a sentence?

atc.

رغم مستواهم العلمى الزفت , إلا انهم اهوه بيتشكلوا

واتحداكم إن كانوا فاهمين كلمة من دول

بس متبرمجين وبينفذوا , يبقى ليه مانشكلهمش صح زى الدول الصح

:)

كنت شوفت قبل كده ع اليوتيوب اطفال اليابان ,

مذيع زار مدرسه عندهم وقعد يحكى على سيستم حياتهم وتعاملاتهم جوه المدرسه

مش هاقول انهم اذكى مننا ولا انضف مننا ولا ولا ,,,

لأ خالص والله , احنا برده اذكيا ونضاف اوى كمان

بس احنا بنوظف اطفالنا غلط

طبعا اول الكليب جايب موظفه ف المدرسه ماسكه علم عليه كلمة مدرسه وبتعدى طفل طفل الطريق

لأ والعيال تلقائى وهما بيعدوا , بيقوموا رافعين ايدهم علشان قصيرين ف العربيات تشوفهم

واصلا مافيش زحمة ولا عربيات ولا بتاع , كل اللى ماشى عجلات

خايفين العجله تخبط الولاد ياعينى

عيدوا نفس المشهد عندنا

هتلاقوا العيل ماسك شنطته اللى تقريبا تزن نفس حجمه وبيناطح مع العربيات

لأ والناس اللى ف العربيات مش بتراعى نهائى

علشان معاهم عيالهم ومتأخرين على مدارسهم

وعيالهم اولى من عيال الناس التانيين

تانى مشهد مشهد للمدير

لابس بدلته ومهندم نفسه ومبتسم , وبيحط ايده على كتف العيال بيحسسهم بالأمان

زى عندنا تمام : S

والمدرسه اموووووووووووره اول لما بتشوف الولاد بتبتسم

مش زى عندنا العيال كانوا يشوفوا المدرسين يتذعروا و يستخبوا ف بعض

ندخل بقى الفصول

الديسكات نضيفه مش عليها القلم الحبر طافح , ولا العيال حافرين اسماءهم على خشب الديسك

الولد منهم يقوم يجاوب , يروح مرجع الكورسى جوه الديسك بكل نظام

مابيقولش دى ثوانى وهارجع تانى

لأ خالص , الكورسى بيرجع على طول لزق ف الترابيزه

اوووووووووووووووووووووه على جرس الفسحه بتاعهمم

مش كبينة مطافى زى عندنا

لأ موسيقى تريح اعصاب العيال ومن سكات جدا بتروح المدرسه واخدة شنطتها

وتحيى الولاد وتمشي

الفصول منظمه وشكلها عسول والعيال كلهم لابسين نفس شكل ولون الشنطه

علشان زحمة الالوان بتعمل صداع نصفى

و

عندهم اربع طرق لرفع الايد

واحدة معاناها عايز اجاوب

وواحدة عندى سؤال

وواحدة عندى اضافه

وواحدة انا باعترض او مخالف للرأى يعنى

احنا لو علمنا ولادنا كده هيحصل ايه؟

هيقولوا لأ؟

لو زرعنا فيهم النظام واحترمنا ادميتهم كده هيطلعوا وحشين؟

فيلم عسل اسود بنظره موحيه كئيبه

طبعا صورة الشهيد خالد سعيد لازقه فى دماغى وحارقالى اعصابى

وبقيت حاسه بعدم الامان

وشاء الحظ انى ادخل فيلم عسل اسود علشان اتكدر اكتر واكتر

انا ماليش ف النقد السينمائى نهائى

بس تقبلوا كلامى عن الفيلم دا

الفيلم دا مليان ضحك ياما , بس كنت حاسه اننا عبط وبنضحك على نفسنا

لأن الفيلم للأسف بيوصفنا صح ,

بيوصف سذاجتنا , وعدم انتماءنا , وسلبيتنا , و استكانتنا , وغباءنا , والعطاله , وسوء التصرف , واننا شعب غلبان اوووووووووووووووووى

احمد حلمى عمل الدور حلو جدا ,

بس حتى لما حب يحسسنا بإن مصر فيها ايجابيات ,

ما عرفش لأنها مافيهاش

تقريبا من الفيلم كله كانت ايجابيتنا ف الدفء الاسرى وحنان الام

وال ايه مش موجود ف اى بلد تانى

هاتوا لى اسرتى وعيلتى واشحنونا ف طياره لاى بلد , بلاش بلد , لأى جزيره فاضيه

عادى جدا هاحس بنفس الدفء الاسرى اللى باحسه هنا ,

وهيحبونى وهيخافوا عليا برده

احمد حلمى عرف يوصف مصر وكل سلبيات مصررررررر حلو جدااااااااااااااااااااااااااااااااااااا

بس والله فعلا كان ضعيف جدا فى انه يمثل ايجابيات مصر , ودا مش ذنبه , مصر هيه اللى مش مسعداه

المهم بقى , اكتر الادوار اللى شدتنى , واللى فعلا ألمتنى

لما دخل القسم , وكان بيتضرب على قفاااااااااااااه

حاول يتعامل زى المواطن الامريكى , ويسأل عن سبب الضرب , ويزعأ لأنه حاسس بالاهانه

لكن اتعامل زى المواطن المصرى , لأن الباسبورت بتاعه مصرى , اتضرب على قفاه تانى , وخلوه يروح يقرفص على رجله شويه

جميل اوى التعامل دا , بيحترمونا جدا الناس دول

:S

ولما اللواء اللى ف المظاهره , باعه فى لحظه , وخلاهم اكلوه علقه محترمه لمجرد انه عايز ياخد حق الراجل اللى عربيته اتخبطت

بس ياخد حقه اذاى , اذا كان اللى خبطه رتبه مهمه , رتبه مهمه يعنى عندهم جزم نضيفه كده بيدوسوا ع الناس الغلابه امثالنا بيها

وتألق احمد حلمى لغاية اخر مشهد , و اثبتلنا اكتر واكتر اد ايه احنا فعلا متداس علينا

لما حب يعمل نفسه بيموووووووووووووووووووت , بيحتضر يعنى ....... بتطلع روحه , بس للاسف هوه مصرى

ومافيش مشكله لما مصرى يموت

اصل الطياره مشيت ومش هينفع نرجعها

لكن لما طلع الباسبورت الامريكى يهوى بيه , الناس كلها ربطت الاحزمه , والطياره استعدت للهبوط

اصل الامريكى ما ينفعش يموت , لكن المصرى لاااااااااااااازم يموت , علشان يريحوا البلد منه

مشهد برده جميل اوى بتاع ايمى سمير غانم , المشهد دا كان بتكرر اودامى تقريبا كل يوم , دا بصفتى مدرسه يعنى

كنت ممكن اكون معديه اودام فصل , وافاجأ إن مس الانجلش جوه بتنطق الكلمه غلط

اول سنه كنت باندفع بشكل هيستيرى للفصل وادخل انادى للمدرسه واقولها الصح

بس بعد كده , لقيت ناس بتاخدنى على اد عقلى ومجرد ما ألتفت ترجع تنطق الكلمه غلط تانى

وناس بتزعل , من غير ماتفكر ابدا إنها كده بتبوظ جيل بحاله

اه , دا ربنا هيحاسبها على الكلام الغلط دا , انا كان فى كلمات متعلمها ف ابتدائى واعدادى غلط

ممكن يكون صعب على العيل انه يحفظ كلمه جديده , لكن الاصعب واصعب انه يكون حافظها بشكل , ويلاقى حد بيقوله دى غلط احفظ الصح بتاعها

بيبقى مخه كسل خلاص عن الكلمه دى , وبيعانى علشان يغيرها

طب اقسم بالله فى مدرسات انجلش مرحلة ال كا جى

K G

بيقولوا انا مدرسة كىىىىىىىىىىىى جى

حرف الكا بقى كىىىىىىىى

هيعلموا اجيال اذاى دول؟؟

خلاصة الكلام , الفيلم دا عجبنى جدا جدا ,

لأنه اظهر حقائق , مش هاقول مستخبيه , بس ممكن نقول اننا عاملين نفسنا مش شايفينها